Amos 3 - Labrador Inuttitut Heritage Bible

¹ Tusarsiuk oᴋausek mânna, Nâlekab oᴋauserijanga ilipsingnut Israêlib ᴋitornganginut, ᴋitorngarêksoarnut tamainut majorartitamnut nunamit Egiptenemit, oᴋarlunga:

² Ilipse kissipse ᴋitorngarêksoarnit tamainit nuname ilitarijatuarivapse: tamanna pivlugo idluitulinise tamaita akkiniarutigijomavakka ilipsingnut.

³ Maggûk pisuᴋatigêgungnarᴋâk angiᴋatigêksimangikunîk?

⁴ Loeve erinaloaᴋijâdlarᴋâ napârtolingme aliktoraksaᴋangikune? Loevearak nipliadlarniarᴋâ sittiminit toᴋotaᴋangikunê?

⁵ Tingmiak nigaktitaujungnarᴋâ nuname, nigarniuteᴋangipat atuinaujomik tâpsomungâ? Nigarniut ᴋangatarniarᴋâ nunamit nigartitsingikunê?

⁶ Tiptulaut nipliatitauniarᴋâ iglugasaksoarne, inuillo ᴋoaksârtinagît? Iglugasaksuit pijauniarᴋât idluitomut Nâlekab piniarnerilungitanganût?

⁷ Nâlegak Nâlegaujok sumiglônêt piniarnialungilak, kissiane angiarijane nalonaijarᴋâruniuk kivgaminut nalautaijunut.

⁸ Loeve erinaloaᴋijâdlarpok, kina erᴋsiniangilâk? Nâlegak Nâlegaujok oᴋarsimavok, kina nalautaitailijungnarᴋâ?

⁹ ᴋaujititsileritse Asdodib igloksoangine, ᴋaujititsileritse nunab Egiptenib igloksoangine, oᴋarluse: Katimagitse Samariab ᴋakᴋaksoangine, takoniarluselo pikablâjoksoarnik tagvanêtunik, oᴋumaiksartitsijuniglo tâpkoa akorngane.

¹⁰ Ilisimalungimatta idluartulinermik, oᴋarpok Nâlegak, torᴋuivut aksorotjinermik arᴋtainermiglo igloksoamingne.

¹¹ Tamanna pivlugo imâk oᴋarpok Nâlegak Nâlegaujok: Omisuktoᴋalârpok nuna ilumamariklugo pijunik: aᴋsâromârpâtillo pitsartunernik, igloksoatillo asserortaulârput.

¹² Imâk oᴋarpok Nâlegak: Sorlo mianersijûb okpatîk maggûk siutib ilangalônêt piulingmagit loevib siggunganit, taimak piulijaulârput Israêlib ᴋitorngangit iksivajut nalangaviub terreᴋoane sinigviublo akkitingine piojune Samariame.

¹³ Nâlagitse, kigligiutsileritselo Jâkob ᴋitornganginut, oᴋarpok Nâlegak Nâlegaujok, ᴋilangmiugasaksuit Gudingat.

¹⁴ Uvlorme akkiniariartoromavimne Israêlib tapaninginik tâpsomunga, Betelib tunerguservingit nelipsaromagivakka, tunerguserviublo nakjungit nakkataulârput nunamut kataklutik.

¹⁵ Annaujomârpâkalo iglo okêvik iglolo aujivik; iglullo tôgâjamit sanamajut asserolârput, iglullo unuktut nungutaulârput, oᴋarpok Nâlegak.