Amos 7 - Labrador Inuttitut Heritage Bible

¹ Imaitomik Nâlekab Nâlegaujub takotilaukpânga: ahâglo, piglertaujaliortoᴋarpok unuktunik iviksukat kingorliksat nuitalerviata neliutilerviane; ahâglo, kingorliksat ataniub kibluititsiningata kingorngane nuitalerput.

² Imaiporlo: nunab iviksukangit nungulugit nerrijarêrmagit, oᴋarpunga: Nâlegak Nâlegaujotit, issumagijungnainilaurittôk; ᴋanok Jâko makitajungnalârᴋâ? Mikijôngmat.

³ Nâlegak nâpkigosulerpok tagva tamanna pitjutigivlugo; Tamanna pijuksaungilaᴋ, oᴋarpok Nâlegak.

⁴ Imaitomik Nâlekab Nâlegaujub takotilaukpânga: ahâglo, Nâlekab Nâlegaujub ikoma ᴋaiᴋovâ pidlautigijomavlugo; tâpsomalo itinersoak angijok nungupâ, nunalo nungunajalaukpâ.

⁵ Tagva oᴋarpunga: Nâlegak Nâlegaujotit, sorairlaurittôᴋ; ᴋanok Jâko makitajungnalârᴋâ? Mikijôngmat.

⁶ Nâlegak nâpkigosulerpok tagva tamanna pitjutigivlugo: Tamannatauk pijuksaungilak, oᴋarpok Nâlegak.

⁷ Imaitomiglo takotipânga: Ahâglo, Nâlegak nangerpok ᴋarmab, nausaikumut sanamajub, ᴋângane, nausaikumik tigumiarlune.

⁸ Nâlekablo oᴋautivânga: Amos, sumik takovêt? Akkivara: Nausaikumik. Nâlegarlo oᴋarpok tagva: Ahâk, nausaikumik ilijijomavunga inuᴋotima Israêlikut akorngane; kamagingitsertoromangilakkalo kingorngane;

⁹ Israêliblo poᴋtoningit sunairutijomârput, Israêliblo ivsornaitovingit asserortaulârput; saviksoalijarlungalo Jerobeamib ᴋitorngangit pigiaromârpakka.

¹⁰ Amazialo ajoᴋertuijok Beteleme tiliklerpok Jerobeamut Israêlib ataninganut, oᴋarᴋojivlune: Amosib akkerartortipait ilingnik Israêlib ᴋitorngangita akorngane: oᴋausingit nunab aktorpait.

¹¹ Imâk Amos oᴋarmat: Jerobeam saviksoarmut toᴋotaksauvok, Israêlelo nunaminit aularutijaulârpok.

¹² Amaziablo Amos oᴋautivâ: Takojotit, aularit, ᴋemâlutillo Jûdab nunanganut, tagvanelo nerrilerit tagvanelo nalautaivlutit;

¹³ Nalautaijungnaisârille Beteleme; ataniub tâmna ivsornaivigingmago, igloksoarlo ataniub pigingmago.

¹⁴ Amosible Amazia akkivâ oᴋarlune: Uvanga nalautaijôlaungikaloarpunga, nalautaijullônêt ajoᴋertugarilaungilânga; mianersijôvungale nergjutinik, pairᴋsijôvlungalo napârtunik;

¹⁵ Nâlekable tiguvânga mianersinermit nergjutinik, Nâlekablo oᴋautivânga: Inuᴋotikka Israêlekut nalautaivigijartorkit.

¹⁶ Taimaimat mâna Nâlekab oᴋausinga tusaruk: Oᴋarpotit, Israêle nalautaiviginiarnago pit, oᴋausîllo katangniarnago Isaab ᴋitorngangit pivlugit;

¹⁷ Tamanna pivlugo imâk oᴋarpok Nâlegak: Nuliat anguniarpaktungoromârpok iglugasaksoane, ernitillo panitillo saviksoarmut toᴋotaujomârput, nunalo avgortaujomârpok ôktûtemut; igvillo nangminek toᴋolârpotit nuname ivsornartome, Israêlelo aularutijaujomârpok nunaminit.