Apostelit Piniarningit 11 - Labrador Inuttitut Heritage Bible

Pêtrusib akkiniarninganik passijaunine iteriarnine Kornêliusemut pivlugo. Ilagêt Antiochiame katersortauninginik.

¹ Apostelille ᴋatangutigêllo Jûdêamêtut tusaumalerput, nalojuttauk Gûdib oᴋausingit ilaliulermagit.

² Pêtruselo takpaunga Jerusalemut pingmat, kipimajut (Jûdit okpertut) akkerartulerpât,

³ Oᴋarlutiglo: Angutinut kipimangitunut iterpotit, nerreᴋatigivlugillo.

⁴ Pêtrusible tamakkoninga unipkautilerpait nalakârdlugit:

⁵ Iglugasaksoarne Joppeme-itunga, tuksiartilunga, uvamnik ikpigijungnairpunga, takovlungalo takotitjumik, ilitjivingmik akᴋartomik tingegautaksoatun-itomik, sitamanik terreᴋolingmik, ᴋilangmit ningititamik, uvamnut pivlune.

⁶ Iluanut takosarpunga, tukisivlungalo takovunga nunab nergjutinginik, nujuartuniglo, pâmgortuniglo, ᴋilaublo tingmianginik.

⁷ Nipemiglo tusarpunga uvamnut oᴋartomik: Pêtruse, makitit toᴋotsilutit nerrigit!

⁸ Oᴋarpungale: Aukagle, Nâlegak; nerrilaunginama sulle nachonartunik maᴋojungnartuniglônêt.

⁹ Nipible aipânik ᴋilangmit kiovânga: Gûdib ivsornarungnaititangit igvit nachonartitaksaringilatit.

¹⁰ Taimagle pingasuertorpok; ᴋilangmullo ilûnatik ama amuartaugivut.

¹¹ Ahâglo, tagvainak angutit pingasut iglub najortama silatânêlaukput, Zesarêamit tilijaulauktut uvamnut.

¹² Anerneruble oᴋautivânga, ᴋolarnanga ilagijaksarigapkit. Katangutille pingasûjortut ilagivânga, angutiblo taipsoma iglunganut iterpogut.

¹³ Taipsomalo unipkautivâtigut takolauktaminik Engelemik, iglomine nangertomik, oᴋautjiminik: Angutinik tiliklerit Joppemut, Simonelo Pêtrusemik atipsâlik ᴋaiᴋojauᴋolugo;

¹⁴ Tâpsoma oᴋautiniarpâtit oᴋautsinik, ilingnut iglomioᴋatingnullo ilûnainut piloriutiksaujunik.

¹⁵ Oᴋâlalertilungale Anernerub ajunginerub akᴋarvigivait, sorlo uvaptingnut perᴋârame.

¹⁶ Tagva Nâlekab oᴋausingit erᴋarpakka, oᴋarmat: Johannese baptisilaukpok imermut, ilipsele baptitaujomârpose Anernermut ajunginermut.

¹⁷ Gûdible ipkoa uvaptitut tunergutinik tunitjivigingmagit, okpermatta Nâlekamut Jêsuse Kristusemut, uvanga kinauvêk, Gûde inerterungnarapkô?

¹⁸ Tamanna tusaramitsuk nipangerput, Gûdelo nertorpât, oᴋarlutiglo: Tagva Gûdib nalojuttauk tunitgivigilaukpait isumatârnermik inôtsemut.

¹⁹ Siamartersimajulle kappiaktoanermingnut Stefanuse pivlugo arvertarput Fenîziamut, Ziprusemullo, Antiochiamullo, oᴋautsiniglo asianut oᴋangilat, Jûdinut kisênut.

²⁰ Akornganele anguteᴋalaukpok ilanginik Ziprusemit Zirênemillo pijunik. Tâpkoa Antiochiamut pigamik, Grîkittauᴋ oᴋarvigivait, oᴋautsiniglo tusarnertunik Nâlegak Jêsuse pivlugo oᴋâlavlutik.

²¹ Nâlekablo aggangita ilagivait, unuktoksuillo okpilerput sâgiarlutiglo Nâlekamut.

²² Ilagêktut Jerusalemêtut tamanna tusaumaleramitsuk, Barnabase tilivât Antiochiamut.

²³ Tâmna tagvunga pigame, Gûdiblo saimanersoanga misigileramiuk, ᴋuviasulerpok kaiblarlugillo tamaita pivait, ômamut ilûnânut nipingatsainarᴋovlugit Nâlekamut.

²⁴ Angut tâmna isumagiktoksôngmat, Anernermiglo ajunginermik okpernermiglo angijomik ilumertaujok. Inuillo unuktoksuit Nâlekamut pititaulerput.

²⁵ Barnabasele aularpok Tarsusemut ailune, Sauluse ᴋeneriartormilugo.

²⁶ Naipinamiuglo, Antiochiamut pitipâ. Jâremiglo iluitomik nâjivuk ilagêktune tagvane, inuillo unuktoksuit ajoᴋertorlugit; tamanna pivlugo ilinniartut Antiochiame taijauᴋâlerput Kristusemiunik.

²⁷ Uvlune taipkonane nalautaijut Jerusalemit atersârput Antiochiamut.

²⁸ Tâpkoa ilangat, Agabusemik atilik, nikovipok, nunane ilûnaine kângnartoksoaᴋaromârtomik Anernikut nalautaivlune; tamannalo nalautsivok atanivik Klaudiuse ataniotilugo.

²⁹ Iliniartulle ilûnatik kajusivut, pimingnit tujoromavlugit ajungitamingnik ᴋatangutigêt Jûdêamêtut.

³⁰ Taimailiorpullo, angajoᴋaunerojunullo tilikliutivlugit, Barnabasib Saulusiblo aggangitigut.