रोमी 2 - ल्होमीको़न्ज्योक्की ठीम् ढङ्बु च्यो़क्केन् १-१६ 1 रङ् मी ॱसु हीन्न अक्, ॱयोङ्मे गोल थो़न्न च्यो़न्स्यो़त् तो़ङ्गुक्क हुगो रङ्गी रङ्ल ठीम् च्येत्न छ्येप्प फोक्तु ची़क्केल्ल डोगेन् बेत्। घन्ड हीन् सीन्न हुगी झ्यीब डस्सीगी ले रङ्गी इक् झ्यीक्केन् बेत्। रङ्गी हुगो फी़ ॱमीत् छुगेन् बेत्। 2 ॱनी हुन्दुक् झ्यीब घयेत्ल को़न्ज्योक्की ठीम् च्येत्न छ्येप्प को़गेङ्गी लेमु हुगो हुबल ओ़ब डीक्पे छ्येप्प फोक्केन् हीम्ब हज्यरङ्ल ॱस्यो़च्च्ये यो़क्केन् बेत्। 3 रङ् अङ् मी ॱयोङ्मा डस्सीरङ् ङीब झ्यीक्केङ्गी मी झ्यीनी, हरुङ् ॱयोङ्मागी गोल थो़न्न च्यो़न्स्यो़त् तो़ङ्गेन् सीक्केन्? रङ् यङ् को़न्ज्योक्की छ्येप्प फोक्केन् हुनी थको़र्त् ॱनो़ब ॱसम्गो़प्प? 4 को़न्ज्योक्की घन्दुक्मे गय धङ् ङङ्रीन् धङ् गुर् थेक्प जेक्कुक्क हुगो खोक्की आक्तोक्ल तोङ्गेन् ॱनी? खोङ् हुन्दुक्मे गय यो़क्केन् हुगो रङ्गी ॱसीम् दी ॱएङ्गी लम्नी ज्युर्न युङ्गो़ट्टो ॱनो़बे ढीक्ल बेत्। हीगो खोक्की ॱह मीत् घोयेक्क ॱनी? 5 रङ्गी ॱसीम् दी मत् ज्युर, हुन्दुक् दीरङ् गट्टक्प खुर्न देत्न ॱनी, को़न्ज्योक्की ठीम् ढङ्बु च्येत्न खोङ्गी खोङ्डोक्की छ्येप्प युङे ङीन् थुक्ल रङ्गी हुगी खोङ्डोक् हुगो ॱसान स्यक्पल डोगेन् बेत्। 6 हुगी यङ्ल मी रीदङ् रीगी घङ् झ्यीबे लेगी लेन् खोङ्गी टो़क्केन् बेत्। (ॱसुङ्रप्की गुल्लु ६२:१२) 7 हुगो झ्यीनी धु च्यङ्न गये ले झ्यीक्केन् धङ् इगीनी मक्की ओ़च्च्ये तो़प्प धङ् लेसो कुट्टीन् धङ् ॱस्यीव मीप्पे छी तक्प ॱयेङ्गेन् घयेत्ल खोङ्गी फु तक्पे छी ॱनङ्गेन् बेत्। 8 ॱनी यङ् रङ्ज्यी़ झ्यीक्केन्, दीम्बल ॱमीत् चीगेन्, ढङ्ज्ये मीप्पे लम्ल डोगेन् घयेत्ल को़न्ज्योक् खोङ्डोक् लङ्न हुबल छ्येप्प को़गेन् बेत्। 9 ॱनी अयेक्प झ्यीक्केङ्गी मील रीदङ् रील गोम दी यहुदील, हुनी ज्यी़त् ॱयोङ् ॱयोङ्गी मील दुक्प नोङ्न ॱसीम् च्योय युङ्गेन् बेत्। 10 ॱनी गये ले झ्यीक्केङ्गी मील यङ् रीदङ् रील गोम दी यहुदील, हुनी ज्यी़त् ॱयोङ् ॱयोङ्गी मील इगीनी मक्की ओ़च्च्ये तो़प्प धङ् लेसो कुट्टीन् धङ् ॱसीम् दीव युङ्गेन् बेत्। 