रोमी 6 - ल्होमीदीक्प ङो़ल ॱस्यीय धङ् को़न्ज्योक् ङो़ल ॱसोम्बु १-१४ 1 हीगो हीन्न ॱनी, हील हज्यरङ् घन्ड सीक्केन्? थुज्यी गज्येन् थोप्च्येल दीक्प झ्ये झ्येब दो़क्केन् ॱनी? 2 हीगो ॱस्युली मीत् युङ्गेन् बेत्। दीक्प ङो़नी हज्यरङ् ॱस्यीनर हीम्बल ॱसोङ् छर्नी, यङ् घन्दुक् झ्यीन दीक्प झ्ये झ्येब दो़क्केन्? 3 हज्यरङ् ख्रीष्ट् येशुदङ् मत् ढेबल युङ्ज्ये यो़प्पल बप्तीस्ल स्युब हुगो खोङ् ॱस्यीय हीम्बदङ् कङ्ज्यीक्प युङे ढीक्ल अक् स्युबल डोगेन् बेत्। हीगो खीत्रङ्ल ॱस्यो़च्च्ये यो़ट्टो। 4 खोङ्गी ॱस्यीवदङ् कङ्ज्यीक्प युङ्लु दी हीन्दुक् बेत्। ख्रीष्ट् ढोङ्नरनी यप्की ॱवङ्दा छ्यीम्मी़ यङ् ॱसोम्बुल ॱलोङ हीम्ब डस्सी हज्यरङ् अङ् छी ॱसम्बे लम्ल डोज्ये यो़प्पल बप्तीस्ल स्युब दीगी खोङ्दङ् दल ॱस्यीन रो बेक्सल ॱलुक् छर यो़क्केन् बेत्। 5 हुन्दुक् झ्यीन हज्यरङ् खोङ् ॱस्यीनर हीम्बदङ् छ्येत्मीत् ॱस्यीन यो़त्न ॱनी, यङ् खोङ् डस्सीरङ् ॱसोम्बुल आक् ॱङो़न्ने लोङ्न युङ्गेन् बेत्। 6-7 हज्यरङ्गी ली़सीम्ल यो़प्पे दीक्पे छङ् दी ॱरुम्न, हुनी दीक्पे ॱयोक् ज्युक् मीत् गो़बे ढीक्ल हज्यरङ्गी ॱएङ्गी ॱसीम् ॱङीङ्ब दी खोङ्दङ् कङ्ज्यीक्प कुरुस्ल तान ॱस्यीनर यो़क्केन् बेत्। ॱनी ॱस्यीन खुरे मी दीक्पे ॱवङ्गी होक्नी या ढे छर युङ्गेन् बेत्। हीगो ङीक्की ॱह घोवे केच्च्य बेत्। 8 ख्रीष्ट्तङ् कङ्ज्यीक्ल हज्यरङ् ॱस्यीन खुर यो़त्न ॱनी, खोङ्दङ् कङ्ज्यीक्लरङ् ॱङो़न्ने ॱसोम्बुल युङ्गेन् बेत्। हील ङीत् ॱलो खीन यो़त्। 9 ख्रीष्ट् ढोङ्नरनी यङ् को़न्ज्योक्की ॱसोम्बुल ॱलोङ्नी, ह हीनी झ्यीब दी खोङ्गी थोक्ल ॱस्यीवे ॱवङ् मीत् डोवल, ह खोङ् ॱस्युली मीत् ढोङ्गेन् बेत्। हीगो ओक् ङीत्ल ॱस्यो़च्च्ये यो़त्। 10 खोङ् ढोङ्ज्येगी धो़न् दी दीक्प ङो़नी फुगी ढीक्ल लेन् च्यीक् ढोङ बेत्। ॱनी ह खोङ् ॱसोम्बु यो़प्प दी को़न्ज्योक् ङो़ल यो़क्केन् बेत्। 11 हीगो डस्सी खीत्रङ् ॱअङ् दीक्प ङो़नी ॱस्यीनर हीम्ब धङ् ख्रीष्ट् येशुदङ् मत् ढेबल को़न्ज्योक् ङो़ल ॱसोम्बु यो़त् ॱनो़ब खुर्च्यीत्। 12 हुगो झ्यीनी धेत्मो़ ङेम्बे ॱवङ्ल ॱस्योर्न ॱस्यी डोगेङ्गी ली़ हील दीक्पे ॱवङ् च्योङ्दु ॱमत् ची़च्च्यीत्। 