Apostelit Piniarningit 18 - Labrador Inuttitut Heritage Bible

Paulusib Korintemêninganik. Efêsuse apᴋotigilugo ingerganinganik Jerusalemut, uterninganiglo Antiochiamut Sîriamêtomut-Paulusib ajoᴋertuijartorlune ingerganersoangita pingajuanik, Antiochiamit Asiarârsungmut Europamullo. (Kap. 18:23‒Kap. 21.) Apollusib Efêsusemêninganik.

¹ Kingorngagut Pauluse Atênemit aularpok Korintemullo pivlune.

² Jûdemiglo tagvane naipitsivok, Akvilamik atilingmik; tâmna Pontuseme inûlertok Italiamit tikeᴋammertok nuliane Prisilla aiparilugo, ataniviksûb Klaudiusib Jûdit ilûnaita aularᴋolaungmagit Rômemit.

³ Tâpkungnunga iterpok; adsigêngniglo sanagamik, najorpak sanavlunelo; itsaliorteovulle.

⁴ Sabbatinelo tamaine katimavingme ajoᴋertuivok, Jûdillo Grîkillo kaiblarlugillo tukisitipait.

⁵ Silasele Timôteuselo Mazedôniamit pingmanik, Pauluse Anernermut kajungersartauvok, Jûdinut kigligiutjerᴋovlugo Jêsusemik Kristuseojomik.

⁶ Akkerartormattale mitauteᴋarlarmiglo, annorâne aulatidlarlugit oᴋautivait: Ause niaᴋupsingnut pile, uvanga pasijaksaungilanga; mânamit pasijaksaunanga nalojunut ainiarpunga.

⁷ Tagvangallo aularpok, angutib Jestusemik atiliub iglunganut iterlune, Gûdemik opigosuktub, tâpsoma iglunga katimaviub tungânêtok.

⁸ Kristusele, katimaviub angajoᴋânga, iglomioᴋatingillo ilûnatik okperput Nâlekamut; Korintemiullo unuktut nâlektut okpilerivut baptitaulerlutiglo.

⁹ Nâlekable Pauluse oᴋautivâ takotitjutikut unnuame: Sivôranak, oᴋarille nipangernaglo;

¹⁰ Ilagigapkit, inungmut atautsemullônêt idluitulivioniatsangilatit; iglugasaksoarne tamakkonane unuktunik inuᴋoteᴋârama.

¹¹ Tagvanêporle jâremik atautsemik takᴋiniglo pingasojortunik, ajoᴋertorlugillo Gûdib oᴋausinginik.

¹² Gallionele atanerusiongmat Achâjame, Judit ilagêklutik perajaludlarput Paulusemut, aularupâllo kiglisiniarviub iksivautangata sânganut.

¹³ Oᴋarlutiglo: Oma inuit kajungertipait, Gûdemik kivgartorᴋovlugit perᴋojat nâlengnagit.

¹⁴ Pauluse oᴋaromalermat, Gallion oᴋarpok Jûdinut: Jûdiojose! idluitomik pikpat, idluitulinermiglônêt, tusarajarpapse nâmaktomik;

¹⁵ Apersûtiongmalle ajoᴋertûtsemik, aterniglo, perᴋojipsingniglo, isumapsingnik piniaritse, taimaitomik erᴋartuijomanginama.

¹⁶ Aulartipaillo kiglisiniarviub iksivautanganit.

¹⁷ Tagva Grîkit ilûnatik Sostenêse, katimaviub angajoᴋânga tiguvât, annaudlalâllo kiglisiniarviub iksivautangata sângane; Gallioniblo kamagingilait.

¹⁸ Paulusele akunit sulle tagvanêlaukpok; kingorngagut ᴋatangutigêt sorairutiksamik oᴋautivait, Sîriamullo umiaktoromavlune Prisillalo Akvilalo ilagilugik; nujanelo (Paulusib) kipjarpait Kenᴋrêame, oᴋautsine maliklugit, taimak oᴋarsimagame.

¹⁹ Efêsusemullo pivok, tagvungalo ᴋemakpak; nangminerle katimavingmut iterpok Jûdillo oᴋâlavigivait.

²⁰ Inangmatsuk najortaujomavlutik akunêrnersamik, ᴋipilukporle.

²¹ Sorairutiksamiglo oᴋautivait oᴋarlunelo: Aularviksiorvingme tikiniartome Jerusalemêtsariaᴋarpunga; tikitsomârivapse, Gûdib perᴋokpanga. Efêsusemillo aularpok.

²² Zesarêamullo pivlune, (Jerusalemullo) timmuarpok, ilagêktullo salutinamigit, Antiochiamut atersârpok.

²³ Tagvanelo uvlerᴋârdlune atausiungitunik, aularpok nuna Galâtsia arvertarvigilugo, Frîgialo kingorlerêktidlugik, okpertullo ilûnaita nakoksitipait.

²⁴ Jûdele Efêsusemut tikipok, Apollusemik atilik, Aleksandriame inûlertok angut oᴋaloriktoᴋ, aglangniglo ilisimatsiartok.

²⁵ Tâmna Nâlekab ajoᴋertûtânik ilanganik ajoᴋertortaulaukpok, anerneᴋarlunelo ilungertortomik oᴋâlavok, ajoᴋertuiloriklune Nâlegak oᴋautigilugo, Johannesible baptijutâ ᴋaujimajatuarivlugo.

²⁶ Tâmna sivôranane oᴋâlalerpok katimavingme. Akvilable Prisillablo tusaramikko, ingmingnut pitipâk ajoᴋertorluarlugolo Gûdib ajoᴋertûtanik.

²⁷ Achâjamulle aijomangmat, ᴋatangutigêt aglaklutik okpertut perᴋovait ilaliortauᴋovlugo; tagvungalo pigame, okpilertut (Gûdib) saimarsautânut angijomik ikajorpait.

²⁸ Jûdit pitsartunermut oᴋausiksairutigamigit, ilûnatik tusâtilugit aglangnik ᴋaujitipait Jêsusemik Kristuseojomik.