रोमी 5 - ल्होमीको़न्ज्योक्तङ् मी डीक्च्या झ्युङ १-११ 1 हुन्दुक् झ्यीन हज्यरङ्गी छ्य स्यक्प दीगी हज्यरङ् को़न्ज्योक्की ॱनम्बर् धक्पल तो़न्न चोव ज्यीन्दक् येशु ख्रीष्ट्की कुट्टीङ्गी हज्यरङ्दङ् को़न्ज्योक् जदु ची़त्न यो़क्केन् बेत्। 2 हज्यरङ् हुन्दो थुज्यी ङो़ल झ्युङ्न यो़क्केन् हीगो हज्यरङ्गी छ्य स्यक्प दीगी धङ् येशुगी कुट्टीङ्गी झ्युङ्न यो़क्केन् बेत्। ॱनी यङ् को़न्ज्योक्की तो़त्वङ् च्येम्मे ओ़च्च्यल हज्यरङ् ॱलीक्केन् झ्यीनी, हुगी रीगो हुल हज्यरङ्ल गेस यो़क्केन् बेत्। 3 हीगी गेस हीगो हुगी रीगो हुल छ्युवक् मेम्ब, दुक्प नोङे यङ्ल अक् झ्यीक्केन् बेत्। घन्ड हीन् सीन्न दुक्प नोङ्नी, हुगी गुर् थेक्पे ॱसीम् युङ्गेन् बेत्। 4 ॱनी गुर् थेक्पे ॱसीम् दीगी ज्योङ्दर् थो़क्केन् बेत्। ॱनी ज्योङ्दर् थो़प्प दीगी रीगो युङ्गेन् बेत्। 5 ॱनी रीगो दीगी ॱने फम्दु ॱमीत् ची़क्केन् बेत्। घन्ड हीन् सीन्न हज्यरङ्गी ॱसीम्ल धम्बे थु ॱनङ्न को़न्ज्योक्की झ्यम्ब दी ॱलुक्न यो़क्केन् बेत्। 6 हज्यरङ् थरे ढीक्ल हज्यरङ्गी घन्ड अक् ॱअल ॱमीत् छगेल्ल यो़प्पे यङ्ल छ्यक्चो़त् देम्बे धी़ल को़न्ज्योक् ॱमीत् ॱसम्गेन्, दीक्च्येन् घयेक्की ढीक्ल ख्रीष्ट् ढोङ बेत्। 7 मी ढङ्बी़ ढीक्ल ॱसु उक् ॱमीत् ॱस्यीगो़ट्टो। ॱनी मी गङ्ज्येङ्गी ढीक्ल यङ् यरी ज्यीब मीप्प ॱस्यीगेन् सीर् छुगो़ट्टो। 8 ॱनी हुगो डस्सी मेम्ब, हज्यरङ् मी दीक्च्येन् हीम्ब झ्यीनी इक्, ख्रीष्ट् हज्यरङ्गी ढीक्ल ढोङ बेत्। ॱनी हीगो को़न्ज्योक्की हज्यरङ्ल घन्दुक्मे झ्यम्ब छ्यीय जेक्कुक्क हुगो तो़म्बल डोगेन् बेत्। 9 खोङ्गी ठक्की हज्यरङ् ॱनम्बर् धक्पल तो़न् छर झ्यीनी, तीङ्ला को़न्ज्योक्की खोङ्डोक्की छ्येप्पे लक्नी ॱसुम्ब खोङ्गी ले ॱल्हस्सी थर्तु ची़त् छुगेन् बेत्। 10 हज्यरङ् को़न्ज्योक्की डल यो़प्पे यङ्ल खोङ्गी ॱरेबु ढोङ हीम्ब दीगी हज्यरङ्दङ् को़न्ज्योक् डीक्च्या झ्युङ बेत्। ॱनी नुक् झ्यीन डीक्च्या झ्युङ्न यो़क्केन् झ्यीनी ॱनी, हरुङ् खोङ् ॱसोम्बु यो़प्प दीगी ॱसुम्ब हज्यरङ् ले ॱल्हस्सी थर्तु ची़त् छुगेन् बेत्। 11 ॱनी हरुङ् हीजो़त् च्यीक्की ॱमीत् छेप्प, हज्यरङ्दङ् को़न्ज्योक् डीक्च्या जेक्केन्, हज्यरङ्गी चोव ज्यीन्दक् येशु ख्रीष्ट्की कुट्टीङ्गी हज्यरङ् को़न्ज्योक्तङ् मत् ढेब यो़प्पल गेस झ्यीत् छुगेन् बेत्। आदम् धङ् ख्रीष्ट्की लेमु १२-२१ 12 ॱनी दीक्प म दी मी च्यीगी च्यीक्की झ्यीन जम्बुलीङ्ल ढम्न युङ बेत्। ॱनी हुगी ॱस्यी गो़ ॱस्यर्केल्ल झ्युङ बेत्। हीनी कोलीमी कुरीक्की दीक्प झ्यीन युङ्नी, ॱनी ॱस्यीव दी इक् कुरीक्लरङ् युङ बेत्। 