Amos 2 - Labrador Inuttitut Heritage Bible

¹ Imâk oᴋarpok Nâlegak: Idluitulinerit pingasut sitamallônêt pivlugit Moabe pidlartautailititsomângilara; Edomib ataningata sauningit ôngmagit maggalerijutiksangorlugit;

² Ikomamigle tilikleromavunga Moabemut, nungutsilârporlo Keriotib igloksoanginik; Moabelo toᴋolârpok pikablâdlartoᴋartilugo, ᴋaggudlartoᴋartilugolo, tiptulausijartoᴋartilugolo;

³ Idluarsaijorlo pêjaromavara akornganit, angajoᴋâksoangillo tamaita toᴋotsomavakka tâmna ilagilugo, oᴋarpok Nâlegak.

⁴ Imâk oᴋarpok Nâlegak: Idluitulinerit pingasut sitamallônêt pivlugit Jûda pidlartautailititsomângilara; Nâlekab perᴋojangit iperarmagit, tâpsomalo maligaksauᴋojangit malilungimagit, saglonermigle, atâtangita piniarnerilauktanginik malignermingnut tamartitaungmatta;

⁵ Ikomamigle tilikleromavunga Jûdamut, nungutsilârporlo Jerusalemib igloksoanginik.

⁶ Imâk oᴋarpok Nâlegak; Idluitulinerit pingasut sitamallônêt pivlugit Israêl pidlartautailititsomângilara; idluartut aulaingmagit silberemut, ajoksartullo kamiksiniutigilugit;

⁷ Anernârsulivullo nunab saningit aklujut niaᴋunginêtok pijomavlugo, sinaungaitullo apᴋutingat sangutipât; angut atâtangalo tutingnikpuk uigasungmik tâpsomingatsainak, attera ivsornaitok naggonartitsomavlugo;

⁸ Tunerguservit ilûnatik saningine inangavigivait annorât tauksiutiksaujut, gudingoarmiglo iglungane vainetorput pidlartaujut akkiliutânik.

⁹ Sivurânginele Amoriterit nungulaukpakka, tâpkoa napârtotut Sideretut poᴋtotigilaukput, sôngotigilutiglo napârtotut sitijuksajatut; paungangille asserolaukpakka pângat, amângillo unangat.

¹⁰ Majorartilaukpapselo nunamit Egiptenemit, inuᴋajuitokullo tesiolaukpapse jârit 40 nâvlugit, Amoriterit nunangat perᴋutigilugo piᴋovluse.

¹¹ Ernipselo ilangit nalautaijungortilaukpakka, inosuktupselo ilangit Gûdemut ingmiᴋôrtitangordlugit. Taimaingilâk, ilipse ᴋitorngaujose Israêlemût?

¹² Gûdemulle ingmiᴋôrtitat vainetortilaukpase; nalautaijulle inerterpase, oᴋarluse: Nalautainiarase.

¹³ Ahâk, nênertoromârpapse inigijapsingne, sorlo ᴋamutîk aksaloalîk sanaugaksanik ᴋapitanik usidlartuk nênertaungmanik.

¹⁴ Sukalisôngojorle assiojilârpok sukalinerminik, pitsartujorlo nukkiksainiarungnaipok nukkiminik, sôngojorlo piuliniangilak nangminerminik;

¹⁵ Pitiksimiglo atorpaktok nangerungnarniangilak; sukalidlartomiglo aᴋpangertok piuliniangilak nangminerminik; horsemelônêt ikimajok piuliniangilak nangminerminik;

¹⁶ ᴋoaksângaitorlo sôngojut akorngane usingavlune ᴋemâlârpok uvlorme tâpsomane, oᴋarpok Nâlegak.