रोमी 3 - ल्होमीको़न्ज्योक् ढङ्बु धङ् तेम्बर् हीम्ब १-८ 1 यहुदील ज्यी़त् ॱयोङ्माले ॱल्हक्पागी यो़न्दो़न् घन्ड दुक्क? यहुदीगी दक् ज्यब हुगी घन्डे फेन् दी थोगुक्क? 2 फेन् दी त घन्डल अक् थोगेन् बेत्। गोम स्येन् को़न्ज्योक्की ॱसुङ्रप् छङ्म यहुदी घयेत्ल ॱनङ्न झ्यीत्तु ची़प्प बेत्। 3 ॱनी हील यहुदी यरी तेन्ज्ये मत् युङ बेत्। ॱनी हुब तेन्ज्ये मत् युङल, को़न्ज्योक् ओक् तेन्ज्ये मीप्पल डोगेन् बेक्क ॱनी? 4 हुगो ॱस्युली मेम्बेत्। मी घयेत् म दीरङ् कुरीक् ॱएजङ च्यङ्ज्यङ् बेत्। ॱनी हीन्न अक्, को़न्ज्योक् धक्पर् च्येम्म यो़क्केन् बेत्। खोङ् धक्पर् च्येम्म हीम्बे ढीक्ल ॱसुङ्रप्ल नीज्यरङ्गी घङ् ॱसुङ घयेत् धक्पर् युङ्गेन् बेत्। नीज्यरङ्गी ढीक्ल ठीम् च्येत्न ॱनी, नीज्यरङ् धक्पर्ल थो़ङ्गेन् बेत् सीर थो़ङ्गेन् बेत्। (ॱसुङ्रप्की गुल्लु ५१:४) 5 हज्यरङ्गी ढङ्बु मत् झ्यीब दीगी को़न्ज्योक् ढङ्बु यो़प्प दी हरुङ् ॱसेदु थोङ्गेन् बेत् ॱनो़ब छ्यको़र्प्प न? हील हज्यरङ् घन्ड सीक्केन्? हज्यरङ्ल को़न्ज्योक्की खोङ्डोक्की छ्येप्प केन ॱनी, खोङ् ढङ्ज्ये मीप्पल डोगेन् बेक्क ॱनी? ङे हीगो कोलीमीगी लुसल डीक्प सीक्को़त्। 6 हुगो ॱस्युली मेम्बेत्। को़न्ज्योक् ढङ्ज्ये मीत्न ॱनी, खोङ्गी जम्बुलीङ्ल घन्दुक् झ्यीन ठीम् च्यो़क्केन्? 7 पीन ङे मत् दीम्बे ले झ्यीन हुगी मी यरील को़न्ज्योक् दीम्ब यो़प्प दी हरुङ् ॱसेदु थोङ्दु ची़क्को़त्न, धङ् खोङ्ल तो़प्प मङ्दु युङ्दु ची़क्को़त्न ॱनी, ङ दीक्च्येन् बेत् सीन्न घन्डल ङल छ्येप्प को़गेन् बेक्क ॱनी? 8 हीगो खुङ्देल्ल ॱसोङ्न ॱनी, मी यरीगी गा युङे ढीक्ल अयेक्प झ्यीदोङ् सीन्न सीक्केन् बेत्। ॱनी ङे एक् हुगी ॱलोप्स दीरङ् ज्यक्कुक् सीन्न हुबे ङल तङेन् को़क्केन् बेत्। हुन्दुक् झ्यीबल ओ़बे छ्येप्प हुबल फोक्केन् बेत्। ढङ्बु ॱसु उक् मीप्प ९-२० 9 को़न्ज्योक्की ढुङ्दु ज्यी़त् ॱयोङ्म घयेत्ले ङीत् यहुदीगी ज्यी़त् ढक्पा यो़प्प बेक्कक् ॱनी? हीगी ढीक्ल ङीत् घन्डे लेन् ॱलोक्केन्? ढक्पा ॱस्युली मेम्बेत्। मी छङ्म थम्ज्येत् यहुदीरङ् हीन्, ज्यी़त् ॱयोङ्गी मीरङ् हीन्न अक्, कुरीक् दीक्पे होक्ल ॱस्योर्न यो़प्प ङे ॱस्येत् छरेन्। 