तीतस् 2 - ल्होमीदीम्ब च्येम्मे ॱलोप्सल डीक्पे छ्यलु १-१५ 1 ॱनी रङ् हुब डस्सी मेम्ब, रङ्गी धक्पर् च्येम्मे ॱलोप्सल डीक्पे केच्च्य ॱस्यो़च्च्यीत्। 2 ॱनी गेम्बा घयेत्ल यङ् ॱसीम्बे ॱनो़जो़क्की ॱवङ्ल ॱमीत् तोङ्गेन्, ॱम तेम्बोक्म झ्यीक्केन्, खेजो़त् झ्यीक्केन्, छ्य स्यक्पे लेमुल तेम्बोक्म दो़क्केन्, झ्यम्ब धङ् धु झ्यीक्केन् युङ् गोगेन् बेत् सीन्न ॱलोप्स ज्योप्च्यीत्। 3 ॱनी यङ् हीगो डस्सी गेम्मु घयेत्ल अक् छ्यप्स्यक् युङे लेमु झ्यीक्केन्, फालप् मीत् लप्केन्, गोङ्ज्यङ्ल ख ॱस्योर्न गज्येन् ॱमीत् थुङ्गेन् धङ् धो़न् गागी केच्च्य ॱयोङ्ल ॱलप्न टो़क्केन् युङ् गोगेन् बेत् सीन्न ॱलोप्स ज्योप्च्यीत्। 4 ॱनी हुबे हरुङ् भुमु स्यो़म्बोक्म घयेत्ल ॱलोप्च्य तो़न्ज्य झ्यीन रोरङ्सो़ छ्योबु धङ् भीज घयेत्ल च्यीब झ्यीक्केन्, 5 ॱसीम्बे ॱनो़जो़क्की ॱवङ्ल ॱमीत् तोङ्गेन्, ली़ चङ्म खुर्केन्, ढोङ्बे गेन् गस्सी खुर्केन् धङ् छ्योबी़ ॱवङ्गी होक्ल दो़क्केल्ल युङ सो गोगेन् बेत्। हुन्दुक् झ्यीन क हस्सो़त् को़न्ज्योक्की ॱसुङ्रप्ल छ्यी मी घयेक्की ॱमो़म्बी़त् तोङ् ॱमीत् छुगेन् बेत्। 6 ॱनी हुगो डस्सी स्यो़म्ब घयेत्ल अक् ॱसीम्बे ॱनो़जो़क्की ॱवङ्ल ॱमत् तङ, खेजो़त् झ्यीत् गोगेन् बेत् सीन्न ॱलोप्स ज्योप्च्यीत्। 7 रङ्गी गये लेगी ढङ् घयेत् झ्यीन हुब घयेत्ल ॱमीदे तो़न्ज्यीत्। ॱसीम् ढङ्बु खुर्न ॱम तेम्बोक्म झ्यीन धो़ङ्गी ॱलोप्स ज्योप्च्यीत्। 8 रङ्गी ॱस्येप्पे केच्च्य दील च्यो़न् मीप्प धङ् सील्लुङ् तक् ॱमीत् छुगेन् युङ् गोगेन् बेत्। हुनी क रङ्ल चो़प्प चुक्तु युङ्गेन् घयेक्की रङ्ल आक्पा घन्ड अक् सीर् ॱमीत् छुब, हुब ङु छये ॱस्यी डोगेन् बेत्। 9 रङ्मो़ मीप्पे ॱयोक्पु घयेत् रोरङ्सो़ दक्पी़ ॱवङ्गी होक्ल देत्न घन्ड झ्यीत् गो़ झ्युङ्न अक्, दक्पु गुव झ्यीत् गोगेन् बेत्। ख लोक्च्ये मीत् युङ्गेन् बेत्। 10 लक्प चङ्जो़त् झ्यीत् गोगेन् बेत्। ले घङ्गो दी इक् तेम्बोक्म दक्पु ॱलो खीब युङ झ्यीत् गोगेन् बेत्। हुनी क हस्सो़त् छ्यी मी घयेक्की इक् हज्यरङ्गी च्यप्को़न् को़न्ज्योक्की छ्यो़लु दी गस्सी हीम्ब छोर्केन् बेत्। 11 कोलीमी घयेत्ल छी थर्व युङे ढीक्ल को़न्ज्योक्की थुज्यी ॱनङ्न, येशु इगीनी थो़न्न युङ बेत्। 12 ॱनी हुगी थुज्यीगी ॱलोप्सनी को़न्ज्योक् मीत् गुवे ले धङ् जम्बुलीङ् ङो़ल यो़प्पे धेच्च्यो ङेम्ब घयेत् फङ्न, हीगी धी़ हील हज्यरङ् ॱसीम्बे ॱनो़जो़त्ल ॱमत् तङ, खेजो़त् झ्यीन दो़त् गोगेन्, ढङ्बु धङ् को़न्ज्योक् गुवे लेमु झ्यीत् गोगेन् बेत् सीर हज्यरङ्गी ॱह घो छुगेन् बेत्। 13 ॱनी छ्यीम्मु हीम्बे को़न्ज्योक् हज्यरङ्गी च्यप्को़न् येशु ख्रीष्ट् खोङ् रोरङ्गी तो़त्वङ्गी ओ़च्च्यल इगीनी मल्ल झ्यो़ङ्गेन् बेत्। हुनी हज्यरङ्गी गव च्येम्मे रीगो दी डुप्केन् बेत्। ॱनी हीगोल गुक्कीन् झ्यीन हुगी ॱलोप्स हुल नेन्न दो़त् गोगेन् बेत्। 14 हज्यरङ् घयेत् ङीब दीक्प छङ्मनी ॱलुवे ढीक्ल धङ् गये लेल मो़ब झ्यीक्केन् खोङ् रोरङ्गी मीस्सीर् हीम्ब युङल हज्यरङ् घयेत् टी़न धक्तु ची़प्पे ढीक्ल हज्यरङ् घयेक्की धो़न्दु खोङ्गी रोरङ्गी ॱरोक् च्येब बेत्। 15 हीगी केच्च्य घयेत् हीगो रङ्गी ॱहक् छ्यीजो़त् झ्यीन ॱस्यो़च्च्यीत्। नेन् गोगेन् बेत् सीन्न ॱस्यो़च्च्यीत्। लप्स्य तोङ्ज्यीत्। मी ॱसी़ इक् रङ् ॱनङ्ज्युङ्ल तोङ्ज्ये मीप्प झ्यीज्यीत्। |
© 1995 Wycliffe Bible Translators, Inc. and Nepal Bible Society
Wycliffe Bible Translators, Inc.