रोमी 16 - ल्होमीछ्यक्सुम् थेमु तङे केच्च्य १-२४ 1 कीङ्गीरीयागी छ्यो़ छोगी छ्यो़योक्म, ङीक्की पी़न्ज्या फोबीगी ढीक्ल ङ स्युदेङ्गी केच्च्य च्यीक् ॱस्यो़क्केन् हीनो। 2 हुगो चोव ज्यीन्दक्तङ् या मत् ढेब यो़क्केन् झ्यीनी, हुगोल खीत्रङ्गी को़न्ज्योक्की मी चङ्म घयेत्ल थोङ् झ्यीक्केन् डस्सी झ्यीज्यीत्। हुल घङ् गो़बे दगु झ्यीज्यीत्। घन्ड हीन् सीन्न हुगी ॱयोङ्म घयेत्ल अक्, ॱनी ङल अक् दगु यङ्दीक् झ्यीज्युङ्। 3 ख्रीष्ट् येशुगी ले च्यीक्प झ्यीक्केन्, ङे छ्यीट्टो प्रीस्कीला धङ् अक्वीलाल ङे छ्यक्सुम् थेमु यो़दो सीन्न ॱस्यो़च्च्यीत्। 4 हुब ॱङीबी़ ङे ढीक्ल रोरङ्सो़ ॱरोक् दीरङ् ॱसोङ्न आक्, फङ मीप्प झ्यीसोङ्। ॱनी ङे ढीक्ल छ्युवक् मेम्ब, ज्यी़त् ॱयोङ् ॱयोङ्गी छ्यो़ छो घयेत्ल अक् हुब ॱङीबी़ ढीन् सुक्न यो़क्केन् बेत्। 5 हुब ॱङीबी़ खीम्दु जोम्गेन् छ्यो़ छोगी मीस्सीर् घयेत्ल अक् ङे छ्यक्सुम् थेमु यो़दो। ॱनी ङे झ्यम्बे मी इपेनीतस्ल ङे छ्यक्सुम् थेमु यो़दो। एशीया लुङ्बदु ख्रीष्ट् ङो़ल गोम ॱएन्स्युक्ल फी़त् डस्सी युङ्गेन् दी खोङ्जो बेत्। 6 ॱनी मरीयम्ल अक् ङे छ्यक्सुम् थेमु यो़दो। रोगी खीत्रङ्गी घुङ्दु टेत् च्येत्न ले झ्यीन युङ बेत्। 7 एल्ला ङदङ् दल चो़ल्ल देप्पे दगु ङीक्की ज्यी़त् च्यीक्की मी एन्डोनीकस् धङ् युनीयस्ल ङे छ्यक्सुम् थेमु यो़दो। हुब ॱङीबु ङले एल्ला ख्रीष्ट् ङो़ल युङ्न ठीक्नल घयेक्की इक् हुब ॱङीबु गङ्ज्येन् हीम्ब ॱसम्न यो़क्केन् बेत्। 8 चोव ज्यीन्दक्तङ् मत् ढेब यो़क्केन्, ङे झ्यम्बे दगु एम्पीलीयातस्ल ङे छ्यक्सुम् थेमु यो़दो। 9 ख्रीष्ट्की ले झ्यीक्केन् ङे छ्यीट्टो उर्बानस् धङ् ङे झ्यम्बे दगु इस्ताकीस्ल ङे छ्यक्सुम् थेमु यो़दो। 10 ख्रीष्ट्तङ् मत् ढेबल तेम्बर्ल थो़न्न यो़क्केन् अपेल्लेस्ल ङे छ्यक्सुम् थेमु यो़दो। ॱनी अरीसतोबुलस्की मीजङ् घयेत्ल ङे छ्यक्सुम् थेमु यो़दो। 11 ङीक्की ज्यी़क्की मी हेरोदीयन्ल ङे छ्यक्सुम् थेमु यो़दो। नर्सीसस्की मीजङ्गी नङ्न यो़क्केन् चोव ज्यीन्दक्की मी घयेत्ल ङे छ्यक्सुम् थेमु यो़दो। 12 चोव ज्यीन्दक्की ले टेत् च्येत्न झ्यीक्केन्, भुमु त्रीफेना धङ् त्रीफोसाल ङे छ्यक्सुम् थेमु यो़दो। चोव ज्यीन्दक्की ले टेत् च्येत्न झ्यीक्केन् ङे झ्यम्बे भुमु पर्सीस्ल ङे छ्यक्सुम् थेमु यो़दो। 13 चोव ज्यीन्दक्तङ् मत् ढेब यो़क्केन् रुफस् धङ् रुफस्की आमल ङे छ्यक्सुम् थेमु यो़दो। रुफस् हुगो मी गङ्ज्येन् बेत्। खोङ्जो़ आमे ङल ङे आम डस्सी झ्यीक्केन् बेत्। 14 असीङ्गीरीतस्, फेलेगन्, हर्मेस्, पत्रोबास्, हर्मास् धङ् ॱनी हुबे दगु पी़न्ज्या घयेत्ल ङे छ्यक्सुम् थेमु यो़दो। 15 फीलोलोगस्, युलीया, नेरीयस्, नेरीयस्की नुमु ओलीम्पास् धङ् ॱनी हुबे दगु छ्यीट्टो को़न्ज्योक्की मी चङ्म घयेत्ल ङे छ्यक्सुम् थेमु यो़दो। 