Apostelit Piniarningit 10 - Labrador Inuttitut Heritage Bible

Kornêliusib sâgiarninganik.

¹ Angutekalaukporle Zesarêame Kornêliusemik atilingmik, sorsuktuksat ingmigolingajut Itâliamiunik taimajut zenturiunganik, (imaipok: angajoᴋâmik sorsuktuksanut 100 inut).

² Isumagidlarlune opigosulaukpok Gûdemik iglomioᴋatine ilagilugit aitûsianiglo tunijeᴋattarpok inungnut, tuksiatsainartorlo Gûdemut.

³ Tâmna takotineᴋarpok uvlub stundingita 9 ingane; tagva Gûdib Engelinga itertok ômunga takovâ, tâpsoma oᴋautivâ: Kornêliuse!

⁴ Takosarpâle ᴋoaksârlarmelo oᴋarpok: Nâlegak, sunâ? Tâpsomale oᴋautivâ: Tuksiarnitit pikungardlutik Gûdib tusarpait, aitûtitillo isumagivait.

⁵ Mânalo angutinik tiliklerit Joppemut, Simonelo Pêtrusemik atipsâlik ᴋaiᴋojauᴋolugo;

⁶ Simonemik atilik ᴋetumaksaijok, najorpâ, imab kiglingane iglulik; taipsoma oᴋautiniarpâtit piniaraksarnik.

⁷ Engelelo Kornêliusemut oᴋartok aularmat, kivgaminit magguk, sorsuktuksallo najortigivaktame ilangat, Gûdemik nâlektok, ᴋaiᴋovait,

⁸ Unipkautivlugillo tamakkoninga tamainik, Joppemullo tilivait.

⁹ Uvlub aipangane, tâpkoa apᴋomêtilugit, iglugasaksuillo ᴋaglilermatigik, Pêtruse iglut ᴋolerpânganut majorarpok tuksiaromavlune, uvlub standingita 6 ingane.

¹⁰ Kâleramelo, sumik nerrijomavok; nerᴋiksaliormatsugle, ingminik ikpigijungnairpok.

¹¹ Kilaglo angmajok takovâ, ilitjiviglo akᴋarvigijine, sorlo tingegautaksoatut, terreᴋongitigut ᴋelaksorsimajok, nunamullo ningititaujok;

¹² Iluanêtoᴋalaukpok sunatuinarnik nunab nergjutinginik, nujuartuniglo pâmgortuniglo, tingmitjaniglo ᴋilaub atânêtunik.

¹³ Nipelo tâpsomunga imailivok: Pêtruse, makitit, toᴋotsilutit nerrigit.

¹⁴ Pêtrusele oᴋarpok: Aukagle, Nâlegak; nerrilaunginama sule nachonartomik maᴋojungnartomiglônêt.

¹⁵ Nipiblo aipânik pivâ: Gudib ivsornarungnaititangit nachonartitaksaringilatit.

¹⁶ Taimaglo pingasuertorpok; ilitjiviglo ama ᴋilangmut amuartaugivok.

¹⁷ Pêtrusele ilumine siaklilermat, takotitjut takolauktane ᴋanok tukeᴋarmangât, ahâk, angutit, Kornêliusib tilijangita, Simonib iglunga aperᴋotigivât, upkuablo silatâne nangerdlutik,

¹⁸ Nipliavut aperivlutiglo: Simone, Pêtrusemik atipsâlik, tagvanêngmangât.

¹⁹ Pêtrusible takotitaunine isumagilermago, Anernerub oᴋautivâ: Ahâk, angutit pingasut ᴋenerpâtit.

²⁰ Makitille atersârlutit ilagigikit, ᴋolarnaglo; uvanga tâpkoa tiligapkit.

²¹ Tagva Pêtrusib angutit Kornêliusemit pijut atersârvigivait, oᴋarlunelo: Ahâk, ᴋenertase uvangauvunga; suna pivlugo tamanêkisê?

²² Oᴋarpullo, Kornêliuse Zenturiôjoᴋ, angut isumagiktok Gûdemik nâlektok, Jûdit ilûnatik idluarnerartangat, Gûdemut ᴋaujititauvok Engelikut ivsornaitokut, ilingnik ᴋaikojerᴋovlugo iglominut, oᴋautsinik tusartuksauvlune ilingnit.

²³ Iterᴋolerpait tagva, siniktartilaitalo. Kaungmalle Pêtrusib aulaᴋatigivait, Joppemiullo ᴋatangutigêt ilangita ilagivât.

²⁴ Uvlublo aipangane Zesarêamut pivut, Kornêliusiblo utaᴋivait; ilanelo ilanârijanelo ᴋaiᴋovait.

²⁵ Pêtruselo iteriartormat, Kornêliusib pagrearpâ, pâmaklunelo itiganginut, tuksiarvigivâlo.

