Apostelit Piniarningit 2 - Labrador Inuttitut Heritage Bible

Anernerub ajunginerub kovijauninganik Apostelinut Penteᴋosteme Pêtrusib oᴋâlaninganik.

¹ Penteᴋostiblo uvlunga naliutingmat, ilûnatik, adsigêktomik isumaᴋarlutik katimalaukput.

² Tagvainarlo suluksuksoaᴋarpok ᴋilangmit pijomik, sorlo akᴋunarsoarmit pilune, iglolo ilûnât tâpkoa najortangat tattatauvok mattomunga.

³ Tâpkonungalo sakᴋertoᴋarpok ikomârsutitut ingmikoartitut oᴋartitut ᴋoblorsimajutitut-itunik, ilûnaitalo atunit tupvigilerpait.

⁴ Ilûnatiglo ilumertaulerput Anernermik ajunginermik, oᴋâladlalerpullo oᴋautsinut tusarngartanut, sorlo Anernerub oᴋâlajungnartingmagit.

⁵ Jûdeᴋalaukporlo Jerusaleme igloᴋartunik, angutinik Gûdemik nâlektunik, inuᴋatigênit sunatuinarnit ᴋilaub atânêtunit.

⁶ Suluksuksoak tamana tusaramitsuk, unuktoksuit katilerput ᴋoaksângadlarlutik, ilûnatik oᴋauserivaktatik tâpkonunga atortaujut tusaramigit.

⁷ Ilûnamatsiatigle kakilâdlarput, tataminiarlutik, oᴋaᴋatigêklutiglo: Ahâk, ukkua oᴋâlajut ilûnatik Galilêamiungilât?

⁸ Kanok ilingavâ, ilûnata ingmikôrluta oᴋauserivaktavut inûlerniptingnit tusaraptigîk?

⁹ Parterillo, Mêderillo, Elamiterillo, uvagullo nunaᴋartogut Mesopotamiame, Jûdêamelo Kappadôtsiamelo, Pontusemelo, Asiamelo,

¹⁰ Frîgiamelo, Pamfîliamelo, Egiptenemelo, Lîbiablo erkânêtune, Zirênib saniane, Rômiullo takkorngartat,

¹¹ Jûdillo, Jûdioᴋataujullo, Krêtamiullo, Arâbiamiullo, ilûnata tusarpavut oᴋartut Gûdib tatamnartulininginik, oᴋausivut atorlugit.

¹² Ilûnatik tâva kakilâdlarput, uimamadlarlarmiglo, oᴋaᴋatigêkpullo: ᴋanoᴋ tamanna ilinganiarᴋâ?

¹³ Ilangille mitaklutik oᴋalulerput: Mamarnermik vainemik imersimavut.

¹⁴ Tagva Pêtruse nikovipok 11 it illagilugit, niperᴋortovlunelo oᴋautivait: Ilipse Jûdiojose angutit naglingnartose, ilûnaselo Jerusaleme igloᴋartose, tamanna nalonarungnaititaule ilipsingnut, oᴋausikkalo iterlit siutipsingnut.

¹⁵ Talangilat tâpkoa talanganasugijase, uvlâk stundinga 9 otuinarmat.

¹⁶ Tamadjauvok, nalautaijokut Joêlikut oᴋautigijaumajok sivorngagut:

¹⁷ Uvlut kingordlingine imaitsomârpok, Gûde oᴋarpok: Anernera kovijomavara inungnut ilûnainut; erniselo paniselo nalautsitiksanik oᴋaromârput, inôsuktoselo angutit takotitjutinik tautugomârput, ituselo sinnaktômajomârput.

¹⁸ Uvlune taipkonane kivgamnut angutinut arnanullo Anernera kovijomavara, nalautsitiksaniglo oᴋaromârput.

¹⁹ Tatamnartulijomavungalo pikane ᴋilangme, nalunaikutaᴋartitsilungalo atâne nuname, aungmik ikomamiglo iserlûblo pujuanik;

²⁰ Seᴋinek ablatsaujomârpok tâksoarmut, takᴋerlo auktunitsomârpok, Nâlekab uvloᴋsoanga naliuterᴋârtinago.

²¹ Imaitsomârpok: Nâlekab atinga tailugo tuksiartoᴋ piulijaujomârpok.

²² Ilipse angutit Israêlitiojose, oᴋautsit ukua tusâsigik: Jêsuse Nazaremiok, angut Gûdemit pijoᴋ, sakᴋijâlaukpok akunapsingne piniarnerminut, tatamnartulinerminullo, nalunaikutanullo, Gûdib tamakkoa tâpsomûna piniarnerilaungmagit akunapsingne, ilipsetauk nangminek ᴋaujimagapsetut.

²³ Tâmna (Gûdib isumasimanerminut pijomajaminullo tunilaungmago) tigulaukpase idluitulijut aggangitigut, kikiaktorlugolo saningajolingmut toᴋodlugolo.

