Apostelit Piniarningit 19 - Labrador Inuttitut Heritage Bible

Paulusib piniarninginik Efêsuseme. Demêtriusib piniarnilungninginik.

¹ Apolluse Korintemêtilugo, Paulusib nunat timerdlît arvertarvigivait, Efêsusemullo pivlune, naipitsivorlo iliniartut ilanginik.

² Tâpkununga oᴋarpok: Okpililaurapse, Anernek ajunginek pivisiûk? Tâpkoa oᴋautivât: Tusalaungilagullônêt, Anernernermik ajuginermik pitaᴋarmat.

³ Oᴋautivaillo: Kanok tagva baptitauvisê? Oᴋautivât; Johannesib baptijutânut.

⁴ Paulusele oᴋarpok: Johannese baptisilaukpok baptijumut ᴋaᴋialerᴋojijutiksamut, inuit oᴋaudlugit, okperᴋovlugit kingorliksanganut, tagva Jêsusemut Kristuseojomut.

⁵ Tamanna tusaramitsuk, baptitaulerput Nâlekab Jêsusib atinganut.

⁶ Paulusiblo patingmingmagit aggangminut, Anernerub ajunginerub tikivigivait; oᴋâlalerpullo takorngartat oᴋausinginut, oᴋâlalilarmiglo pijomârtuksanik.

⁷ Angutillo tâpkoa 12 olaukput.

⁸ katimavingmullo iterpok, oᴋâlavlunelo sivôranane takᴋinik pingasunik, kajungersarlugillo ajoᴋertorpait Gûdib nâlegauvinganik.

⁹ Ilangille mangaidlarmatta okpingimattalo, ajoᴋertûtsemiglo tamattominga oᴋausiluklutik inugiartoksoarnut, Paulusib ᴋemakpait, iliniartullo avitipait tâpkonangat, uvlullo tamaita oᴋâlavok angutib Tirannusemik atiliub ajoᴋertuivingane.

¹⁰ Taimaglo pijoᴋarpok jârik magguk nâvlugik, ilûnatiglo Asiamêtut Nâlekab Jêsusib oᴋausinginik tussarput, Jûdillo Grîkillo.

¹¹ Gûdelo tatamnartulidlarpok mikingitunik Paulusib aggangitgut.

¹² Imâk aglât pivut: Kidjijârnermik allarutiksat, kakkigutillo timinganut aktortitat ᴋanimajunut ilivait, pijungnairpullo, anernerillo ajortut anivut tâpkonangat.

¹³ Jûdille ilangit arvertarajuktut angakut (erksinatik) Nâlekab Jêsusib atinga tailugo anerniâluktalingnut oᴋarput: Jêsuse, Paulusib oᴋautigijanga pivlugo, anerᴋovapse.

¹⁴ Tâpkoale 7 olaukput, Jûdiojub Skêvab ajoᴋertuijoksûb erningit, taimailiortut.

¹⁵ Anernerle ajortoᴋ kiovok oᴋarlunelo: Jêsuse ilitarivara, Pauluselo nalunginivara; ilipsele kinauvisê?

¹⁶ Inûblo anernermik ajortomik illumiliub opadlarpait sâlagilugillo, angijomik ochotilugit; ᴋemâjariaᴋarpullo iglomit taipsomangat annoraijartauvlutik kiliadlaraulutiglo.

¹⁷ Tamanna tusaumajaulerpok ilûnainut Efêsusemêtunut, Jûdinullo Grîkinullo; ilûnatiglo erksinermik ilumertitaulerput. Nâlekablo Jêsusib atinga angijomik nakorijaulerpok.

¹⁸ Okpertuttauk unuktut unipkâriartorput kigligiksarlutik piniarnerilauᴋtamingnik.

¹⁹ Unuktullo angakôlauktut aglakotitik tikiupait, egidlugillo ikomamut, inuit ilûnatik takoane; akkingillo kitinamigit, nagvârput akkeᴋariaᴋalaungmatta 50,000 inik kênaujanik.

²⁰ Taimâk angitigijomik Nâlekab oᴋausingit aglivalliavut sâlaᴋalerlutiglo.

