Apostelit Piniarningit 14 - Labrador Inuttitut Heritage Bible

Paulusib Barnabasiblo Ikôniamênîgingnik, Listramelo Derbemelo. Uternîgingnik Antiochiamut Sîriamêtomut.

¹ Ikôniamelo itiᴋatigêkpuk Jûdit katimavinganut; oᴋâlangmaniglo, unuktoksuit Jûdit Grîkillotauk okpilerput.

² Jûdille okpingitut aulatidlarpait ningarosuktilaitalo nalojut tarningit ᴋatangutigênut.

³ Tagvanêlerpuk akunit, sivôranatiglo oᴋâlavuk Nâlekamik; tâpsoma oᴋautsit saimanerminik okpernartipait, nalunaikutaniglo tatamnartuniglo pivok tâpkoa aggangitigut.

⁴ Unuktovaksuille iglugasaksoarmiut maggoilivut, ilangita Jûdit ilagivait, ilangita Apostelit.

⁵ Perajaludlalermattale nalojullo Jûdillo angajoᴋâtik ilagilugit, mitautikumavlugillo miloromavlugit ujarᴋanut,

⁶ Tamattominga tukisigamik, ᴋemâvuk iglugasaksoarnut Likaôniamêtunut, tagva Listramut Derbemullo, nunablo tâpsoma erᴋânut;

⁷ Tagvanelo oᴋautsit tusarnertut oᴋâlautigivait.

⁸ Listramelo anguteᴋalaukpok iksivainartomik, itigalukkame inûlernerminit, pisujuitôtsainartomik.

⁹ Pauluse oᴋâlangmat, tâpsoma tusarpâ; (Paulusible) takosaramiuk, misigilerlunelo, tâmna okperalloarmat âᴋiktauniarnerminik,

¹⁰ Niperᴋortovlune oᴋarpok: Nikovidlutit nangerit. Kigertarpoᴋ tagva, arvertalarmelo.

¹¹ Inuille Paulusib pijanga takogamitsuk, niplialerput, oᴋarlutik Likaôniamiut oᴋausingit atorlugit: Gûdit inuktitunilivlutik akᴋarvigivâtigut.

¹² Barnabaselo atserarpât Jupiteremik, Pauluselo Merᴋuriusemik oᴋâlajioluarmat.

¹³ Jupiterible iglugasaksuit silatânêtub ajoᴋertuijungata tuktuvait tâpkoalo niaᴋôtiksangit âpait itertarvianut, tunergutigijomavlugit, inuit ilagilugit.

¹⁴ Aposteligle Barnabasib Paulusiblo tamanna tusaramikko, annorâtik alikpait, akpangerlutiglo inuit akornganut, nipliadlalerpuk,

¹⁵ Oᴋarlutiglo: Angutaujose, sôk taimailiorpisê? Inutuinauvoguk toᴋojomârtoguk ilipsitut, oᴋautsiniglo tusarnertunik oᴋâlavojuk ilipsingnut, sâgiarᴋovluse ômangat Gûdeungitomit Gûdemut ômajomut, ᴋilangmiglo nunamiglo, imarbingmiglo iluanêtuniglo tamainik pingortitsijomut;

¹⁶ Tâpsoma naliutune anigortune nalojut tamaita isumamingnik inônialauktut kamagingitsertorpait.

¹⁷ Taimaigalloarmat, ingminik nalonartilaungilak, unuktunik ajungitulivigigamitigut: silaloᴋojivlune ᴋilangmit, perorsiallo perorᴋovlugit, tunitjivigivlutalo nerᴋiksaptingnik, ᴋuviasungnermiglo ômatiptingne.

¹⁸ Taimaglo oᴋaramik inuit inerterlugit serlaᴋ ajulingilait, tunergutinik tunijerᴋonagit.

¹⁹ Jûdille Antiochiamit Ikôniamillo tagvunga pivut, inuillo kajungersarpait, Pauluse milortauᴋovlugo ujarᴋanut, unialâllo iglugasaksoarnit, toᴋonasugilugo.

²⁰ Ilinniartulle ilumangmatsuk, nikovipok ailunelo iglugasaksoarnut. Kaungmallo tagvangat aularpok Barnabase aiparilugo Derbemut.

²¹ Iglugasaksuillo tâpkoa oᴋautsinik tusarnertunik oᴋâlavigivait, unuktullo ajoᴋertulauramikik, ama uterivuk Listramut, Ikôniamullo Antiochiamullo (Pisîdiamêtomut),

²² Ilinniartut tarningit nakoᴋsitipait, kaiblalaitalo okpernermik sorairᴋonagit, kappianartullo unuktut atorlugit Gûdib nâlegauvinganut pijuksaugapta.

²³ Ilagêktullo ilûnaita ajoᴋertuijunik pitipait, tuksiarlutiglo nerritailivlutiglo, Nâlekamut okperijanganut saputijauᴋovait.

²⁴ Pisîdialo apᴋotigilugo Pamfîliamut pivuk.

²⁵ Oᴋautsiniglo oᴋâlavuk Pergame, Attâliamullo atersârpuk.

²⁶ Tagvangallo umiaktorpuk Antiochiamut (Sîriamêtomut) perᴋojauvigilauktamingnut piniarnermik mâna nâmaksijamingnik Gûdib saimarsaininganut.

²⁷ Tagvungale pigamik, ilagêktut katersorᴋolerpait, unipkârlutiglo Gûdib piniarnersoanganik tâpkungnûna, ᴋanorlo nalojunut okpernerub upkuanga angmartilaungmago.

²⁸ Ilinniartulle najugarivlugit tagvanêlerpuk akunit.