Apostelit Piniarningit 15 - Labrador Inuttitut Heritage Bible

Apostelit oᴋaᴋatigêngninginik Jerusaleme kipineᴋ pivlugo-Paulusib ajoᴋertuijartorlune ingerganersoangata aipanga, Silase aiparivlugo, Antiochiamit (Sîriamêtomit) Asiararsungmut Europamullo. (Kap. 15:36–18:22) Paulusib Barnabasiblo aviningangnik.

¹ Ilangillo Jûdeamit atersârput ᴋatangutigêllo ajoᴋertorpait: Kipijaulingikupse, Môsesib ilusinga atorlugo, piulijauniangilase.

² Pikablâdlartoᴋalermat, Paulusiblo Barnabasiblo mikijôngitomik akkerartormatikik, nâmagivât, Pauluselo Barnabaselo, asingillo ilangit Jerusalemut majorarᴋovlugit Apostelinut angajoᴋânullo, tamanna apersût pivlugo.

³ Ilagêktunullo ᴋanilârtauvlutik apᴋome, Fenîzialo Samârialo apᴋotigivakit, tagvanelo unipkârput nalojut sâgiarninginik, ᴋatangutigêllo ilûnaita angijomik ᴋuviasuktipait.

⁴ Jerusalemullo tikingmatta, ilagêktut, Apostelillo angajoᴋâllo takongiupait, unipkârpullo, ᴋanok angijomik Gûde pinialaungmat tâpkungnûna.

⁵ Tagva Farisêerit ilangit okpertut nikovilutik oᴋarput: (Inuit taipkoa) kipijaujariaᴋarput, oᴋautjaujariaᴋarlarmiglo Môsesib perᴋojanginik malerᴋovlugit.

⁶ Apostelille angajoᴋâllo katimalerput oᴋautsit ukua nautsertorlugit.

⁷ Akunille akkerartulaungmatta, Pêtruse nikovipok oᴋautilugillo: Ilipse angutit ᴋatangutigêt, ᴋaujimavose nutaujungnailertomik Gûde akunaptingne anerosulaurame, nalojut tusarᴋovlugit ᴋanimnit oᴋautsinik tusarnertunik, okperᴋovlugit.

⁸ Gûdiblo, ômatinik ᴋaujimajub, nalunaililaukpait, Anernermik ajunginermik tunitsivigilauramigit uvaptitut.

⁹ Adsigêngitomiglo uvaptingnut tâpkonungalo pititsilaungilak, ômatingillo sujungaitilaukpait okpernermut.

¹⁰ Sôk mâna Gûde oktorpisiûk, ilinniartut ajornartoksoarmik ilitjivigijomavlugit, atâtagijaptalo uvagullo sapidlalauktaptingnik.

¹¹ Okperpogulle, piulijauniarapta Nâlekab Jêsusib Kristusib saimarsautânut, taipkotitunak.

¹² Tagva inugiartoksuit ilûnatik nipangerput, Barnabaselo Pauluselo nâlegiarlugik, unipkârtuk ᴋanok angijunik nalunaikutaksoarnik tatamnartuniglo Gûde pinialaungmat tâpkingnûna nalojut akorngane.

¹³ Oᴋarêrmanik tâpkoa, Jakôbuse kiolerpok oᴋarlunelo: Ilipse angutit ᴋatangutigêt, nâleksinga:

¹⁴ Simon unipkâlaukpok, ᴋanok Gûdib nalojut isumagilaungmagit, nalipsatainarlugit, tâpkonangat inungnik ilaliulaungmat aterminut.

¹⁵ Tamattomingalo nalautaijut oᴋausingit nalautsivut, imâk aglaksimangmat:

¹⁶ Tamattoma kingorngagut uteromagivunga, Dâvidib iglunga imiksimajok sananiardlugo, aserorningillo idluarsaromavakka nappartilugillo.

¹⁷ Inuit amiakut Nâlekamik aperᴋuteᴋarᴋovlugit, nalojut ilûnatik atimnik taisiviojut; Nâlegak oᴋarpok, tamakkoninga tamainik piniartok.

¹⁸ Gûdib piniarnine tamaita ᴋaujimavait silaksûb pigiarninganit.

¹⁹ Taimaimat isumavunga nalojut Gûdemut sâgiartut kappiasuktitaksaringinaptigik;

²⁰ Aglagvigilugille Gûdeungitut salumainarninginik perᴋonagit, arnaniarᴋonagillo anguniarᴋonagillônêt; ipimajomiglo aungmiglo nerriᴋonagit.

