Amos 4 - Labrador Inuttitut Heritage Bible

¹ Oᴋausek tamanna tusarsiuk, ilipse tuktuvaujose Bâsaneme, Samariab ᴋakᴋanganêtose, tatjartose aklujunik, sêmiksijose ajoksartunik, nâleganginullo oᴋartose: ᴋaitsigitse, imiᴋovluta.

² Nâlegak Nâlegaujok angimarikpoᴋ ivsornaitoᴋsônine tungavigilugo: Ahâk, uvlut neliutijomârput ilipsingnut, aularutijomârmase erᴋiaktautinut erᴋiaktauvluse, kingorliselo ᴋargjusânut.

³ Karmablo kopisimaningitigut anijomârpose, ilûnase sivumuatsiarluse; kajusilârposelo Hârmomut, oᴋarpok Nâlegak.

⁴ ᴋaileritse Betelemut, idluituliluselo; Gilgalemullo, idluituliniselo unuksitilugit; tunergutiksase toᴋotaksat ᴋaisigik ᴋaut tamât uvlâkut, katersortapselo talimaujortoanik uvlut pingajuangne.

⁵ Tunitjititselo tunergutiksamik ᴋujalitiksamik puvertisimajomik, tunergutiniglo pijârijunik oᴋâlagitse ᴋaujijautilugillo: tamanna ᴋuviagigapsiuk, ilipse Israêlib ᴋitorngangit, oᴋarpok Nâlegak Nâlegaujok.

⁶ Tunitjivigivapselo kigutinik kupᴋealungitunik iglugasaksoapsingne tamaine, ajoksarnermiglo nerᴋiksanik inigijapsingne tamaine: sullele utilungilase uvamnut, oᴋarpok Nâlegak.

⁷ Taimaktauk silaluk tikitailitipara ilipsingnut, takᴋeᴋaraloartilugo pingasunik sulle katersoivik tikidlugo: silaluᴋartitsilaukpunga iglugasaksuit ilanginut, silaluᴋartailititsilungalo iglugasaksuit assinginut; ingmiᴋôrtartut ilangat silaluktauvok, silaluktaujorlo panertailivok.

⁸ Taimaimat nunaᴋartut iglugasaksoarne magguine pingasuinelônêt ingerarput iglugasaksoarnut atautsinut imeromavlutik, nâmaksiniaratigle: sullele utilungilat uvamnut, oᴋarpok Nâlegak.

⁹ Annauvapse panermut sapᴋarmullo; perorsêvipse vaineliksatalit napârtupselo paungatannalit orᴋsulillo unurningit ᴋopergunut sujuktauvut: sullele utilungilase uvamnut, oᴋarpok Nâlegak.

¹⁰ Nûsilingnartok tililaukpara akunapsingnut, sorlo Egipteneme pilaungmat; inôsuktose angutit toᴋolaukpakka saviksoarmut, horsiselo aularutidlarlugit; tangmârvipselo tippeâlua ᴋongmuartipara ᴋingapsingnut; sullele utilungilase uvamnut, oᴋarpok Nâlegak.

¹¹ Akunapsingne oggotitsivunga, sorlo taipsomane Gudib Sodom Gomorralo oggotingmagit, ilipselo ilingavose sorlo aumatut ikomamit pêjartaumajotut; sullele utilungilase uvamnut, oᴋarpok Nâlegak.

¹² Tamanna pivlugo taimailioromârpagit, Israêle: taimailioromârapkillo, opalungaijarit Gudît pagrearomavlugo, Israêle.

¹³ Tagva ahâk, tâmna ᴋakᴋanik sanajok, anoremik pingortitsijok, inungnullo nalonaijaijok issumagijanginik, uvlâmik tâktungortitsijok, nunablo poktoningine tullerajarijok: ate ᴋarpok Nâlekamik Gûdemik Zebaotemik.