Amos 8 - Labrador Inuttitut Heritage Bible

¹ Imaitomik Nâlekab takotilaukpânga, ahâglo, amargaujak paungatalik aujanitanik.

² Oᴋarporlo: Amos sumik takovêt? Kiovungalo: Amargaujarmik paungatalingmik aujanitanik. Nâlekab tagva oᴋautivânga: Nâniksak tikisimavok inuᴋotimnut Israêlekunut; kamagingitsertoromangilakkalo kingorngane.

³ Imgerutsillo katimavingme atortut erinaloaᴋiningoromârput uvlorme tâpsomane, oᴋarpok Nâlegak Nâlegaujok; timit toᴋungajut unuktôlârput; ilûnâne egipait nipangerlutik.

⁴ Tamanna tusarsiuk, ilipse ajoᴋsartunik êsijose, aklujuniglo nuname ajulertitsijose,

⁵ Oᴋarluse: ᴋanga takᴋêlak ᴋângersimaniarᴋâ, aulaijungnarᴋovluta sanaugaksanîk? Sabbatelô, saᴋᴋijârtitsijungnarᴋovluta senaugaksanîk? Oktût efa miklilitilugo, kênaujarlo sekele akkitunersautilugo, nalâgôngitomiglo piniarluta kiktitautinut nalautsilungitunut;

⁶ Pisiniarungnarᴋovluta aklujunik silberemut, ajoᴋsartuniglo kamingnut, sanaugaksallo piunginerlukungit aulailugît?

⁷ Nâlegak angimarilaukpok Jâkob inornarninga taivlugo: Piniarningita ilangillônêt puigoromangimarikpakka.

⁸ Tamanna pivlugo nuna sajukpilâdlartuksaungilâk? Ilûnatiglo tagvane nunalit kiksartuksaungilât? Ilâ, kôksoatut kutjilârpok; kôktoᴋsôlivlune kôkilivlunelo Egiptenib kôksoangatut.

⁹ Imaitsomârporlo uvlorme tâpsomane, oᴋarpok Nâlegak Nâlegaujok; Seᴋinek nipitilârpara uvlub ᴋeterarningane, nunalo tâksilârpok uvlub ᴋerᴋane.

¹⁰ Uvloksiorviselo ablatsangortitsomârpakka kiksarnartovingortilugit, imgerutiselo ilûnaita ogguarutinut; makitiselo ilûnaita atititsomârpakka pôksajavinernik, niaᴋullo tamaita nujairlugit; ilingatitsomârparalo sorlo ernetuak oggorijaungmattut, nâningalo uvloktut allianaidlartotut.

¹¹ Ahâk, uvlut tikitsomârput, oᴋarpok Nâlegak Nâlegaujok, tilikleromârama kângnartoksoarmik nunamut, kângnartoksoarmik nerᴋiksamu-ungitok, ᴋêlernermik imiksamuᴋungitorlônêt, tusaromadlarnermigle Nâlekab oᴋausinginik.

¹² Arvertaromârpullo imarbingmit imarbingmut, avangallo ununga; utitaᴋattalutik aᴋpangilârput Nâlekab oᴋausinga ᴋenerlugo, nagvârniangilâlle.

¹³ Uvlorme tâpsomane uigasuit taututsiariktut nukapiallo ᴋaujimangeromârput ᴋêlernermut.

¹⁴ Tâpkoa angermariktut Samariab ajorninga taivlugo, oᴋartut: Sorlo mikseᴋârtomik Gudit inôngmat, Dane; imâglo: Sorlo mikseᴋârtomik ilusiojok Bersabame inôngmat; tâpkoa ilâ oggolârput, makiniarungnailutik.