Amos 9 - Labrador Inuttitut Heritage Bible

¹ Nâlegak takolaukpara tunerguserviub ᴋângane nangertoᴋ: oᴋarporlo: Annaulerkit napajut nuvungit, tungavingit sajuᴋovlugit; serᴋomilugillo ilûnaita niaᴋungitigut; kingorlingit tagva toᴋotsomavakka saviksoarmut; atautsemiglônêt tagva ᴋemâjoᴋarniangilak, atauserlônêt anigoiniangilak.

² Toᴋungajut ininganut ᴋerdlerutigaloarunik, tagvangat aggangma tigulârpait; ᴋilangmullo ᴋongmuaraloarunik, tagvangat pingujâromavakka.

³ Ergojigaloarunik Karmelib ᴋângane, ᴋenerlugillo tigujomavakka tagvangat; ijingmalo sânganit ijeraloarunik imarbiub erᴋâne, tagvangat ᴋuglugiarâluk perᴋojomavara, tâpsomalo kêlârpait.

⁴ Omigijimingnullo aularutijaugaloarunik, tagvangat saviksoak perᴋojomavara, tâpsomalo toᴋolârpait; ijîkalo tâpkonunga sangutitsomavâka ajortomut, ajungitomiglo pinanga.

⁵ Nâlekab Gûdib Zebaotib nuna aktormago, aukporlo tagva, tagvanelo nunalit ilûnatik kiksadlalârput; kôksoatullo kutjilârpok; kôkililermivlunelo Egiptenib kôksoangatut;

⁶ Tâmnauvok ingminut iniksarsoaliortok ᴋilangme, katigoliunganinelo tungatipâ nunamut; imarbiub imangit ᴋaiᴋovait kovilugillo nunab ᴋânganut; Nâlekamik ateᴋarpok.

⁷ Ilipse Israêlib ᴋitorngangit, uvamnut ilingalungilasê Etiopiamiut ᴋitorngangititût? Oᴋarpok Nâlegak. Tikiutjilaungilangâ Israêlikunik nunamit Egiptenemît, Filisteriniglo Kaftoremît, Siriamiuniglo Kiremît?

⁸ Ahâk, Nâlekab Nâlegaujûb ijingita nâlegauvik ajortolik takonârpât, pêjaromavaralo nunab ᴋânganit; Jâkob kinguvângit kissimik nungumarigomângituinarpakka, oᴋarpok Nâlegak.

⁹ Tagva ahâk, perᴋojijomavunga, Israêliblo ᴋitorngangit aulajârtitsomârpakka inôᴋatigêksuit ilûnatik akorngane, sorlo sanaugaksat aulajârtitaungmatta killapatâme, atausiarsuglônêlle nunamut katangniangilak.

¹⁰ Inuᴋotima idluitulijungit ilûnatik toᴋotaulârput saviksoarmut, oᴋartut: Idluinerub anguniangilâtigut agviarniangilâtigullônêt.

¹¹ Uvlorme tâpsomane Dâvidib tupersoanga oggosimajok napartitsomârpara, angmarningillo matulugit; asserorningillo napartitsomârivakka, inertorlugillo itsartut;

¹² Piksaᴋarᴋovlugit Edomib amiakunginik, oᴋarpok Nâlegak, tamattominga piniartok.

¹³ Ahâk, uvlut ᴋaivut, oᴋarpok Nâlegak, nunamik makpiterijûb angulârmago sanaugaksanik kibluijok, paunganiglo vaineliksanik tullerajârijub ᴋarngasûtiksanik ᴋarngasoijoᴋ; ᴋakᴋallo kuseromârput vainemik mamaktomik, ᴋaᴋkallo ilûnatik aukseromârput.

¹⁴ Inuᴋotimalo Israêlikut aularutijaujungit utertitsomârpakka, iglolioromârpullo iglugasaksoarnik asserortaumajunik, inigilugillo; perorsêvilioromârpullo vaineliksatalingnik, vainingalo imerlugo; perorsêvilioromârpullo, paungangillo nerrilugit.

¹⁵ Amâtsioromavakkalo nunamingnut, kingornganelo nusuktauniarungnaiput nunamingnit tunijamnit tâpkonunga, oᴋarpok Nâlegak Gûdit.