Apostelit Piniarningit 12 - Labrador Inuttitut Heritage Bible

Herôdesib kappiasuktitsininganik okpertunik. Jakôbusib toᴋotauninganik. Pêtrusib parngnanairsortauninganik. Herôdesib toᴋunganik.

¹ Naliutome taipsomane ataniub Herôdesib ilagêktut ilangit tiguvait kappiasuktilerdlugit.

² Jakôbusele, Johannesib angajua, toᴋopâ saviksoarmut.

³ Tukisigamelo, tamanna Jûdinut idluarijaungmat, soraingilak, Pêtruselotauk tigugivâ. Pudjusauteᴋangitunik ᴋakᴋôjaktorviub uvlungit naliusimavut.

⁴ Tigugamiuk, parngnanairsimavingmut pitipâ, udjertortauᴋolugolo sorsuktuksanut simertautijuksanut, sitamat sitamairtordlugit; isumagivâlo inungnut sakᴋertitsomavlugo aularviksiorviub uvlungit nâkpata.

⁵ Pêtruselo parngnanairsimavingme udjertortaulauktôgalloak; ilagêktulle sorairatik tuksiarutivât Gûdemut.

⁶ Herôdesiblo sakᴋertitsomangmago, unnuame taipsomane Pêtruse sinikpok sorsuktuksâk magguk akorngangne, ᴋelaksorsimavlune ᴋelaumgujanut maggoinut; udjertortuglo magguk upkuab silatâne udjertorpâk parngnanairsimavik.

⁷ Ahâglo, Nâlekab Engelinga tagvunga pivok, ᴋaumajublo parngnanairsimavik ᴋaumarsarpâ; Pêtruselo sanerâgut patikpâ tupaktilâllo oᴋarlunelo: Makisârit! Kelaumgujallo pêrput agganginit.

⁸ Engeliblo oᴋautivâ: Tapseruserdlutit itigagusilerlutillo. Taimailivok tagva. Oᴋautivâlo: Uliksuit atilugo malinga!

⁹ Anivlunelo malikpâ nalovlune Engelib nalâgut taimâk iliorvigingmago, takotitjumiglo takonasugilune.

¹⁰ Udjertortorle sivorlek aipangalo ᴋângerdlugik, upkuaksoak kikiangojok tikipâk, iglugasaksoarnut sangmijok; tâmna ingminik upkuêrpok (aniviliorlugik), anigamiglo iglut akorngatigut aivuk; tagvainarlo Engelib ᴋemakpâ.

¹¹ Pêtruselo ingminik tukisilerame, oᴋarpok: Mâna mikselingmik tukisivunga, Nâlekab Engeline tilingmago piulivlunga Herôdesib agganginit, inuillo Jûdit nerriungninginit tamainit.

¹² Taimaglo isumasilerame, Marîab, Johannesib Marᴋusemik atipsâliub iglunganut pivok; tagvane unuktut katimavut tuksiarlutiglo.

¹³ Pêtrusible silatânit upkuak avilortarmago, arnab kivgak Rôdamik atiliub nautsertoriartorpâ.

¹⁴ Pêtrusiblo nipinga ilitarigamiuk, ᴋuviasungnermut upkuêngilâ, aᴋpangerdlunele iterpok, oᴋariartorlune Pêtrusemik upkuab silatânêtomik.

¹⁵ Taipkoale oᴋautivât: Isumairutivotit. Tâpsomale soᴋoserane taimainerarpâ. Oᴋarput: Tagva Engelinga.

¹⁶ Pêtrusele ama avilortarpok; upkuêrutigamitsugle, takovât, tataminiarpullo.

¹⁷ Aggangminulle nullorarpait nipangerᴋovlugit, unipkâlerporlo, ᴋanok Nâlekab piulingmago parngnanairsimavingmit, oᴋarlunelo: Tamanna oᴋautigisuik Jakôbusemut ᴋatangutigênullo. Anivorlo tamattoma asianut aularlune.

¹⁸ Kaungmalle, sorsuktuksat mikingitomik kappiasûtigivât, Pêtruse ᴋanok ilinermangât.

¹⁹ Herôdesible ᴋeneramiuk neninagolo, udjertortut kiglisiniarᴋârdlugit âtauᴋovait (toᴋotauᴋovlugit). Jûdêamillo atersâlerpok Zesarêamut tagvanêlerdlunelo.

²⁰ Herôdesible Tirusemiut Sidonemiullo nâmaksingijutigidlarpait. Tâpkoale ilagêklutik tikipât, Blastuselo ataniub pimajinga ilanârsitinamitsuk, ᴋenuvigivât ulapᴋosertaujomavlutik; nunaᴋotimingne nerᴋiksarsiortuksaugamik ataniub nunaᴋotinganit.

²¹ Uvlormele isumasimavingmine Herôdesib annorâne atanersônerminik sakᴋertitsijut ativait, iksivautaksoarmullo ingidlune oᴋâlavigilerpait.

²² Inuille nipliavigivât: Tamadja Gûdib nipinga, inubleungitok.

²³ Tagvainak Nâlekab Engelingata annauvâ, Gûde nertungimago; ᴋopergunullo (inôvlune) nerrijaulerpok, anernangêrlunelo.

²⁴ Gûdible oᴋausingit aglivalliavlutiglo siamarterput.

²⁵ Barnabaselo Sauluselo uterpuk Jerusalemit, tunergutinik pititsijarêrᴋârdlutik, Johanneselo ilagivâk, Marᴋusemik atipsâlik.