11 को़न्ज्योक्की दम्ङीत् मीत् झ्यीक्केन् बेगो। 12 छ्यो़डीम् मीप्पल दीक्प झ्यीक्केन् ज्यी़त् ॱयोङ् ॱयोङ्गी मी घयेत् छ्यो़डीम् मीप्पलरङ् हुब खरप्ल तोङ्गेन् बेत्। छ्यो़डीम् यो़क्केन् यहुदी दीक्प झ्यीक्केन् घयेत्ल छ्यो़डीम्ल तेन ठीम् च्यो़क्केन् बेत्। 13 ॱनी यङ् को़न्ज्योक्की ढुङ्दु ॱनम्बर् धक्प दील छ्यो़डीम् ॱस्यीगो़त् सीक्केन् घयेत् मेम्ब, छ्यो़डीम्गी कल चीगेन् घयेत् दी तो़ङ्गेन् बेत्। 14 ज्यी़त् ॱयोङ् ॱयोङ्गी मील छ्यो़डीम् मीप्प बेत्। ॱनी मीत्न अक्, रोरङ्सो़ रङ्स्यीगी छ्यो़डीम् यो़प्प डस्सी रोरङ्सो़ छ्यो़डीम् दी रोरङ्सो़ ॱसीम्ल झ्युङ्न यरीगी ॱसम्गेन् बेत्। 15 छ्यो़डीम्गी लेमु हुबे ॱसीम्ल ढीन यो़प्प दी हुबे छ्यलु दीगी तो़ङ्गेन् बेत्। हीगो खुङ् हीन् धङ् मेल्ल हुबे ॱसीम्बे नङ्गी सङ् ङेन् च्यो़त् ॱस्यीगेन् दीगी तो़ङ्गेन् बेत्। हुबे ॱसीम्ल रोरङ्सो़ ङीब दीगी ॱनोङ् लङ्दु ची़क्केन् बेत्। यरी यङ् मत् ङीबे देङ्जो़त् लङ्गेन् बेत्। 16 हुन्दुक् झ्यीबे मी ॱसीम्ल बेन स्यक्पे केच्च्य घयेक्की ढीक्ल को़न्ज्योक्की येशु ख्रीष्ट्की लम्नी ठीम् च्यो़प्पे ङीङ्गी यङ्ल हस्सो़त् हुबे ॱसीम्ल ढीन यो़प्प दी ॱह घोगेन् बेत्। ॱनी हीगी लेमु हीगो ङे ॱस्येप्पे केच्च्य ॱनेम्बुल डीक्केन् बेत्। यहुदी धङ् छ्यो़डीम्गी ढीक्ल १७-२९ 17 रङ्गी म दी ङ यहुदी, छ्यो़डीम् थोबे को़न्ज्योक्की मीस्सीर् हीन् सीन्न ङोम्ज्येत् ॱलोङ्गेन् बेत्। 18 को़न्ज्योक्की थुल घङ् यो़प्प घयेत् रङ्गी छ्यो़डीम् ॱस्यीगेन् झ्यीनी, ॱह घोगेन् बेत्। ॱनी घङ्गो गा हीम्ब हुगो रङ्गी ॱयुव पीक् ॱस्यीगेन् बेत्। 19 रङ्गी ॱसीम्ल ॱमीक्मीत् घयेक्की लम्बा, मेन्नक्ल दो़क्केन् घयेत्ल मेङ्ग पेक्केन्, 20 घुर्च्यक् घयेत्ल ॱलोप्केन् धङ् भीज घयेक्की चयेलम हीन् ॱनो़ब ॱसम्गेन् बेत्। घन्ड हीन् सीन्न छ्यो़डीम्ल दीम्ब धङ् ॱलोप् ओ़बे धो़न् घयेत् यो़क्केन् बेत्। 