Apostelit Piniarningit 1 - Labrador Inuttitut Heritage Bible

Kristusib ᴋilaliarninganik. Matîasib Apostelingortitauninganik.

¹ Oᴋautigijakka sivorlît pijarêralloarpakka, Teôfiluse, tamakkoninga tamainik Jêsusib piniartanginik, tamangnik, piniarlunelo ajoᴋertuivlunelo.

² Uvloᴋ taimna ᴋongmuartitauvinga tikidlugo, Apostelit Anernikut ajunginikut anerijane piniaraksanginik oᴋautijarêramigit.

³ Aniatitaunerme kingorngane taipkonunga sakᴋerᴋattarpok ômardlune, okpernartut unuktut piniarlugit, takotidlunelo taipkonunga uvlut 40 it nâvlugit, oᴋaᴋatigilugillo Gûdib nâlegauvinganik.

⁴ katersoramigillo, perᴋovait, Jerusalemit aularᴋonagit, Atâtable oᴋautigilauktanganik utakerᴋovlugit, tusalauktapsingnik uvamnit, oᴋarpok.

⁵ Johannese baptisilaukpoᴋ imênarmut, ilipsele baptitaujomârpose Anernermut ajunginermut, uvlut tamakkoa sivikitomik kingorngatigut.

⁶ katimajulle aperivât oᴋarlutiglo: Nâlegaᴋ, naliutome tamattomane Israêlib nâlegauvinga âᴋigomaviûk?

⁷ Oᴋautivaille: Naliunermik stundemiglônêt ᴋaujijuksaungilase Atâtab ajugaᴋanginerminut ilingatitanganik.

⁸ Pitsartunermigle pilârpose, Anernerub ajunginerub tikilârpase; kigligiutsijigilârpapselo Jerusalemiunut Jûdêamiunullo ilûnainut, Samâriamiunullo, silaksûblo issua tikidlugo.

⁹ Taimaglo oᴋarêrame, ᴋongmuartitauvok takuksauvlune, nuvujablo nippaᴋtipâ ijinginit.

¹⁰ Kilangmullo ᴋongmuartoᴋ takunâramitsuk, ahâk, angutik magguk ᴋaᴋortangnik annorâlîk nangeᴋatigivait;

¹¹ Oᴋartuktauᴋ: Ilipse angutit Galilêamiojose, sôk nangerdluse ᴋilangmut ârlungavisê? Jêsuse tâmna, ilipsingnit ᴋongmuartitaujok ᴋilangmut, tikitsomârivoᴋ, sorlo takolaurapsiuk ᴋongmuartilugo ᴋilangmut.

¹² Jerusalemut tagva uterput ᴋakᴋamit orksoktalingmik taimajomit; tâmna Jerusalemit ᴋanitok, sivikitomik, sorlo Sabbateme pisuktoᴋarpangmat.

¹³ Iteramiglo, iglut ᴋolerpânganut majorarput tagvanêlerdlutik Pêtruselo, Jakôbuselo, Johanneselo, Andrêaselo Filippuselo, Tômaselo, Bartolomêuselo, Mattêuselo, Jakôbuselo Alfêusib erninga, Simonelo Zelôtes, Jûdaselo Jakôbusib nukâ.

¹⁴ Tâpkoa ilûnatik, adsigêktomik isumaᴋarlutik ilagêsainarput, ᴋenuvlutiglo tuksiarput, arnat ilagilugit, Marîalo Jêsusib anânanga, Jêsusiblo ᴋatangutingit.

¹⁵ Uvlunelo taipkonane Pêtruse ilinniartut akornganit nikovipok, (tagvanele katimajut 120 iulaukput) oᴋarlunelo:

¹⁶ Ilipse angutit ᴋatangutigêt, aglait nalautsijariaᴋalaukput Anernerub ajunginerub oᴋautigijangit sivorngagut, Dâvidib ᴋaningagut, Jûdase pivlugo, Jêsusemik tugusilauktut sivorlerijangat.

¹⁷ Tâmna uvaptingnut ilautitaumalaukpok, kivgaliarimaᴋatigilaukpavullo.

¹⁸ Taipsoma idluitulinerilauktame akkinganut perorsêvik pisiangotilaukpâ, ingminiglo ᴋimipok, katakamelo ᴋârpok, erchavingillo ilûnatik anivut.

¹⁹ Tamannalo tusaumajauvoᴋ Jerusalemiunut ilûnainut; tamanna pivlugo perorsêvik taimna taigivât oᴋautsimiktut Hakeldamamik, imaipoᴋ: Perorsêvingmik auktalingmik.

²⁰ Aglaksimangmat aglangne imgerutine: Iglunga inuêrutjaulerle, inuᴋaranelo ᴋammane igloᴋartomik; ajoᴋertuivingalo asianut pititaule.

²¹ Taimâk pivlugo angutit ilangat najortigitsainalauktavut Nâlegak Jêsuse anittilugo itertilugolo uvaptingne,

²² Johannesib baptisilerninganit uvlok ᴋongmuartitauvinga uvaptingnit tikidlugo kigligiutsijeoᴋatigijaksarivavut makininganik.

²³ Magguglo ingmigut pitipakit, Jôsefe Barsabasemik taijak, Justusemik atipsâlik, Mattîaselo.

²⁴ Tuksiarlutiglo oᴋarput: Nâlegak, inuit ilûnamatsiatik ômatinginik ᴋaujimajotit, nalonairuk, ukkungnangat maggungnit naliaᴋ aneringmangângne,

²⁵ Atausek pititaulerᴋovlugo kivgaunermik Apostelionermiglo, Jûdasib ᴋemaktanganik iniminut aingmat.

²⁶ Imerautigilermatikik, Mattîase sâpâ nalaudlugo; Apostelinut 11 inut tagva ilautitaulerpoᴋ.