Apostelit Piniarningit 16 - Labrador Inuttitut Heritage Bible

Paulusib piniarninginik iglugasaksoarne Asiararsungmêtune, Filippimelo.

¹ Derbemut Listramullo pivok; ahaglo tagvane ilinniartoᴋalaukpok, Timôteusemik atilingmik; anânanga Jûdiovoᴋ okpertorlo, atâtangale Grîkiojok.

² Katangutigêt Listramiut Ikôniamiullo tâmna piloriktoᴋotigivât.

³ Paulusib tâmna aiparijomagamiuk, pivâ kipivlugolo, Jûdit tagvanêtut pivlugit, ilûnatik ᴋaujimangmatta, atâtanga Grîkiongmat.

⁴ Iglugasaksoatigut ingergaramik, Apostelillo angajoᴋâllo Jerusalemêtut perᴋojanginik unertûtivlugit malerᴋovait.

⁵ Tagva ilagêktut okpernermut nakoksititauvut, unuksivalliavlutiglo uvlut tamaita.

⁶ Frîgialo nunalo Galâtsia apᴋotigigamikik, Anernermut ajunginermut inertertauvut, oᴋautsinik oᴋâlaᴋonagit Asiame.

⁷ Mîsiamulle pigamik, Bitîniakut ingergarasuarput; Anerneruble ama inerterpait.

⁸ Mîsiale sanarᴋogamitsuk, Trôasemut atersârput.

⁹ Unnuamelo tamattomane takotitjumik sakᴋertoᴋarpok Paulusemut: taimna angutaulaukpok Mazedôniamiok; tâpsoma nangerdlune tuksiarvigivâ oᴋarlunelo: Ikâlaurit Mazedôniamut, ikajortigullo!

¹⁰ Takotitjumik tâpsominga takungmat, Mazedôniamut tagva erinesulerdluta ainasuarpogut, ᴋolarnangimat, Nâlekab taikunga ᴋaiᴋungmatigut, oᴋautsinik tusarnertunik oᴋâlavigilugit.

¹¹ Trôasemit aularluta umiaktorpogut, Samotrâzialo torârlugo tikipavut, uvlublo aipangane Neapolisemut.

¹² Tagvangallo Filippimut pivogut. Iglugasaksuit tâpkoa angnerpângovut Mazedôniame, Rômiunik inulit. Uvagulle iglugasaksoarne tâpkonane uvlut ilanginik piniarveᴋarpogut.

¹³ Sabbate naliutingmat, iglugasaksuit silatânut pivogut kôngmut, tuksiarviovaktomut, ingidlutalo, arnallo tagvane katimajut oᴋâlavigilerpavut.

¹⁴ Arnarlo Gûdemik opigosuktok, Lîdiamik atilik, niuverte aupaluktanik (annorânik), Tiatîramiut iglugasaksoanginit pijok, nâletsiarpok; tâpsoma ômatâ Nâlekab angmarpâ, Paulusib oᴋausingit kamagitsiarlugit.

¹⁵ Baptitauleramele iglomioᴋatingillo, tâpsoma kaiblarpâtigut, oᴋarlunelo: Okperasugigupsinga Nâlekamut, iteritse iglumnut, tagvanêtsainarluse, katsungaitomiglo iterᴋovâtigut.

¹⁶ Tuksiarvingmulle aitiluta, arnak kivgak uvaptingnik pâᴋsivok, anernilik pijomârtuksanik oᴋasûmik; angajoᴋânelo perᴋutinik akluitipait, sivorngagut oᴋarame pijomârtunik.

¹⁷ Tâpsoma Pauluselo uvagullo ilûnânut malikpâtigut, ᴋaggudlarlunelo oᴋarpok: Gûdib ᴋotsingnerpângojub inuit ukua kivgarivait; tâpkoa oᴋautivâse apᴋomik piloringnermut.

¹⁸ Taimailiorpok tâmna uvlunik unuktunik Paulusible tamanna kiksautigivâ, ᴋeviardlunelo anernek oᴋautivâ: Jêsusib Kristusib atingane anerᴋovagit ômangat. Tagvainarlo anivoᴋ.