²⁶ Pêtrusible makitipâ oᴋarlunelo: Makitit, inutuinauvungatauk.

²⁷ Oᴋaᴋatigilauramiuglo, iterpok, unuktullo katimajut naipipait.

²⁸ Oᴋarvigivaillo: Nalungilase, idluangimat Jûdit ilangata takorngartat ilagikpagit, pulâriartorpagillônêt: Gûdible ᴋaujitilaukpânga, inuit naliallônêt taijaksaungimat nachonartomik maᴋojungnartomiglônêt.

²⁹ Tamanna pivlugo ᴋununanga tikipunga, ᴋaiᴋojaugama. Tagva mâna aperivapse, suna pitjutigilugo tamaunga ᴋaiᴋolaungmangâpsinga.

³⁰ Korneliuselo oᴋalerpok: Uvlut sitamat nâvlugit stunde tamanna tikilugo nerrilaungitunga, stundillo 9 ingane tuksialaukpunga iglumne. Ahâglo, tagva sâmne sakᴋertoᴋalaukpok angutemik ᴋeblertamik annorâlingmik.

³¹ Oᴋarporlo: Kornêliuse, tuksiarnitit tusartauvut, aitûtitillo isumagijauvut Gûdib sângane.

³² Tagva mâna Joppemut tiliklerit, Simonelo Pêtrusemik atipsâlik ᴋaiᴋojauᴋoleruk, tujormiojok Simonib ᴋetumaksaijub iglungane, imab kiglingane; taipsoma tikikune oᴋautilârpâtit.

³³ Tagva erinesulerdlunga tiliklerpunga ilingnut, nâmaktomiglo pivotit, tikinavit. Mâna Gûdib sângane tamapta katimavogut, tusaromavlugit Gûdib oᴋautigijauᴋojangit tamaita ilingnut.

³⁴ Pêtrusible ᴋanine angmalerpâ oᴋarlunelo: Mâna kiglilingmik tukisivunga, Gûdib inuit nalîllônêt nachogingimagit;

³⁵ Inuille sunatuinait, tâpsominga sivôrajut idluartulijullo ilaliorpait.

³⁶ Oᴋautsit taipkoa Gûdib tilikliutigilauktangit Israêlib ᴋitornganginut ᴋaujimavase, oᴋautjauᴋongmagit ulapirsaumik Jêsuse Kristusekut, ilûnatik Nâlegangatigut.

³⁷ (Kaujimavoselo) tamakkonunga Jûdêamêtut ilûnatik tikitaulaungmatta, sivorlerpâmiglo Galilêamêtut, baptijutib Johannesib oᴋautigijangata kingorngane,

³⁸ Jêsuse Nazaremiok pivlugo, Gûdib mingoalaungmago Anernermik ajunginermik pitsartunermiglo; tâmna arvertalaungmat ajungituliartorlune, inûlilaitalo ilûnaita Sâtanasemut sâlaulauktut, Gûdib najormago.

³⁹ Uvagullo kigligiutsijôvogut tâpsoma piniarnerilauktanginik Jûdit nunangane Jerusalemelo; tâmna toᴋolaukpât, nivingatipâllo ᴋejungmut.

⁴⁰ Gûdib tâmna tupaktilaukpâ uvluk pingajuangne, sakᴋertilâllo,

⁴¹ Inungnut ilûnainu-ungitok, uvaptingnulle kigligiutsijuksanut, Gûdemut sivorngagut anerimajunut, nerreᴋatigivlugolo imeᴋatigilaukpavut, toᴋungajunit makisimaningata kingorngane.

⁴² Oᴋâlaᴋolaukpâtigullo inungnut, kigligiutserᴋolutalo, Gûdib tâmna erᴋartuijuksangortingmago inôjuniglo toᴋungajuniglo.

⁴³ Tâmna nalautaijut ilûnatik kigligiutigivât, okpertut tâpsomunga ilûnatik tâpsoma atinganut isumangnarungnaitomik ajorninginit pilârmatta.

⁴⁴ Pêtruse oᴋautsinik makoninga oᴋâlatilugo sule, Anernek ajunginek ilûnainut oᴋautsinik nâlektunut pivok.

⁴⁵ Okpertullo kipimajut, Pêtruse ilagilugo tikilauktut, tataminiarput, Anernerub ajunginerub tunergutâ nalojunuttaukᴋ kovijaungmat.

⁴⁶ Tusaramigit takorngartat oᴋausinginut oᴋâlajut, Gûdelo nakoridlarlugo. Tagva Pêtruse kiovok:

⁴⁷ Imermik inerteriuteᴋarungnartoᴋarᴋâ, baptitauᴋonagit ukua, Anernermik ajunginermik ilangiutititaujut uvaptitût?

⁴⁸ Nâlekablo atinganut baptitauᴋovait. Kenuvigivât tagva uvliviojomavlutik uvlut ilanginik.