Amos 5 - Labrador Inuttitut Heritage Bible

¹ Oᴋausek tamanna tigujara ogguarutigijomavlugo pivluse tusarsiuk, ilipse Israêlib ᴋitorngangit.

² Israêlib uigasua pâlaksimavok; makiniarungnaiporlo; nunaminut egitaumavok; makititsijoᴋangilak tâpsominga.

³ Imâk oᴋarmat Nâlegak Nâlegaujok: Iglugasaksuit inungit tausendeovlutik anilauktut, hundertinik amiakoᴋalârput, hunderteovlutiglo anilauktut, tenenik amiakoᴋalârput Israêlib ᴋitornganginut.

⁴ Imâk Nâlegak oᴋarmat Israêlib ᴋitornganginut: ᴋeneritse uvamnik, tagva inôjomârpose;

⁵ Betelele ᴋenerniarasiuk, Gilgalemullo iterniarase, Bersabamullo ingerarniarase: Gilgalemêtut aularutijaujomârmatta, Betelelo suksaujungnairomârmat.

⁶ Nâlegak ᴋenersiuk, inôjomârpose tagva; ikomatut ikoâlaliaᴋiᴋonago Josefib ᴋitornganginut, nungûtsilune, ᴋamitisijoᴋarungnartinago Beteleme;

⁷ Ilipse idluarsainermik mumiksijose perortotut sungânitotut ilingatilugo, idluarnermiglo egitsijose nunamut;

⁸ ᴋenersiuk uvloritjanik killulerektunik siaktuniglo sanajok, toᴋub tagganganik ablatsangortitsijok uvlângordlugo, uvlorlo unnuaᴋtut tâᴋtungordlugo; ᴋaiᴋojijok imarbiub imanginik nunablo ᴋânganut kovilugit; Nâlekamik ateᴋartok;

⁹ Tikiutjijok asserornermik tagvainârtomik pitsartujunut, asserornek tikiᴋovlugo taluksoarnut.

¹⁰ Tâpkoa ômigidlarpait inerterijut itertarvingme, maᴋojugivâllo idluartomik oᴋâlajok.

¹¹ Tamanna pivlugo aklujut tullerajarapsigik, aᴋsârapsigiglo sanaugaksanik: igloliorpose ujarᴋanik sanasimatsiartunik, inigijaksarilungilasele; perorsêviliorpose vaineliksatalingnik kajungernartunik, vainingalle imeraksaringilase.

¹² ᴋaujimagama tapanipse unuktoksôninginik idluitulinipselo angijoksôninginik; ilipse oᴋumaiksartitsijose idluartunik, tigusijose piliusianik pingitsertorutinik, nalangaiveᴋartoselo ajoᴋsartunik itertarvingme (idluarsaivingme).

¹³ Tamanna pivlugo silatojok nipangertuksauvok naliutome taimaitome; neliumiongmat idluitok.

¹⁴ Idluitok pinago, ajungitok ᴋenersiuk, inôᴋovluse; taimaglo Nâlekab, Gudib Zebaotib, ilaginiarpâse, sorlo oᴋarapse.

¹⁵ Ajortok ômigisiuk, ajungitok ungagilugo, idluarsainerlo atortautisiuk itertarvingme; immaᴋâ Nâlekab, Gudib Zebaotib, Josefib amiakoa saimarsaivigijomârpait.

¹⁶ Tamanna pivlugo imâk oᴋarpok Nâlegak, Gûde Zebaot, Nâlegaujok: apᴋosinerne tamaine ogguadlartoᴋaromârpok, apᴋosineâlungnelo tamaine oᴋartoᴋaromârpok: Kappê! Kappê! Perorsêvilerijorlo ᴋaiᴋojomârpât kiksarᴋatauᴋovlugo, ogguarnermiglo ilisimajut ogguarᴋovlugit.

¹⁷ Perorsêvingnelo vaineliksatalingne tamaine ogguadlartoᴋaromârpok; apᴋutigiluse ingeraromagama, oᴋarpok Nâlegak.

¹⁸ Kapianarmêk ilipse, Nâlekab uvlunganik ᴋilanârtose! Nâlekab uvlunga suksarivisiûk? Tâkpok, ᴋaumaniolungilak.

¹⁹ Sorlo loevemit ᴋemâjoᴋartilugo, aklablo pârpâ, ubvalo sorlo iglomut itertoᴋartilugo ᴋarmak ajakparpâ, ᴋuglugiaralublo ᴋêvâ.

²⁰ Nâlekab uvlunga tâktuksaungilâk, ᴋaumaluganelô? Ilâ, tâktoᴋsôvlune akkisuteᴋaranelô?

²¹ Uvloᴋsiorvise ômigilugillo naggogivakka, katimaniksaselo kuksasungnartut ᴋuviagingilakka.

²² Ilâ, tunerguservigigaloarupsinga tunergutipsingnik ôtaksanik tunergutiniglo nerᴋiksanik, ilalioromangilakka; kamagijomangilakkalônêt tunergutise ᴋujalitiksat nergjutit ᴋoinijut.

²³ Pêjarᴋit uvamnit imgerutivît pervalungningit; nipjautivît erinangit tusaromanginapkit.

²⁴ Idluarsainerle kôlerle imektut, idluarnerlo kôksoatut.

²⁵ Atsivigilaukpisingâ tunergutinik ôtaksanik tunergutiniglo nerᴋiksanik inuᴋajuitome jârit 40 nâvlugit, ilipse Israêlib ᴋitorngangît?

²⁶ Ilâ, atanipse tupersoanga, inungoaliarijapselo gudingoapse uvloriangoab inigijaksanga, sanajase pivluse, erᴋsulaukpase.

²⁷ Tamanna pivlugo aularutijautitsomârpapse Damaskusib ungatânut, oᴋarpok Nâlegak, Gûdemik Zebaotemik atelik.