10 हीगी ढीक्ल ॱसुङ्रप्ल थो़ङ्गेन् बेत्। ॱनम्बर् धक्प च्येम्मे मी च्यीक्तङ् मीप्प बेत्। 11 ॱसीम्ल ॱह घोन युङ्गेन् च्यीक्तङ् मीप्प बेत्। को़न्ज्योक् चर च्येत्न ॱयेङ्न युङ्गेन् च्यीक्तङ् मीप्प बेत्। 12 को़न्ज्योक्ल कुरीक्की तक् तो़न्न, मी घयेत् फेन् ॱमीत् थोगेल्ल ॱसोङ्न यो़क्केन् बेत्। गागी ले झ्यीक्केन् च्यीक्तङ् मीप्प बेत्। 13 हुबे ख दी रो बेक्सनी री़री ॱहीक्केन्दङ् छ्येत्मीत् बेत्। हुबे च्यीलागी ॱयोज्यी़ ठम्ज्यी़ ॱस्यो़क्केन् बेत्। हुबे खल म दीरङ् डी़गी धुक् डस्सी यो़क्केन् बेत्। 14 हुबे खनी म दीरङ् ॱमो़त्मु धङ् ॱमो़म्बी़क्की केच्च्य च्यङ्ज्यङ् थो़ङ्गेन् बेत्। 15 मी ॱरोक् च्यो़प्पल हुबे कङ्ब दी ढीम्सी युङ्गेन् बेत्। 16 हुब फीम्बे ॱस्यी़ल ॱरुम् तङ धङ् दुक्प मेन्द, मीत् युङ्गेन् बेत्। 17 स्यीव युङे लम्गी धो़न् दी हुबल ॱस्यो़च्च्ये मीप्प बेत्। 18 हुबे ॱसीम्ल ॱस्युली को़न्ज्योक्ल ज्यीब ॱमीत् खुर्केन् बेत् सीर यो़क्केन् बेत्। (ॱसुङ्रप्की गुल्लु १४:१-३; यशैया ५९:७-८) 19 छ्यो़डीम्ल घङ् यो़प्पे केच्च्य घयेत् हुगो छ्यो़डीम् थोबे मी घयेक्की ढीक्लरङ् सीक्केन् बेत्। ॱनी हीगो मी रीदङ् रीगी खल दक्क ज्यप्न नक् फी़ ॱमीत् छुबे ढीक्ल धङ् जम्बुलीङ्गी मी घयेत् कुरीक् को़न्ज्योक्की ढुङ्दु ङीब झ्यीक्केन् हीम्ब थोङ्ज्ये यो़प्पे ढीक्ल बेत्। हीगो हज्यरङ्ल ॱस्यो़च्च्ये यो़क्केन् बेत्। 20 घन्ड हीन् सीन्न छ्यो़डीम्गी क घयेत्ल चीन युङे लम्नी को़न्ज्योक्की ढुङ्दु मी ॱसु उक् ॱनम्बर् धक्पल थो़न् ॱमीत् छुगेन् बेत्। हीगी दीक्च्येन् बेत् व ॱनो़बे ॱसम्ल दीरङ् छ्यर्तु ची़क्केन् बेत्। ॱनम्बर् धक्पर्ल थो़म्बे लेमु २१-३१ 21 छ्यो़डीम्गी क घयेत्ल चीन युङे लम्नी को़न्ज्योक्की ढुङ्दु ॱनम्बर् धक्पल ॱमीत् थो़ङ्गेन् हीम्ब दी हुन्दो क तो़न्न यो़क्केन् बेत्। ॱनी हीगो छ्यो़डीम् धङ् कलुङ् ॱस्यो़क्केन् घयेक्की इक् दीम्ब हीम्ब तो़ङ्गेन् बेत्। 