13 खीत्रङ्गी सी़गी यल्लक् घयेत् दीक्प झ्यीच्च्येल ढङ्ज्ये मीप्पे लक्च्यल ॱमत् तङ, खीत्रङ् ॱस्यीनरनी ॱसोम्बुल लोङ् छर हीन् ॱनो़ब ॱसम्न बोर खीत्रङ्गी यल्लक् घयेत् दी ढङ्बु झ्यीच्च्येल को़न्ज्योक्की घो छ्यो़प्पे लक्च्य युङ्ज्येल खीत्रङ् ॱसोस्सोरङ् को़न्ज्योक्ल पुज्यीत्। 14 खीत्रङ् छ्यो़डीम्गी होक्ल मीप्प, थुज्यीगी होक्ल यो़क्केन् झ्यीनी, दीक्पे ॱवङ् खीत्रङ्गी थोक्ल मीत् डोगेन् बेत्। दीक्प ङो़ धङ् ढङ्बु ङो़गी ॱयोक्पु १५-२३ 15 हीगो हीन्न ॱनी, घन्ड सीक्केन्? हज्यरङ् छ्यो़डीम्गी होक्ल मीप्प, थुज्यीगी होक्ल यो़प्प हीन्न ॱनी, दीक्प झ्ये झ्येब दो़क्केन् ॱनी? हीगो मेम्बेत्। 16 खीत्रङ् ॱसी़ ॱयोक् ज्युक्तु डोगुक्क हुगी ॱयोक्पु हीम्ब युङ्गेन् बेत्। ॱनी दीक्पे ॱयोक्पु हीन्न ॱनी, हुगो ॱस्यीवल ॱलीक्केन् बेत्। ॱनी यङ् को़न्ज्योक्की कल चीगेङ्गी ॱयोक्पु हीन्न ॱनी, हुगो ॱनम्बर् धक्पल तो़ङ्गेन् बेत्। हीगो खीत्रङ्ल ॱस्यो़च्च्ये यो़क्केन् बेत्। 17-18 खीत्रङ् एल्ला स्येन् दीक्पे ॱयोक्ल ॱस्योर्न यो़क्केन् बेत्। हुनी खीत्रङ्ल ॱलोप्स ज्यप्न टेप्पल खीत्रङ्गी ॱसीम्बे यीक्नी नेन्न युङ्नी दीक्पे लक्नी ढेन खीत्रङ् ढङ्बु ङो़गी ॱयोक्पुल झ्युङ्न यो़क्केन् बेत्। हीगी ढीक्ल को़न्ज्योक्ल थु छ्यी पुगेन्। 19 खीत्रङ्गी ॱह घो ॱमीत् छुबल, ङे कोलीमीगी लुसे पी डस्सी तो़न्न ॱस्यो़क्को़त्। एल्ला खीत्रङ्गी ली़गी यल्लक् घयेत् चङ्ज्ये मीप्पे ॱवङ्ल धङ् ङेम्बे ढङ्गी ॱयोक्ल तङ्न यो़क्केन् बेत्। ह हीनी झ्यीब दी खीत्रङ्गी यल्लक् घयेत् हुगो ढङ्बु ङो़गी धक्पर् युङे ॱयोक्पु युङ झ्यीज्यीत्। 20 खीत्रङ् एल्ला दीक्पे ॱयोक्ल ॱस्योर्न यो़प्पे यङ्ल ढङ्बु झ्यीत् गोगेङ्गी लेमु म दीरङ् झ्यीत् ॱमत् छुब बेत्। 21 दीक्पे ॱयोक् ज्युबे लेगी डेबु दील खीत्रङ्ल ॱस्यीव मेन्द, ॱयोङ् घन्ड अक् ॱमत् थोब बेत्। हुल खीत्रङ् हुन्दो ङु छगेन् बेत्। 22 ॱनी हुन्दो ह खीत्रङ् दीक्पे लक्नी या टेन, को़न्ज्योक्की ॱयोक्पुल झ्युङ्न यो़क्केन् बेत्। ॱनी हीगी डेबु दील धक्पर् च्येम्मे मीजी युङ्गेन् बेत्। ॱनी स्युक्ला फु तक्पे छी थोप्केन् बेत्। 23 दीक्प झ्यीनी, हुगी ॱल दील ॱस्यीव युङ्गेन् बेत्। ॱनी यङ् को़न्ज्योक्की ॱनङ्ज्येत्ल ख्रीष्ट् येशु हज्यरङ्गी चोव ज्यीन्दक्की लम्नी फु तक्पे छी थोप्केन् बेत्। |
© 1995 Wycliffe Bible Translators, Inc. and Nepal Bible Society
Wycliffe Bible Translators, Inc.