¹⁹ Nâlegangille tukisileramik, nerriungnitik akkilertaunermik anigormat, Pauluselo Silaselo tiguvakit uniarlugiglo niuvervingnut angajoᴋât sânganut,

²⁰ Aulatsijunullo pitipakit, oᴋarlutiglo: Inûk tâpkoa Jûdiojuk iglugasaksoarmioᴋativut tamartipait.

²¹ Ajoᴋertuivuglo ilusiksanik ilalioraksaringitaptingnik, Rômiogapta.

²² Inuillo ilûnatik pikablâtitauvut pitjutigilugik; aulatsijullo annoraijartauᴋovakit isaᴋajauᴋolâniglo.

²³ Angijomiglo isaᴋadlalauramikik, parngnanairsimavingmut pitipakit, parngnanairsimaviublo angajoᴋânganut udsertortautsiarᴋovakit.

²⁴ Taimâk perᴋojaugame, tâpsoma parngnanairsimavît ᴋamanênerpânganut pitipak, niungillo parngnanairsordlugit ᴋejuksoarmut.

²⁵ Unnuarle ᴋeteralermat Pauluselo Silaselo tuksiarpuk, Gûdelo nakoridlarpâk. Parngnanairsimavingmêᴋatingitalo tusarpakit.

²⁶ Tagvainarlo nuna sajukpiludlarpok, parngnanairsimaviub tungavinga aulataudlarlune; tagvainarlo upkuangit ilûnaita upkuêrtauvut, ᴋelarutillo ilunaita ᴋelarutjârput.

²⁷ Parngnanairsimaviuble angajoᴋânga siningminit tupakkame, parngnanairsimaviublo upkuangi tupkûêrsimajut takogamigit, saviksoane amuvâ, ingminiglo kapidlaromavlune, ᴋelaksorsimajut ᴋemânasugigamigit.

²⁸ Paulusele nipliadlalerpok oᴋarlunelo: Ilingnik pidlarniarnak, ilûnata ovanêgapta.

²⁹ Nannergoamigle ᴋaitauᴋojivoᴋ, itersârlunelo, sajulerdlunelo Paulusib Silasiblo itiganginut pâmakpok.

³⁰ Anitilugiglo oᴋautivak: Nâlegâkka, sumik piniartuksauvêk, piulijauᴋovlungâ?

³¹ Oᴋarpuk: Nâlekamut Jêsuse Kristusemut okperit, tagva piulijauniarpotit iglomioᴋatitillo.

³² Nâlekablo oᴋausinginik oᴋautivâk, iglomioᴋatingillo ilûnaita.

³³ Ingminullo pitipak, unnuab stundingane tâpsomane, kilingillo ubvarpait; baptitaulilarmelo tagvainak, ilane ilûnaita ilagilugit.

³⁴ Iglominullo itertipak, nerritilugiglo, ᴋuviasulerporlo iglomioᴋatine ilagivlugit, Gûdemut okpilerame.

³⁵ Kaulermallo aulatsijut iglugasaksuit kivgangit tilivait, oᴋarlutiglo: Inûk tâpkoa aularlik.

³⁶ Parngnanairsimaviublo angajoᴋângata oᴋautsit makkoa oᴋautigivait Paulusemut: Aulatsijut tiliklilaukput tamaunga, ᴋelarutjârtauᴋovlutik. Mâna anileritik, aularlutiglo ulapirsauteᴋarlutik.

³⁷ Paulusible oᴋautivait: Isaᴋadlalaukpâtiguk inuit takoane, kiglisiniaranuglo, Rômiôgalloartoguk, parngnanairsimavingmullo pitilunuk, mânalo sagvangitome aularᴋovâtigûk? Aukagle, nangminek anititsartorlitiguk!

³⁸ Oᴋautsit makkoa iglugasaksuit kivgangita oᴋautigivait aulatsijunut; tusaramiglo Rômiôjungnik sivôralerput,

³⁹ Kaivullo manigotijomik oᴋautivlugik anitipakit, tuksialâniglo, iglugasaksoarnit aularᴋovlugik.

⁴⁰ Tagva parngnanairsimavingmit anivuk, pulâriartorlutiglo Lîdiab iglunganut; ᴋatangutigêllo takolauramikit manigulaitalo, aularpuk.