Apostelit Piniarningit 13 - Labrador Inuttitut Heritage Bible

Paulusib ajoᴋertuijartorlune ingerganersoangita sivorlingat, Barnabase aiparilugo, Antiochiamit, Sîriamêtomit Asiararsungmut. (Kap. 13; 14 lo.) Zipruseme Antiochiamelo Pisîdiamêtome oᴋâlavuk.

¹ Antiochiamele ilagêktune nalautaijoᴋalaukpok ajoᴋertuijoᴋarlarmelo; tâpkoa tagva Barnabase, Simonelo, Nigeremik taijak, Luziuselo Zirênemiok, Manahenelo, Herôdesib ataniub inugoijaumaᴋatinga, Sauluselo.

² Tâpkoa Nâlekamik kivgartortilugit nerritailivlutik, Anernek ajunginek oᴋarpok: Barnabaselo Sauluselo ingmigolingatilersigik, piniarnermut tamattomunga anerilaurapkik.

³ Tagva nerritaililutik tuksiarput, aggangmingnullo patingmivlugik tilivakit.

⁴ Tâpkoa Anernermut ajunginermut tilijaungmanik, Seluziamut pivuk; tagvangallo umiaktorpuk Ziprusemut.

⁵ Salamisemullo pigamik, Gûdib oᴋausinginik oᴋâlavuk Jûdit katimavingane. Johanneseletauk ilagivâk, kivgarivlugo.

⁶ Kikertarlo ingergavigilauramitsuk Pafose tikilugo, angakok naipipât, nalangaidlune nalautaijoᴋ, Jûdiojok, Barjehumik atilik.

⁷ Tâmna nunab atanertanganêpok, Sergiuseme Pauluseme, anguteme silatujome. Tâpsoma Barnabaselo Sauluselo ᴋaiᴋovak Gûdib oᴋausinginik tusaromavlune.

⁸ Elimasible angakub (taimak attek tâmna tukkeᴋarmat) akkerartorpak, nunab atanertanga okperᴋojomanago.

⁹ Saulusible, Paulusemiktauk taijab, Anernermik ajunginermik angijomik ilumertaujub takosarpâ,

¹⁰ Oᴋarlunelo: Kitorngaujotit Sâtanasemut, saglotunermiglo, uivêriklernermiglo ilumiuteᴋadlartotit, idluarnerniglo tamainik ômisuktotit, soraingilatit Nâlekab apᴋosiningit idluartut atortauningit agviarlugit;

¹¹ Mânalo ahâk, Nâlekab aggangita ᴋolangiarpâtit, tautugungnairtuksauvotit, seᴋinerlo akunit tautungniangilat. Tagvainarlo pujoksoamêlilarmelo (sorlo) târmiolerpok; maungatuinarlo ᴋenerialerpok tassiortiksaminik.

¹² Nunab atanertanga tamattominga takogame, okpilerpok, Nâlekablo ajoᴋertutâ tataminiarivâ.

¹³ Paulusele najortingillo Pafosemit umiaktoramik, Pergamut pivut Pamfiliamêtomut. Johannesible ᴋemakpak, Jerusalemullo angergarmilune.

¹⁴ Tâpkoale Pergamit aularivuk, Antiochiamullo Pisidiamêtomut pivlutik; tagvanelo katimavingmut iterpuk Sabbatib uvlungane, ingilutiglo.

¹⁵ Perᴋojat nalautaijullo atuarêramigit katimavingme angajoᴋaujut oᴋautjaujartorᴋovait: Katangutigêt, sumik oᴋaromagupse inungnut, kaiblaromavlugit, tâva oᴋaritse.

¹⁶ Tagva Pauluse nikovipok, aggangminullo nullorarpait Ilipse angutit Israêlitiojose, Gûdemiglo sivôrajose, nâlagitse!

¹⁷ Inuit ukua Israêlitit Gûdingata atâtagijavut anerilaukpait, inuillo tâpkoa ivlernartilaukpait, takorngartaulaungmatta nuname Egipteneme; taikangallo anitilaukpait talermut pitsartujoksoarmut.

¹⁸ Jârillo 40 it nâvlugit iluserivalauktangit kamagingitsertorpait inuᴋajuitomêtilugit.

¹⁹ Inuᴋatigêllo 7 it nungupait Kanaanib nunangane, nunangallo avikpâ imeraut atortauᴋolugo.

²⁰ Kingorngane jârit 450 it nâvlugit idluarsaijunik tunitjivigivait, nalautaijok Samuêle tikidlugo.

²¹ Tamattomalo kingorngagut atanermik tuksiarput. Gûdiblo Saulemik tunitjivigivait, Kisib erninganik, angut Benjaminib kinguvânginit, jârit 40 it nâvlugit.

²² Tâmnalo atanioᴋojungnairamiuk, Dâvide ataningortipâ tâpkonunga, tâpsominga kigligiutjivok imâk: Dâvide nagvârpara, Jessib erninga, angut ômatima idluarijanga, tâpsoma perᴋojakka tamaita maligomârpait.

²³ Tâpsoma kinguvânginit Gûde, angernine maliklugo, Israêlib piulijiksanganik Jêsusemik sakᴋijârtitsilaukpok.

²⁴ Tâmna ajoᴋertuirᴋârtinago, Johannese oᴋâlavok baptijumik Israêlitit ilûnatik ᴋaᴋialerᴋovlugit.