21 रङ्गी ॱयोङ्माल ॱलोप्स ज्यक्केन् बेत्। ॱनी यङ् रङ्गी रङ्ल मीत् ज्यक्केन् बेत्। ॱयोङ्ल की़न्नक् ॱमत् कु सीन्न ॱलोप्स ज्यक्केन्, रङ्गी यङ् कुगेन् बेत्। 22 रङ्गी ॱयोङ्माल ॱयोङ्दङ् मत् ङीज्यीत् सीन्न ॱलोप्स ज्यक्केन्, रङ् यङ् ॱयोङ्दङ् ङीगेन् बेत्। मी ॱयोङ्मागी ॱल्ह धङ् कुल छ्यक् छ्यो़प्प पुबल रङ् स्यीलोक्सी झ्यीक्केन् बेत्। रङ् यङ् हुबे ॱल्हगङ् घयेत् लुप्तु डोगेन् बेत्। 23 रङ्गी छ्यो़डीम् यो़प्पे ङोम्ज्येत् ॱलोङ्गेन्, ॱनी छ्यो़डीम्गी क दील रङ् यङ् ॱमत् चीय, हुन्दुक् झ्यीन को़न्ज्योक्ल ॱमो़म्बी़त् युङ्गेङ्गी लेमु झ्यीक्केन् बेत्। 24 हीगी ढीक्ल ॱसुङ्रप्ल खीत्रङ् यहुदी घयेक्की झ्यीत् झ्यीक्की ज्यी़त् ॱयोङ् ॱयोङ्गी मी घयेत् च्येन्नी को़न्ज्योक्की छेल्ल ॱमो़म्बी़त् युङ्दु ची़क्केन् बेत् सीर यो़क्केन् बेत्। (यशैया ५२:५) 25 ॱनी यहुदीगी दक् ज्यबे लेमु हुगो छ्यो़डीम्गी क घयेत्ल चीगेन् दील हुगो फेङ्गेन् बेत्। ॱनी छ्यो़डीम्गी क घयेत्ल ॱमीत् चीगेन् दील हुगो घो ॱमीत् छ्यो़त्ल डोगेन् बेत्। 26 ॱनी दक् मत् ज्यबे मी इक् यङ् छ्यो़डीम्गी क घयेत्ल चीगो़त्न ॱनी, हुगो दक् ज्यबे मीदङ् छ्येत्मीत्ल डोगेन् मेम्बेक्क ॱनी? 27 रङ् छ्यो़डीम् थोब च्येम्म, सी़ल दक् ज्यबे मी हीन्न अक्, दक् मत् ज्यबे मी ॱयोङ्मागी छ्यो़डीम्गी क घयेत्ल चीगो़त्न ॱनी, हुगी रङ्ल छ्यो़डीम्गी कल ॱमत् चीय हीम्बे ढीक्ल ठीम् च्यो़त् छुगेन् बेत्। 28 ॱनी छ्यीनी तेबल थोङ्गेन् हुगो यहुदी खुङ्देन् मेम्बेत्। छ्यीनी तेबल सी़ल ॱस्यीदागी दक् ज्यब हुगो खुङ्देङ्गी दक् ज्यबल मीत् डोगेन् बेत्। 29 ॱनी नङ्ल खोक्पल यो़प्प च्येम्म दी क हस्सो़त् दीम्बरङ्गी यहुदी दी बेत्। छ्यो़डीम्गी कल यो़प्प, सी़ल ज्यबे दक् हुगो मेम्बेत्। धम्बे थुगी झ्यीन ॱसीम्ल ज्यबे दक् दी क हस्सो़त् खुङ्देन् दी बेत्। ॱनी हुन्दुक् झ्यीबे मील हस्सो़त् मी च्यानी मेम्ब, को़न्ज्योक् च्यानी तो़प्प युङ्गेन् बेत्। |
© 1995 Wycliffe Bible Translators, Inc. and Nepal Bible Society
Wycliffe Bible Translators, Inc.