13 दीक्प म दी छ्यो़डीम् मत् युङे एल्लानीरङ् जम्बुलीङ्न यो़क्केन् बेत्। ॱनी हीन्न अक्, छ्यो़डीम् मीत्न ॱनी, दीक्पल अक् चीस्यी मीत् युङ्गेन् बेत्। 14 ॱनी हीन्न अक्, म दी आदम्नी झ्यीनी मोशागी ङो थुक्ल कोलीमी घयेत् ॱस्यीवे होक्ल ॱस्योर्न यो़क्केन् बेत्। को़न्ज्योक्की कल आदम्गी ॱमत् चीये दीक्प डस्सी कोलीमी ॱयोङ्म घयेक्की मत् झ्येन अक्, हुब म दी ॱस्यीवे होक् दील ॱस्योर्नर बेत्। ॱनी हीगी आदम् हीगो डस्सी तीङ्ला आदम् ॱयोङ्म च्यीक् युङ बेत्। 15 ॱनी हीगो म दी को़न्ज्योक्की थुज्यीगी ॱनङ्ज्येत् धङ् आदम्गी ङीब झ्यीबे लेमु हुगो रङ्स रङ्स हीगो डस्सी युङ्गेन् बेत्। मी च्यीक्की ङीब झ्यीबे लेगी मी गज्येन् ॱस्यी गो़ ॱस्यर्केल्ल ॱसोङ बेत्। ॱनी हीले गया मी च्यीक् यङ् येशु ख्रीष्ट्की कुट्टीङ्गी मी गज्येल्ल को़न्ज्योक्की थुज्यी नुक्रङ्ल थोप्च्ये यो़प्प झ्युङ बेत्। 16 ॱनी थुज्यीगी डेबु दी धङ् हुगी आदम्गी झ्यीबे दीक्पे डेबु दी रङ्स ॱलीङ् बेत्। ॱनी हुगी ङीबे डेबु दील ॱस्यीवे छ्येप्प फोक्प बेत्। ॱनी थुज्यीगी डेबु दील यङ् ङीब गज्येन् यो़त्न अक्, को़न्ज्योक्की ॱनम्बर् धक्पल तो़ङ्गेन् बेत्। 17 मी च्यीक्पु हुगी ङीब झ्यीनी, हुनी छङ्मल ॱस्यीवे ॱवङ् च्यङ्न युङ बेत्। ॱनी हीले ज्यीक्पा यङ् को़न्ज्योक्की थुज्यी छ्यीम्मु जेत्न, नुक्रङ् ॱनम्बर् धक्पल थो़न्न छी थोप्केन् घयेत्ल येशु ख्रीष्ट्तङ् कङ्ज्यीक्ल ॱवङ् च्योङ्ज्ये ॱनोङ्गेन् बेत्। हीगो मी च्यीगी च्यीक्की कुट्टीङ्गी ले बेत्। 18 ङीबे ले च्यीगी च्यीक्की मी कुरीक्ल ॱस्यीवे छ्येप्प फोक्केल्ल झ्युङ बेत्। ॱनी यङ् ढङ्बी़ ले च्यीगी च्यीक्की मी कुरीक् ॱनम्बर् धक्पल धङ् छी थोप्केल्ल झ्युङ बेत्। 19 मी च्यीक्की कल ॱमत् चीये लम्नी मी कुरीक् दीक्च्येल्ल झ्युङ बेत्। ॱनी हुगो डस्सी मी च्यीक्की कल चीन युङे लम्नी यङ् मी गज्येन् ॱनम्बर् धक्प थो़न् छुगेल्ल झ्युङ बेत्। 20 छ्यो़डीम् हुगो म दी मी घयेक्की ङीब गज्येन् झ्यीब थोङ्ज्ये यो़प्पे ढीक्ल ॱनङ बेत्। घन दीक्प गज्येन् फीन युङ्गुक्क हुगो धक्च्येल को़न्ज्योक्की थुज्यी दी इक् हुले ॱल्हक्मा युङ्गेन् बेत्। 21 दीक्पे ॱवङ् च्यङ्न ॱस्यीगेल्ल सो़न युङ बेत्। ॱनी हीगो डस्सीगी लेमुल यङ् को़न्ज्योक्की थुज्यीगी ॱवङ् च्यङ्न हज्यरङ्ल फु तक्पे छी थोप्केल्ल सो़ब बेत्। घन्ड हीन् सीन्न हज्यरङ्गी चोव ज्यीन्दक् येशु ख्रीष्ट्की कुट्टीङ्गी हज्यरङ् ॱनम्बर् धक्पल तो़न्न यो़क्केन् बेत्। |
© 1995 Wycliffe Bible Translators, Inc. and Nepal Bible Society
Wycliffe Bible Translators, Inc.