तीतस् 1 - ल्होमी1 ङ पावल् को़न्ज्योक्की ॱयोक्पु धङ् येशु ख्रीष्ट्की ठीक्नल हीन्। ॱनी को़न्ज्योक्की दम्बे मी घयेत् छ्य स्यक्पे लम्ल ठीक्केन्, को़न्ज्योक् गुवे छ्यलु युङ्ज्येल दीम्ब ॱह घोज्येल केच्च्य ॱस्यो़क्केन् धङ् 2 फु तक्पे छी थोप्केङ्गी रीगो तो़ङ्गेल्ल ङ को़ज्युङ्। ॱनी नम्ल अक् ॱएलम ॱमीत् ॱसुङ्गेन् को़न्ज्योक्की ॱङो़न् धङ्बी़ धी़ले एक् एल्लानी हीगी छी हीगो ॱनङे छ्यो़त्तुम् जेत्न यो़क्केन् बेत्। 3 ॱनी छ्यक्चो़त् धी़जो़त् ॱलीबे ॱङेस्स्यो हज्यरङ्गी च्यप्को़न् को़न्ज्योक्की ङल क ॱनङ्न ङे गेल्ल टेत्न यो़प्पे केच्च्य दील हुगी छीये केच्च्य हुगो थो़ङ्गेन् बेत्। 4 ङे छ्य च्यीक्की भु तीतस्रङ्ल हीगो ढीन तोङ्गो़त्। रङ्ल यप् को़न्ज्योक् धङ् हज्यरङ्गी च्यप्को़न् ख्रीष्ट् येशु च्यानी थुज्यी धङ् ॱसीम् दीव युङ्ज्ये यो़प्प तोङ्। छ्यो़ छोगी गोयो़प्पे ढीक्ल ५-९ 5 रङ् ङे क्रेट्की लुङ्बदु स्योक्च्येगी धो़न् दी हुदु ङे डुप् ॱमत् छुबे ले घयेत् दी रङ्गी डुप्न, ङे घङ् ॱङाबल पीब सार् रीदङ् रील यो़प्पे छ्यो़ छो घयेत्ल गोयो़प्प घयेत् को़न स्योक्च्येगी ढीक्ल हीन्। 6 ॱनी गोयो़प्प दील हीन्दुक् झ्यीबे मी को़ज्यीत्। ङीबे च्यो़न् मीप्प, छ्युङ्म च्यीगी च्यीक् च्येम्म, हुगी भीज घयेत् दी इक् छ्यी़री ॱस्यो़क्केन् धङ् छादल ॱस्योरे च्यो़न् मीप्प, छ्य स्योक्केन् युङ् गोगेन् बेत्। 7 हुगी गोयो़प्प दी को़न्ज्योक्की मीजङ्गी गेन् खुर्केङ्गी मी झ्यीनी, हुल ङीबे च्यो़न् मीप्प, रङ्मो़ ॱमीत् ॱस्यो़क्केन्, फोदोरोक् मीत् लङ्गेन्, च्युर्ल दङ मीत् झ्यीक्केन्, खेरक् ॱमीत् तोङ्गेन् धङ् लोप् मीत् झ्यीक्केन् युङ् गोगेन् बेत्। 8 बोर डोम्बुल गङ्ज्येन् झ्यीक्केन्, ॱसीम् गङ्ज्येन् च्येम्म, च्यङ्जो़त् झ्यीन झ्यीक्केन्, दम्ङीत् मीत् झ्यीक्केन्, ॱसीम् सङ्बु खुर्केन् धङ् ॱसीम् सुङ् छुगेन् युङ् गोगेन् बेत्। 9 ॱनी रोरङ्ल ॱलप्न टेप्पे ज्युरुव मीप्पे ॱलोप्स दील थीरी दो़त् गोगेन् बेत्। हुनी क ॱयोङ्ल आक् दीम्ब च्येम्मे ॱलोप्स ज्यप्न ॱलोप्स्यीक् टो़त् छुगेन् बेत्। हुनी चो़प्प चुक्केन् घयेक्की केच्च्य आक् ॱरोङ् छुगेन् बेत्। ॱयोङ्गोर्ल छ्यी़नर घयेक्की ढीक्ल १०-१६ 10 खल मीत् नेङ्गेन् धो़म्मीक्की तम् ॱस्येत्न ॱयोङ्गोर् ज्यक्केन् गज्येन् यो़क्केन् बेत्। ॱनी हुगो मङ्स्योल यहुदी छ्य स्योक्केन् घयेक्की घुङ्न यो़क्केन् बेत्। 11 हुन्दुक् झ्यीबे मी घयेक्की खल दक्क मत् ज्यबल मीत् युङ्गेन् बेत्। घन्ड हीन् सीन्न हुबे पयीसक् ॱसक्पे ढीक्ल ङु छय मीप्प, मीत् ओ़बे ॱलोप्स ज्यप्न च्यीक् ॱङी छ्युवक् मेम्ब, यरीदु ढोङ्बे मीजङ् दीरङ् जेङ् छ्यी़दु ची़त्न यो़क्केन् बेत्। 12 एल्ला उन क्रेट्की लुङ्बे कलुङ् ॱस्यो़क्केन् च्यीक्की रोरङ्गी लुङ्बे मी घयेक्की ढीक्ल हीन्दुक् सीन्न ॱस्येत्न यो़क्केन् बेत्। क्रेट्की मी घयेत् ॱएलम च्यङ्ज्यङ् ज्यक्केन्, सदोङ, ॱअर्स्यीय धङ् ॱसीम्ज्येन् दुक्री़ डस्सी यो़क्केन् बेत् सीन्न ॱस्येत्न दुक्। 13-14 हुगी केच्च्य हुगो खुङ्देन् बेत्। हुगो झ्यीनी हुगी ॱयोङ्गोर् ज्यक्केन् घयेत् हुबल हीन्दुक् झ्यीबे तम् ॱस्यो़त्। दीम्ब फोङ्गेन् यहुदी घयेक्की स्यङे क घयेत्ल धङ् हुबे मीत् दीम्बे यो़च्चो़क्की केच्च्य घयेत्ल मत् नेन् झ्यी। बोर दीम्ब ङो़ल छ्य स्यक्पे लम्ल लोक्लेत् सीन्न हुब घयेत्ल गन्दीक्म लप्स्य तोङ्। 15 ॱसीम् चङ्म च्येम्मे मील घन्ड दी इक् कुरीक् चङ्म ढीप् मीप्प युङ्गेन् बेत्। ॱनी धक्च्ये मीप्पे मी धङ् छ्य मीत् स्योक्केल्ल घन्ड दी इक् कुरीक् चङ्ज्ये मीप्प युङ्गेन् बेत्। ॱनी हुबे ॱसीम् दी धक्च्ये मीप्पल, सङ् ङेन् च्यो़त् ॱमीत् ॱस्यीगेन् बेत्। 16 हुबे ख दीगी को़न्ज्योक् ङु ॱस्यीगो़त् सीक्केन् बेत्। ॱनी यङ् हुबे ले घयेत् दी को़न्ज्योक् ङु ॱमीत् ॱस्यीगेन् डस्सी झ्यीक्केन् बेत्। हुगी मी हुब म दीरङ् स्यीलोक्सी, खल मीत् नेङ्गेन् धङ् गागी ले झ्यीत्तोक्पे मी दीरङ् मीप्प बेत्। |
© 1995 Wycliffe Bible Translators, Inc. and Nepal Bible Society
Wycliffe Bible Translators, Inc.