²⁵ Johannesible, inôᴋojaujutigijane nâmaksitileramiuk, oᴋarpok: Taimnaunasugijapsinga taimnaungilanga: ahâgle kingunipkut ᴋainiarpok, nalopᴋotivigijara itigagutîgik singêjarlugik.

²⁶ Ilipse angutit ᴋatangutigêt, Abrahab kinguvângita ᴋitorngangit, Gûdemiglo sivôrajut ilipsingne, oᴋautsit piulijaujutiksamik tamattominga tilikliutjauvut ilipsingnut.

²⁷ Jerusalemêtut angajoᴋângitalo ilitaringinamigit Jêsuse nalautaijullônêt oᴋausingit, atortauvaktut Sabbatine tamaine, toᴋotaksangortipât, nâmaksitilugit taipkoa oᴋausingit.

²⁸ Nagvârlungigalloardlutik toᴋotsitiksangonermik, Pilatuse tuksiarvigivât toᴋotserᴋovlugo tâpsominga.

²⁹ Tamaitalo tâmna pivlugo aglaksimajut nâmaksitinamigit, ᴋejungmit akᴋartipât ilivlugolo iluvermut.

³⁰ Gûdible tupaktilaukpâ toᴋungajunit.

³¹ Uvlunelo unuktune takojauvok Galilêamit Jerusalemut majoraᴋatigilauktaminut; tâpkoa kigligiutsijoᴋotigivait inungnut.

³² Uvaguttauk angersimanek atâtagijaptingnut pijok oᴋautigivavut ilipsingnut.

³³ Uvaptingnut, taipkoa ᴋitornganginut, Gûdib (angersimanek tamanna) nalautsimatilaukpâ, Jêsuse tupaktinamiuk; taimaktauk aglaksimavok imgerutime 2 me: Ernerivagit, uvlome ernetârivagit.

³⁴ Toᴋungajunillo tupaktinamiuk aserornartomut (iluverme) perᴋojungnairdlugo kingorngane, tamattominga imâk oᴋarpok: Dâvidib angervioninginik soᴋosijuitunik tunitjivigijomavapse.

³⁵ Taimâk pivlugo oᴋarivoktauk imgerume tâpsoma asiane: Ajunginerit (ivjornaitoᴋotit) aserornermik (iluverme) takoᴋojomângilat.

³⁶ Dâvidele, inôvlune Gûdib pijomajanganik kivgartulaurame, toᴋolaukpok, atâtagijanginullo ilijaulaukpok, aserornermiglo tukisilaukpok.

³⁷ Gûdible tupaktilauktangata aserornek tukisilaungilâ.

³⁸ Mânale angutit ᴋatangutigêt, ᴋaujilersiuk, tâpsomûna ajornernit isumangnarungnaitomik oᴋautjaulerapse, tamainillo Môsesib perᴋojanginut idluartitaujungnanginipsingnit.

³⁹ Tâpsomungale okpertok idluartitauvok.

⁴⁰ Mâna udjertoritse, nalautaijut oᴋausingit ilipsingnut nalautsilerᴋonagit imaitut:

⁴¹ Okokse, nachojoksôjose, tataminiarluselo nungutitse; inôtiluse piniarnermik pigama, oᴋautjaugalloarupse tamattominga okpitsangilase.

⁴² Jûdille aningmatta katimavingmit, nalojut ᴋenuvut, Sabbatik akorngangne oᴋautsinik makkoninga oᴋautjaujomavlutik.

⁴³ katimavingmêtut katimajarêrmatta, Jûdit unuktut Jûdioᴋataujullo Gûdemik nâlektut Pauluselo Barnabaselo malikpakit; tâpkoale oᴋautivlugillo kaiblarpait, Gûdib saimarsautânut nipingatsainarᴋovlugit.

⁴⁴ Sabbatible tuglîane iglugasaksuit inungit ilûnakasatik katimajartorput.

⁴⁵ Jûdille inuit takogamigit, ningarosudlalerput, Paulusiblo oᴋausingit akkerartorlugit, akkerartorput mitauteᴋadlarlutiglo.

⁴⁶ Paulusele Barnabaselo sivôranatik oᴋâlavuk: Gûdib oᴋausingit oᴋautigerᴋârdlugit ilipsingnut pijariaᴋalaukpok; mânale ajaktorapsigik nangminipsingniglo pijuksaungitinapse inôtsemik nâksaungitomik, nalojunut tagva sâlerpogut.

⁴⁷ Nâlekab perᴋungmatigut imâk: Nalojunut ᴋaumartiksangortilaukpagit, piulijiksauᴋovlutit silaksûb isuanut.

⁴⁸ Nalojulle tamanna tusaramitsuk, ᴋuviasulerput, Nâlekablo oᴋausingit nakorivait; okpilerlutiglo ilûnatik inôtsemut nâksaungitomut pijuksat.

⁴⁹ Nâlekablo oᴋausingit siamarterput tamattoma erᴋânut ilûnânut.

⁵⁰ Jûdille ningarosuktidlalerpait arnat nâlektut nertornartullo, angutillo angajoᴋaujut iglugasaksoarne, Pauluse Barnabaselo unangmijauᴋovlugik, pingujarpakillo erᴋâmingnit.

⁵¹ Tâpkoale itikamik sanningit katerarpait tâpkonunga, Ikôniamullo aularlutik.

⁵² Ilinniartulle ᴋuviasulerput ilumertaulilarmiglo Anernermik ajunginermik.