22 ॱनम्बर् धक्प दील येशु ख्रीष्ट्ल छ्य स्योक्केन् घयेत् दीरङ् को़न्ज्योक्की तो़न्न थो़ङ्गेन् बेत्। हील दम्ङीत् मीत् युङ्गेन् बेत्। 23 कोलीमी छङ्म थम्ज्येक्की दीक्प झ्यीनी, को़न्ज्योक्की तो़त्वङ् च्येम्मे ओ़च्च्य झ्यीस्सल ॱनोप् ॱमत् छुब बेत्। 24 ॱनी मी घयेत् ॱनम्बर् धक्पल थो़ङ्गेन् हुगो ख्रीष्ट् येशुगी ॱली़बे लम्नी को़न्ज्योक्की थुज्यीगी हीन्दुक्रङ्ल तो़ङ्गेन् बेत्। 25 कोलीमी घयेक्की ङीबे ॱएङ्गी दीक्प घयेक्की ढीक्ल को़न्ज्योक्की छ्येप्प ॱमत् केब, हजो़त् थुक् सो़प्प खुर्न हुबे येशुल छ्य स्यक्न खोङ्गी ठक्की डीक्च्या युङ्ज्ये यो़प्पल को़न्ज्योक्की खोङ् दीक्पे ॱस्याबल ॱरोक्ल जङ्न युङ बेत्। हीन्दुक् झ्यीन को़न्ज्योक्की ठीम् ढङ्बु तेब दी तो़न्न युङ बेत्। 26 खोङ् ठीम्बो़न् ढङ्बु हीम्ब दी धङ् येशुल छ्य स्योक्केन् घयेत् ॱनम्बर् धक्पल तो़ङ्गेन् हुगो धीङ्सङ्गी धी़ हील क खोङ्गी तो़न्न युङ बेत्। 27 हीगो हीन्न ॱनी, ॱसु दीगी तम्दो़त् ॱस्यो़त् छुगेन्? ॱसी़ इक् ॱस्यो़त् ॱमीत् छुगेन् बेत्। घन्डल मीत् युङ्गेन् बेक्क ॱनी? तम्दो़त् हीगो म दी छ्यो़डीम्गी क घयेत्ल चीन युङे लम्नी युङ्गेन् बेत्। ॱनम्बर् धक्पल थो़ङ्गेन् हुगो छ्य स्यक्पे लम्नी मेन्द, मीत् युङ्गेन् बेत्। 28 हीगी ढीक्ल ङीक्की हीन्दुक् झ्यीबे ॱसम्ल खुको़र्त्। छ्यो़डीम्गी क घयेत्ल चीन युङे लम्नी मेम्ब, छ्य स्यक्पे लम्नी को़न्ज्योक्की ॱनम्बर् धक्पल तो़ङ्गेन् बेत्। 29 ॱनी को़न्ज्योक् म दी ज्यी़त् ॱयोङ् ॱयोङ्मे मेम्ब, यहुदी घयेक्कीरङ् को़न्ज्योक् बेक्क ॱनी? मेम्बेत्। ज्यी़त् ॱयोङ्मा घयेक्की इक् को़न्ज्योक् बेत्। 30 को़न्ज्योक् च्यीगी च्यीक्रङ् यो़क्केन् बेत्। हुगो झ्यीनी, यहुदीगी दक् ज्यबे मीरङ् हीन्, मत् ज्यबे मीरङ् हीन्न अक्, हुगो ॱनम्बर् धक्प दील छ्य स्यक्पे लम् दीनी मेन्द, ॱमीत् तो़ङ्गेन् बेत्। 31 ॱनी हीगो हीन्न ॱनी, छ्य स्यक्पे लुस हीगी छ्यो़डीम् हुगो मीप्पल सोगेन् बेक्क ॱनी? हीगो ॱस्युली मेम्बेत्। हीगी क छ्यो़डीम् दी डुप्केल्ल सोगेन् बेत्। |
© 1995 Wycliffe Bible Translators, Inc. and Nepal Bible Society
Wycliffe Bible Translators, Inc.