²⁴ Tâmna Gûdib makitilaukpâ toᴋub ânianarninganit pêrlugo, ajornavingmat toᴋungatsainarlune.

²⁵ Dâvidib oᴋautigingmago: Nâlegak sâmnêtitsainarpara, talerpimnêngmat aulatauᴋonanga.

²⁶ Tamanna pivlugo ômatiga ᴋuviasukpok; oᴋaralo serridlarpok, uvinigatauk nerriuklune merngoêrseromârmat.

²⁷ Tarniga anernerit ininganetsainarᴋojomânginangne, ajunginerillo (Kristuse) aserorᴋojomânginavat.

²⁸ Apᴋosinermik ingôgumut unertulaukparma; kênavît sângane ᴋuviasungnermik ilumertitsomârparma.

²⁹ Ilipse angutit ᴋatangutigêt, agviartaunanga atâtagijavut Patriarke Dâvide oᴋautigilago ilipsingnut: Taimna toᴋovlunelo iluvertaulaukpok, iluvingalo uvaptingnêpok sulle uvlome.

³⁰ Nalautaijôgame, nalunginamelo, Gûdib sokosijuitomik angervigilaungmago: uviningmit kinguvâksanga (Kristuse) makitsomavlugo, iksivautaksoanganullo iksivaᴋojomavlugo;

³¹ Sivorngagut tamanna takolauramiuk, Kristusib makininga oᴋautigivâ, tarninga anernerit ininganetsainalaungimat, uviningatalo aserornek takolaungimago.

³² Jêsuse tâmna Gûdib tupaktilaukpâ; ilûnata tamattominga kigligiutsijeovogut.

³³ Mâna Gûdib talerpiagut ᴋongmuartitaugame, Atâtablo angersimaninga Anernermik ajunginermik pilauramiuk, tâpsominga tagva kovisilaukpok takojapsingnik tusartapsingniglo.

³⁴ Dâvidele ᴋilangmut ᴋongmualaungilak. Oᴋarporle imâk: Nâlegak Nâlekamnut oᴋarpok: Talerpingma tungânut ingitit,

³⁵ Omigijingnik ilijerᴋârtinanga itikavît ikkogganganut.

³⁶ Tagva mâna Israêlib kinguvângit tamapse ᴋaujimatsialeritse, Gûdib Jêsuse tâmna, kikiaktulauktase saningajolingmut, Nâlegangortilâllo Kristusingortilaungmago.

³⁷ Tamannale tusaramitsuk, kibliktaulerput ômatimikut Pêtrusemullo asinginullo Apostelinut oᴋarlutik: Ilipse angutit ᴋatangutigêktose, sumîk piniartuksauvitâ?

³⁸ Pêtrusib oᴋautivait: Kaᴋialeritse, baptitaulerluselo ilûnase Jêsusib Kristusib atinganut, ajornerit isumagijaujungnairutiksanginut; Anernerub ajunginerub tunergutânik pilârpose tagva.

³⁹ Ilipsingnulle ᴋitorngapsingnullo oᴋautsit ukua ilingavut, ungasiktomêtunullo tamainut, Nâlekab Gûdipta ᴋaiᴋojomârtanginut tamaunga.

⁴⁰ Oᴋautsinulle unuktunut ukua asinginut kigligiutjivigivait, kaiblarlugillo oᴋarpoᴋ: Piulijauniaritse kinguvângoᴋatigênit ukkunangat tapatojunit.

⁴¹ Oᴋausinginik ᴋuviasuklutik nâlektut, baptitaulerput; uvlormelo taipsomane 3,000 it ilautitaulerput.

⁴² Apostelille ajoᴋertûtinginik nâlatsainalerput, ilagêklutiglo, ᴋakᴋôjaniglo avgoilutik, tuksiaᴋatigêklutiglo.

⁴³ Inuittauk ilûnatik kuksasungnermut tikitaulaukput; Apostelitigullo tatamnartunik nalunaikutaᴋsoarniglo unuktunik pijoᴋalerpok.

⁴⁴ Okpertungortitaujulle ilûnatik ilagêksimalaukput, perᴋutitiglo pigilugit katutivait.

⁴⁵ Perᴋutitik pitiglo niorvgotigivait, aitortûtigilaitalo ilûnainut, atunit ajoksarningit isumagilugit.

⁴⁶ Uvlullo tamaita ilagêklutik katimaviksoarmêput, ᴋakᴋôjallo avgorpait iglune tamaine.

⁴⁷ Nerrivullo, Gûdelo nartorpât ᴋuviasuklutik isumalingasuituniglo ômateᴋarlutik, inungnullo ilûnainut ivlerijauvut. Nâlegarle piloriktitaulertunik uvlut tamaita ilautitsivok okpertunut.