²¹ Itsaksoarnit Môsesib oᴋausinginik oᴋautjijoᴋarmat iglugasaksoarne tamaine, Sabbatinelo tamaine atuarpait katimavingne.

²² Apostelillo angajoᴋâllo ilagêktullo ilûnatik idluarilerpât, angutik magguk ilamingnit ᴋenerlugik tililâniglo Antiochiamut, Pauluselo Barnabaselo ilagilugik ukua: Jûdase Barsabasemik atipsâlik, Silaselo; tâpkoa angutik ajoᴋertuijôvuk ᴋatangutigêt akorngane.

²³ Aglangniglo (aglaktamingnik) naksarᴋovait, imailijunik: Uvagut Aposteliojogut, angajoᴋâllo, ᴋatangutigêllo salutipavut ᴋatangutigêt nalojunit pijut, Antiochiamêtut, Sîriamêtullo, Zilîziamêtullo.

²⁴ Tusalaurapta, uvaptingnit pijut ilangita ajoᴋertûsermingnut tamartitsartormase, tarniselo aserortilugit oᴋarlutiglo: Kipijaujuksauvose, perᴋojallo maliklugit; uvaptingnut taimâk perᴋojaungigalloaramik;

²⁵ Taimaimat katimavluta isumaᴋaᴋatigêkpogut, angutingnik anerosukluta, tilivlugiglo ilipsingnut, nagliktavut Barnabase Pauluselo ilagilugik.

²⁶ Angutik tâpkoa (Barnabase Pauluselo) inôsitik ivlerilaungilâk Nâlegapta Jêsusib Kristusib atinga pivlugo.

²⁷ Tagva Jûdaselo Silaselo tilivavut, tâpkoa oᴋautsinuttauk tamattominga oᴋalârpuk.

²⁸ Anernerub ajunginerub uvagullo tamanna idluarigaptigo, asinginik maligaksanik ilipsingnut ilijinata, makkoninga pijariaᴋartunik kisênik:

²⁹ Tunergutinik Gûdeungitunut, aungmiglo, ipimajomiglo êsijuksaungilase, arnaniaraselo anguniaraselônêt; tamakkoninga pingikupse, idluartomik pivose. Inôtsiarpagitse!

³⁰ Tâpkoa tilijaumagamik, Antiochiamut pivut, inugiartoksuillo katitipait, tunitsivigilaitalo aglangnik tamakkoninga.

³¹ Tamakkoa atuaramigit, manigortaunek ᴋuviasûtigilerpât.

³² Jûdasiblo Silasiblo nalautaijôjuktauk, ᴋatangutigêt kaiblarpait oᴋautsinut unuktunut, nakoksitilaitalo.

³³ Tagvanelo mulukasalaungmanik, okpertoᴋatigênut ulapirsauteᴋarlutik angergarᴋojaulerpuk Apostelinut.

³⁴ Silasible idluarivâ tagvanêtsomavlune.

³⁵ Paulusele Barnabaselo Antiochiame piniarpuk, asitiglo unuktut ilagilugit ajoᴋertuivut oᴋâlavlutiglo Nâlekab oᴋausinginik.

³⁶ Uvlulle ilangit nângmatta, Pauluse Barnabasemut oᴋarpok: Ailaungmiluk, ᴋatangutivut takojartorlugit iglugasaksoarne ilûnaine, Nâlekab oᴋausinginik oᴋâlavigilauktaptingne, ᴋanok ilingangmangâta.

³⁷ Barnabasele isumaᴋarpok, ilagigumavlugo Johannese Marᴋusemik atipsâlik.

³⁸ Paulusible idluarivâ, taimaitok ilagigumanago, tâpkoninga ᴋemailauktok Pamfîliame, ingergaᴋatiginagiglo piniarviksamut.

³⁹ Angijomik akkerartortigêgamik, avipuk; Barnabasib Marᴋuse aiparilerpâ, umiaktorlutiglo Ziprusemut.

⁴⁰ Paulusible Silase aiparilugo aularpuk, Gûdib saimarsautânut perᴋojauvlutik ᴋatangutigênut.

⁴¹ Ingergalerporle Sîrialo Zilîzialo apᴋotigilugik, okpertôᴋatigêllo nakoksitipait.