Apostelit Piniarningit 17 - Labrador Inuttitut Heritage Bible

Paulusib oᴋâlaninganik Tessalonikame, Berêame Atênemelo.

¹ Amfipolis apᴋotigigamikko Apolônialo, Tessalônikamut pivuk; tagvane Jûdit katimaveᴋalaukput.

² Paulusib itervigivait ilusimitut, oᴋâlavigivlugillo Sabattine pingasune aglait atuarlugit.

³ Tukeᴋartipaillo tâpkonunga, unertuivlune Kristusemik âniatitaujariaᴋalauktomik, toᴋungajunillo makitsariaᴋalauktomik; Jêsuselo tâmna (oᴋarpok) oᴋautigijara, Kristuseongmat.

⁴ Ilangillo okpilerput, Pauluse Silaselo ilagilerdlugik; Grîkittauᴋ Gûdemik nâlektut unudlalauᴋput, arnattauk angajoᴋaunersat ikitôlungitut.

⁵ Jûdille okpingitut ningarosulerput, angutillo ilangit iluluktoksuit kassêtut ingmingnut katitipait, ileratsâdlarᴋovlugit pikablâtilaitalo iglugasaksoarmiut, Jasonib iglungata silatânut pivut, pinasuarpullo tâpkoa âtsomavlugik inuit akornganut.

⁶ Naninginamikigle, Jason okpertullo ilangit aularupait iglugasaksuit angajoᴋânginut nipliadlarlutiglo: Inûk ipkua silaksûb inunginik tamainik asserorterijuk tamaungarivuk.

⁷ Tâpkoa Jasonib ingminut itertilaukpak; tâpkoalo ilûnatik ataniviksûb perᴋojangit malingilait, oᴋarlutik taipsoma asiagôᴋ ataniviongmat, Jêsusegôk.

⁸ Uimajârtidlarpaille inuit, iglugasaksuillo angajoᴋângit, tamattominga tusartut.

⁹ Jasoniblo ilagijangitalo akiorningit tusaramigit, aularᴋovait.

¹⁰ Unnuamele ᴋatangutigêt Pauluse Silaselo erinesârdlugik aulartipakit Berêamut. Tagvunga pigamik, Jûdit katimavinganut iterpuk.

¹¹ Tâpkoa ajunginerojut Tessalônikamiunit; oᴋautsillo ilaliorpait ᴋunutuidlutik, uvlullo tamaita atuarpait ᴋenerdlutik taimaingmangâta (Paulusib oᴋausingititut).

¹² Tâpkonangat unuktut tagva okpilerput, ikitôngituttauk Grîkit angajoᴋaunersat angutillo arnallo.

¹³ Jûdille Tessalônikamiut tusaumaleramik, Gûdib oᴋausingit Berêametauk oᴋâlatigijaungmatta Paulusemut, ᴋaivut, tagvanelotauk inuit pikablâtilugit.

¹⁴ Katangutigêlle tagva tuavidlutik Pauluse aulartipât, imânut ailerᴋovlugo, Silasele Timôteuselo tagvanêlerpuk.

¹⁵ Paulusible ᴋanilârtingita âpât Atênemut. Oᴋarᴋongmagillo Silasemut Timôteusemullo, tuavilutik tikerᴋovlugik tâpsomunga, utilerivut.

¹⁶ Atênemele Paulusib utaᴋileramigik, ilungertudlalerpok anernermigut, iglugasaksoarmiut tautugamigit Gûdeungitunik angijomik nâlektut.

¹⁷ katimavingmelo Jûdit Gûdemiglo nâlektut oᴋâlavigigalloarpait, niuvervingnelo uvlut tamaita tagvunga pijut.

¹⁸ Epikurêerillo ilangit Stoikerillo Filosôfit (ilisimaneksiortit) akkerartorpât; ilangillo oᴋarput: Kaneᴋadlartok una ᴋanok oᴋauseᴋarᴋâ? Ilangille oᴋarivut: Sorlo Gûdinik takorngartanik oᴋâlajomajok; oᴋautsinik tusarnertunik Jêsusemik makitoᴋaromârtomiglo oᴋautilaungmagit.

¹⁹ Tiguvâllo, kiglisiniarvingmullo âpât oᴋarlutiglo: Tukisititaujungnaralloarpitâ ajoᴋertûtsemik nutâmik ajoᴋertûserijarnîk?

²⁰ Siutiptingnut tusarngartanik pigavit; tagva tusaromadlarpogut tamattominga, ᴋanok tukeᴋarmangât.

²¹ Atênemiulle ilûnatik, takorngartattauk tagvanêtut, nutânik kisênik oᴋauseᴋaromavlutik tusaromavlutiglo kajungilâlaukput.

²² Paulusele kiglisiniarviub ᴋerᴋane nangerpok oᴋarlunelo: Ilipse angutit Atênemiojose, tukisilerpapse ilûnaine okperluluadlarapse Gûdeungitunik.

²³ Tamâne arvertarama, tuksiarvise nautsertulaukpakka, Altârelo naipipara aglalik imâk: Gûdemut nalonartomut. Tuksiarvigijase tâmna nalojase oᴋautigivara mâna ilipsingnut.

²⁴ Gûde silaksoarmik pingortitsijok pinginiglo tamainik, Nâlegaugame ᴋilangmullo nunamullo, katimaviksoarne aggangnut sanamajune iniᴋangilaᴋ;

²⁵ Inuit agganginuttauk kivgartortaujariaᴋangilak, sumik ajoᴋsartotut; nangminek tamaita inôtingmagit anerneᴋalertilaitalo, piksanginiglo tamainik tunitjivigingmagit.

²⁶ Inugasaksuillo kinguvângoᴋatigêt tamaita pingortilaukpait aungmit atautsemit, nunaksoak ilûnât inuᴋalertilugo, sivorngagullo isumasimatigivait naliuningita sivitujariangit, ᴋanorlo ᴋaningitigijomut nunaᴋariangit;

²⁷ Nâlekamik ᴋeneriarᴋovlugit, misigilermangârmitsuk nagvârmangârmitsuglo; ungasingigalloarmatigut tamapta:

²⁸ Tâpsomane inôgapta aulavlutalo ipogut; taimaktauk oᴋarivut imgerusiortit ilangit ilipsingnêtut: Tâpsoma ilagivâtigut.

²⁹ Tagva ilaᴋarapta Gûdemik, isumajuksaungilagut Gûdioniub adsingingmago inungoak goldeojok, silbereojorlônêt, ujaraujorlônêt, inub isumaminut sanajanga.

³⁰ Naliutune inuit nalojôtilugit Gûdib kamagingitsertulaukpait; mânale inuit ilûnaita nunalingne tamaine ᴋaᴋialerᴋovait;

³¹ Uvlormik taisimalaurame, silaksoarmiunik idluarsaivlune erᴋartuijomârvingminik angutikut piniarᴋojamigut, ilûnaita okpertitsomavlugit, toᴋungajunit tupaktinamiuk.

³² Toᴋungajunit makinermik tusaramik, ilangit mitauteᴋarput, ilangille oᴋarput: Tamattominga ama tusaromavaptigit.

³³ Paulusib tâva ᴋemakpait.

³⁴ Angutille ilangita najugarivât, okpilerlutiglo; taipkoa ilangat Dionîsiuse, kiglisiniarpaktut ilangat, arnarlo Damarisemik atilik; asingitalo ilagivait.