Amos 6 - Labrador Inuttitut Heritage Bible

¹ Kapianarmek ilimasungitut Zioneme, terliktullo Samariab ᴋakᴋangane, erᴋanartut inôᴋatigêksuit angajoᴋângit, Israêlib ᴋitorngangita aivigijangit.

² Kalnemut aileritse ulernairtuiluselo; tagvangallo Hamatemut angijomut ingeraritse; Gatemullo atersâritse Filisterit nunanganêtomut; tâpkoa pioluarᴋât nâlegauvingnit makkonangât? Miksângillo anginersauvât miksâpsingnît?

³ Ilipse ungasiktitsijose ilipsingnit uvlormik idluitomik, iksivavingmiglo idluituliviksamik ᴋanilertitsijose;

⁴ Inangavingne tôgâjane inangajose, nalajoselo nalangavipsingne, nerriluse saugâranik saukanit katimgajunit, tuktuvâraniglo tuktuvaᴋautimit;

⁵ Imgertoselo imgerusernik tukkeᴋangitunik nipjautib nippinganut ilagijauvluse; nipliajorutiliortose atoraksapsingnik Davidetut;

⁶ Vainetortose ᴋajûtanit, mingoartoselo ilipsingnik mingoarutinut pionerpânut; kiksauteᴋangitosele Josefib kapiasuktitauninganik.

⁷ Tamanna pivlugo aularutijaulârput aularutijaujunut sivorlerpânut, nalangajullo pervaludlarningat sorairomârpok.

⁸ Nâlegak Nâlegaujok ingminik taivlune oᴋarsimamarikpok, oᴋarpok Nâlegak, Gûde Zebaot: Jâkob pingijaidlarninga maᴋojugivara, igloksoangillo ômigivakka; tamanna pivlugo iglugasaksuit tamaitalo takamanêtut allaromavakka.

⁹ Pijomârporlo, anguteᴋaraloarpat 10nik iglome atautseme, toᴋojuksauvut.

¹⁰ Inûblo ilangata tigujartorpago, sauningit anitsomavlugit ikitsomavlugit, iglûblo ilulerpânganêtomut oᴋarune: Sulle ilingnêtoᴋarᴋâ? Tâmnalo aukârpat: oᴋalerpok tagva: Nipangertuinarit, Nâlekab atinga taijaksarilunginaptigo.

¹¹ Ahâk, Nâlegak perᴋojivok, iglolo angijok ᴋopaᴋadlaromârpok, iglolo mikijok annêneᴋaromârpok.

¹² Horsit pangalisôngovât ᴋairtunê? Tagvanelônêt makperteraijoᴋarniarᴋâ tuktuvangnût? Idluarsainek mumigapsiuk sungartut ilingatilugo, idluarnerublo paungangit sungârnitotut;

¹³ Ilipse sunaungitomik ᴋuviasuteᴋartose, oᴋartose: Pitsartuniptingnut nakjutâlungilagût?

¹⁴ Ahâk, inôᴋatigêksuit makititsomârpakka ilipsingnut, ilipse Israêlib ᴋitorngangit, oᴋarpok Nâlegak, Gûde Zebaot; tâpkoalo kapiasuktitsomârpâse Hamatib miksânit kôk Araba tikidlugo.