²¹ Tamanna nâmaksingmat, Pauluse anernermigut isumasivok ingergajomavlune Mazedôniakut Achâjakullo, Jerusalemullo aijomavlune, oᴋarporlo: Taikanêlauᴋârdlunga Rômemiktauk takojariaᴋarpunga.

²² Mazedôniamut tagva ajoᴋertuiᴋatingne magguk Timôteuselo Erastuselo tilivak; nangminerle Asiame nokᴋarpoᴋ uvlut ilanginik.

²³ Taipsomanele perajaludlartoᴋalerpoᴋ mikingitomik ajoᴋertûsek tamanna pitjutigilugo:

²⁴ (Efêsusemiut) ilangat, silberemik sanaje, Demêtriusemik atilik, Dianamut tuksiarvingoaliorpok silberinik, sanaᴋatinelo ikingitunik perᴋutiksarsitipait.

²⁵ Tâpsoma taipkoa asingillo taimaitomik sanajut katersorpait oᴋarlunelo: Angutaujose nalungilase, niorvgotivut tamanna akluitigigaptigo;

²⁶ Takovluselo tusarluselo, Efêsusemetuinaungitok, Asiamele illûnânekasak Paulusib ôma inuit unuktut kajungersainiminut allaitingmagit, oᴋarlunelo: Gûdeungilagôk aggangnut sanamajut.

²⁷ Niorvgutivulle tamanna soraituinarajangilaᴋ nachogijauvlune, gûdiojoksûble Dianab Tempelinga piungitônasugijaunajarivok, nâlegaviksôningalotauk nungutaunajarivok, Asiamiut ilûnatik silaksoarmiullo tuksiarvigijangat.

²⁸ Tamanna tusaramitsuk, ningarosuvaksoadlalerput, nipliardlarlutiglo oᴋarput: Efêsusemiut Dianangat angijoksôvok.

²⁹ Iglugasaksoarmiullo ilûnatik perajaludlalerput; takumârvingmullo aulajâdlaᴋatigêklutik tassigoarlugik Gâjuselo Aristarkuselo Mazedôniamioᴋ, Paulusib ingergaᴋatîgik.

³⁰ Paulusible inuit aivigijomangmagit, iliniartut inerterpât.

³¹ Asiame angajoᴋaujuttauk ilangita, Paulusub ilannârijingita, tiliklervigivât inertilâllo, takunârvingmut aiᴋonago.

³² Nipliajoksuit ilangit imâk, asingit imâk adsigêngitomik, ilûnamatsiatik uimajâdlarput, ununersallo nalovlutik, suna pivlugo tagvungaikatersormangârmik.

³³ Inuillo ilangita Aleksandere tassigoarpât, Jûdit ajaktudlarmatsuk. Aleksanderible aggangminut nullorarpait, inuit sângane akioromavlune.

³⁴ Jûdiojorle tukisileramitsuk, atautsikut niplivaksoadlarput ilûnatik stundik magguk nâlugik: Efêsusemiut Dianangat angijoksôvok.

³⁵ Angajoᴋâksûble inuit nipangertinamigit, oᴋarpok: Ilipse angutut Efêsusemiojose! inuit naliata tamana ᴋaujimangipaûk, iglugasaksoarmiut Efêsusemiut gûdiojoksoak Diana opigingmatsuk, adsingoangalo ᴋilangmit kataktôk?

³⁶ Tamanna akkerartortaujungnangimat, nipangertuksaugalloarpose uimajâraselo.

³⁷ Inuit ukua tamaunga pitilaukpase, katimavingnit tiglingningitut, gûdipsingniglônêt mitauteᴋangitut.

³⁸ Demetriusele sanaᴋatingillo oᴋausiksaᴋarunik, kinalônêt pivlugo, kiglisiniarviksaᴋarmat erᴋartuijoᴋarlarmelo, pasitiksamingnik oᴋarlit ingmingnut.

³⁹ Asianigle aperᴋuteᴋarupse, katimatilugit kiglisiniartunut oᴋautigisiuk.

⁴⁰ Pasijaunajarniptingnik perajaludlarnek uvlomenitak pivlugo sivôrajuksaugapta, sumik patsitiksaᴋarata perajaludlalaurapta.

⁴¹ Taimaglo oᴋarêrame, aularᴋovait katimajut.