तीतस् 3 - ल्होमीछ्य स्योक्केङ्गी मीजील युङे छ्यलु १-११ 1 ॱहक् च्येम्म धङ् पेम्बु घयेक्की ॱवङ्गी होक्ल देत्न हुबे कल ची गोगेन् धङ् गये लेगी ढे घयेत् तोक् झ्यीत् छ्योक् युङ् गोगेन् बेत् सीन्न हुब घयेत्ल ढेन्सो़ ॱलोङ्ज्यीत्। 2 ॱनी ॱसुल आक् ॱमो़म्बी़त् तोङ्ज्ये मीत् युङ्गेन्, ठमु झ्यीच्च्ये मीत् युङ्गेन्, मी कुरीक्तङ् डीक्पोक्म घी़न् थेक्पोक्म ॱयुङ्बोक्म झ्यीत् गोगेन् बेत्। 3 एल्ला हज्यरङ्गी मीजील ॱनोक्सम् मीप्प डस्सी खल मीत् नेङ्गेन्, गो थोम्न यो़क्केन्, धेच्च्यो ङेम्बे धेत्मो़ यो़च्चो़क्की ॱयोक्ल ॱस्योर्न ङेम्ब धङ् ठदोक् झ्यीक्केन्, च्यीक्तङ् च्यीक्ल ड झ्यीक्केन्, हुनी यङ् हज्यरङ्ल अक् ॱयोङ्गी ड झ्यीक्केन् यो़क्केन् बेत्। 4 ॱनी हीन्न अक्, हज्यरङ्गी च्यप्को़न् को़न्ज्योक् घन्दुक्मे ढीन् छ्यीय यो़प्प बेक्क, कोलीमील घन्दुक्मे झ्यम्ब छ्यीय यो़प्प बेक्क हुगो खोङ्गी तो़न्न युङ बेत्। 5 हुनी क हज्यरङ्ल छी थर्व दी इक् झ्युङ्न यो़क्केन् बेत्। हुगो हज्यरङ्गी ढङ्बु झ्यीबे ले घयेक्की झ्युङ मेम्ब, खोङ्गी थुज्यी ॱनङे लम्नी धम्बे थुगी टी़न फीच्च्य गोनी कीदु ची़त्न ॱसीम् ॱसम्ब युङल सो़न यो़क्केन् बेत्। 6 ॱनी खोङ्गी धम्बे थु हज्यरङ् घयेत्ल हज्यरङ्गी च्यप्को़न् येशु ख्रीष्ट्की लम्नी मो़त् ढाब योन ॱनङ बेत्। 7 ॱनी धम्बे थु ॱनङे धो़न् दी खोङ्गी थुज्यीगी हज्यरङ् ॱनम्बर् धक्पल तो़न्न, हज्यरङ्गी रीगो झ्यीबे फु तक्पे छी दी ॱङो़न्ने थोप्केन् हीम्बे ढीक्ल बेत्। 8 हीगी केच्च्य हीगो धक्तेन् बेत्। हुगो झ्यीनी ङे ॱनो़बल को़न्ज्योक्ल छ्य स्यक्न यो़क्केन् घयेक्की टेत् च्येत्न गये ले झ्यीक्केन् युङल रङ्गी हुदु ॱलोप्स गन्दीक्म ज्योप्च्यीत्। हीन्दुक् झ्यीन मी कुरीक्ल फेङ्गेन् बेगो। 9 घुलोक्प ॱलीम्बे केच्च्यल थुक्री चीगेन् धङ् पुबु ॱमुमी़ दुङ्ज्यी़क्की थो स्यङ् स्यक्प घयेत् धङ् छ्यो़डीम्गी ढीक्ल केच्च्यल थुक्री चीगेन् हुन्दुक् झ्यीबनी रङ् भीन दो़च्च्यीत्। हुगो फेन्दो मीप्प, घो ॱमीत् छ्यो़क्की ले बेत्। 10 छ्यो़ छो नङ्दु टुम्दा ॱस्यीक्केङ्गी मील लेन् च्यीक् लेम्म ॱङी थुक् हुल धो़न् टेत्न लप्स्य तोङ्। ॱनी हुल मत् नेन्न ॱनी, हुगोदङ् छ्य दीरङ् मत् झ्यीत्। 11 हुन्दुक् झ्यीबे मी हुगो म दीरङ् ॱहेन्ज्योक्प छ्यी़नर दीक्प झ्यीक्केल्ल ॱसोङ हीम्ब रङ्गी ॱह घोगेन् बेत्। हुगी रोरङ्गी रोरङ्ल छ्येप्प फोक्केल्ल सोगेन् बेत्। स्युक् जोबे केच्च्य १२-१५ 12 ङ गी़म्बु नीकोपोलीस् सार्ल फीन्न दो़च्च्येमे ढो़ झ्यीबेन्। ॱनी रङ् च्येल्ल ङे हीनी अर्तीमास् हीन्, टैकीकस् हीन्न अक्, च्यीक् तङ् योङ्। ॱनी हुगो रङ् च्येल्ल ॱलीत्नी, हुनी रङ् ज्योक्सी झ्यीन ङ च्याल नीकोपोलीस् सार्ल ॱस्योक्। 13 ठीम् थोङ्गेन् जेनास् धङ् अपोल्लोस् हुनी डोये यङ्ल हुबल घङ् गो़बे खोज्येत् घयेत् रङ्गी कुरीक् देन तोङ्ज्यीत्। 14 हुन्दुक् झ्यीब गो़जो़त् च्येम्म घयेत्ल हज्यरङ् छ्य स्योक्केङ्गी मी घयेक्की तीच्च्येमे ॱसीम् खुर्न गये ले झ्यीच्च्येम रङ्गी रङ्ल ॱलोप् गोगेन् बेत्। स्येन् हुगो डेबु मीप्प डस्सी युङ्गेन् बेत्। 15 हीन ङदङ् दल यो़क्केन् घयेक्की रङ्ल छ्यक्सुम् थेमु यो़दो सीगुगो। ॱनी उन छ्य स्योक्केन् ङीत्ल चीदुङ् झ्यीक्केन् घयेत्ल ङे छ्यक्सुम् थेमु यो़दो सीन्न ॱस्यो़च्च्यीत्। खीत्रङ् घयेत्ल थुज्यी थोप् थोब युङ्ज्ये यो़प्प स्योक्च्यीत्। |
© 1995 Wycliffe Bible Translators, Inc. and Nepal Bible Society
Wycliffe Bible Translators, Inc.