16 खीत्रङ् च्यीक्तङ् च्यीक्ल ॱसीम् चङ्म खुर्न च्युप् झ्यीत्री चीज्यीत्। ख्रीष्ट्की छ्यो़ छो घयेक्की खीत्रङ् घयेत्ल छ्यक्सुम् थेमु यो़दो सीगुगो। 17 पी़न्ज्यासो, खीत्रङ्ल ङ ॱलोप्स हीगो ज्यक्केनो। खीत्रङ्गी उन छुङ्न दो़त्तु ॱमीत् ची़क्केन्, पोङ्ज पोङ्जल भीदु ची़क्केन्, ॱयोङ्गी धेप्पल भर्च्येत् तोङ्गेन् हुब घयेत्तङ् च्यङ्जो़त् झ्यीन दो़च्च्यीत्। हुबे ॱलोप्स हुगो खीत्रङ्गी एल्ला घोवे ॱलोप्सल मीत् डीक्केन् बेत्। हुबदङ् भीन दो़च्च्यीत्। 18 घन्ड हीन् सीन्न हुन्दुक् झ्यीबे मी हुब हज्यरङ्गी चोव ज्यीन्दक् ख्रीष्ट्ल स्यप्च्यी़ ज्युक्केन् मेम्ब, हुब रोरङ्सो़ धेत्मो़ ङेम्बे ॱयोक् ज्युक्केन् बेत्। हुबे मी ॱयुङ्बोक्म घयेत्ल तम् ॱनेम्बोक्म ॱस्येत्न तो़च्च्य की़न ॱयो कोर्न छ्यी़दु ची़क्केन् बेत्। 19 खीत्रङ् केच्च्य ॱनेम्बुल नेन्न थीरीय दो़क्केन् हीम्ब मी छङ्मल ॱस्यो़च्च्ये यो़क्केन् बेत्। हुगो झ्यीनी ङ ॱसीम् गव यो़त्। ॱनी हीन्ज्यङ्, खीत्रङ् गये ढङ् झ्यीप्पल खेजो़त् धङ् आक्पागी ढङ् झ्यीत् ॱमीत् ॱस्यीगेन् युङ झ्यीज्यीत्। 20 स्यीव दीव ॱनङ्गेङ्गी को़न्ज्योक्की शैतान् हुगो ज्योक्सी खीत्रङ्गी तीङ्बे होक्ल ॱलुक्न चीर्केन् बेत्। हज्यरङ्गी चोव ज्यीन्दक् येशुगी थुज्यी खीत्रङ्दङ् दल युङ् युङ युङ्ज्ये यो़प्प स्योक्च्यीत्। 21 ङे ले च्यीक्की छ्यीट्टो तीमोथीगी खीत्रङ् घयेत्ल छ्यक्सुम् थेमु सीगुगो। ॱनी ङीक्की ज्यी़क्की मी लुसीयस्, यासोन् धङ् सोसीपेटर्की इक् खीत्रङ् घयेत्ल छ्यक्सुम् थेमु सीगुगो। 22 ॱनी हीगी यीगी हीगो ढीन टो़क्केन्, चोव ज्यीन्दक्तङ् मत् ढेब यो़क्केन् ङ तर्तीयस्की इक् छ्यक्सुम् थेमु यो़दो। 23 हीदु जोम्न छ्यो़ छो छुस ङे ॱनेजङ गायस्की इक् छ्यक्सुम् थेमु सीगुगो। हीगी सार्की पेम्बु चीबो़न् इरास्तस् धङ् हज्यरङ्गी पी़न्ज्या कवार्टस्की इक् छ्यक्सुम् थेमु सीगुगो। 24 [हज्यरङ्गी चोव ज्यीन्दक् येशु ख्रीष्ट्की थुज्यी खीत्रङ् घयेत्ल थोप् थोब युङ्ज्ये यो़प्प स्योक्च्यीत्। आमेन्।] को़न्ज्योक्ल तो़प्पे केच्च्य २५-२७ 25 ङे ॱस्यो़क्केङ्गी येशु ख्रीष्ट्की केच्च्य ॱनेम्बु हीगी लम्नी को़न्ज्योक्की खीत्रङ् चव छुदु ची़त् छुगेन् बेत्। ॱनी हीगी ॱङीङ्बी़ केच्च्य हीगो ॱङो़न् धङ्बुनी ॱमत् तो़म्ब स्यक्न यो़क्केन् बेत्। 26 ॱनी ॱङीङ्बु हीगो धी़ ज्यी़न्दु स्युगेन् को़न्ज्योक्की कगो़त् ॱनङ्न, ज्यी़त् ज्यी़त् घयेक्की मी छ्य स्यक्न खोङ्गी खुल युङ् छुबल कलुङ् ॱस्यो़क्केन् घयेक्की ढीबे यीगील यो़प्प दी हीगी धी़ हील क कुरीक्की ॱह घो छुबल खोङ्गी तो़न्न युङ बेत्। 27 धो़र्रीक् छङे को़न्ज्योक् च्यीगी च्यीक्ल येशु ख्रीष्ट्की लम्नी धी़ ज्यी़न्दु तो़प्प युङ् युङ युङ्ज्ये यो़प्प स्योक्च्यीत्। आमेन्। |
© 1995 Wycliffe Bible Translators, Inc. and Nepal Bible Society
Wycliffe Bible Translators, Inc.