रोमी 15 - ल्होमीयो़ङगी ढीक्ल आम्न झ्यीक्केन् 1 हज्यरङ् छ्य डम्बोक्म च्येम्म दीबे छ्य योक्या च्येम्म घयेक्की मत् युङ घयेत् दी गुर् गोगेन् बेत्। हज्यरङ् गुव छ्युवक् मेम्ब, 2 हज्यरङ् ॱसोस्सो़ लोल यो़क्केङ्गी मील फेन् थोब धङ् ॱलोप्स्यीक् टो़त् गोगेन् बेत्। 3 ख्रीष्ट्की इक् रोरङ् गुवे ले मत् झ्येब बेत्। हील डीक्केङ्गी केच्च्य ॱसुङ्रप्ल ढीन यो़क्केन् बेत्। को़न्ज्योक् नीज्यरङ्ल ॱमो़म्बी़त् तङ दी ङल फोक्च्युङ्। (ॱसुङ्रप्की गुल्लु ६९:९) 4 ॱसुङ्रप्ल घङ् यो़प्प घयेत् हुगो हज्यरङ्ल ॱलोप्स थीबे ढीक्ल धङ्बुदु ढीन स्यक्न यो़क्केन् बेत्। हुनी धु धङ् ॱलोप्स्यीक् झ्युङ्न, रीगो छ्यीदु युङ्गेन् बेत्। 5 धु धङ् ॱलोप्स्यीक् ॱनङ्गेङ्गी को़न्ज्योक्की दगु जेत्न, खीत्रङ् घयेत् ख्रीष्ट् येशुगी ॱमीदेल तेन, कुरीक् ॱसीम् च्यीक्ल थी़न्न युङ् छुज्ये यो़प्प तोङ्। 6 हुनी क खीत्रङ्गी ॱसीम् च्यीक् ली़ च्यीक् झ्यीन ख च्यीक्नी थो़म्ब डस्सी झ्यीन चोव ज्यीन्दक् येशु ख्रीष्ट्की यप्, को़न्ज्योक्ल तो़प्प पु छुगेन् बेत्। ज्यी़त् ॱयोङ् ॱयोङ्गी मील अक् केच्च्य ॱनेम्बु ॱनङ ७-२१ 7 को़न्ज्योक्ल तो़प्प युङ्ज्येल ख्रीष्ट्की खीत्रङ् खोङ् रोरङ्गी मी हीम्बल स्यागी स्यीब डस्सी खीत्रङ् नङ्दु च्यीक्तङ् च्यीक्ल रङ्गी मी हीन् ॱनो़ब ॱसम्ज्यीत्। 8 ङे हीगो ॱस्येत् योङ्। यहुदीगी पुबु ॱमुमुल ॱनङे छ्यो़त्तुम् दी डुप्न को़न्ज्योक् तेम्बर् यो़प्प तो़न्ज्येल यहुदी घयेक्की स्यप्च्यी़बल ख्रीष्ट् थो़न्न युङ बेत्। 9 हुनी क ज्यी़त् ॱयोङ् ॱयोङ्गी मी घयेक्की इक् को़न्ज्योक्की ॱङीङ्ज्यी छ्यीम्मु जेप्पे ढीक्ल खोङ्ल तो़प्प पु छुगेन् बेत्। हीगी ढीक्ल ॱसुङ्रप्ल ढीन यो़क्केन् बेत्। ज्यी़त् ॱयोङ् ॱयोङ्गी मी घयेक्की छीक्तु नीज्यरङ्ल तो़क्केन्। नीज्यरङ्गी छेङ्गी ढीक्ल तो़प्पे तो़त्लु पुगेन् सीन्न यो़क्केन् बेत्। (ॱसुङ्रप्की गुल्लु १८:४९) 10 ॱसुङ्रप्ल हरुङ्द ज्यी़त् ॱयोङ्म ॱयोङ्म घयेस्सो, को़न्ज्योक्की दम्बे मीस्सीर्तङ् दल गेस झ्यीज्यीत् सीर थो़ङ्गेन् बेत्। (ठीम्लु ३२:४३) 11 हरुङ्द थो़ङ्गेन् बेत्। खीत्रङ् ज्यी़त् ॱयोङ् ॱयोङ्गी मी घयेस्सो चोव ज्यीन्दक्ल तो़प्प पुज्यीत्। मीच्च्यी़त् की़ङ्गी मी घयेस्सो खोङ्ल तो़त्लु पुज्यीत् सीक्केन् बेत्। (ॱसुङ्रप्की गुल्लु ११७:१) 12 ॱनी यशैयागी इक् सीक्केन् बेत्। यीशैगी दुङ्ज्यी़त्ल छ्येप्पे बुरुव च्यीक् थो़न्न खोङ्गी ज्यी़त् कुरीक्ल ॱवङ् च्योङ्गेन् बेत्। ॱनी ज्यी़त् ज्यी़त् घयेक्की मी खोङ्ल रीगो झ्यीक्केन् बेत् सीर यो़क्केन् बेत्। (यशैया ११:१०) 13 खीत्रङ्गी रीगो दी छ्यीदु छ्यीदु युङ्ज्ये यो़प्पल धम्बे थुगी ॱस्यीक् झ्युङ्न, खीत्रङ् छ्य स्योक्केन् घयेक्की ॱसीम्ल रीगो च्येम्मे को़न्ज्योक्की गव धङ् दीव ॱनङ्न घेङ्ज्ये यो़प्प तोङ्। पावल्की रोरङ्गी लेगी ढीक्ल ॱस्यो़क्केन् १४-२१ 14 ङे पी़न्ज्या घयेस्सो, खीत्रङ्गी गये ॱसीम् खुर्न खेसील थो़न्न च्यीक्तङ् च्यीक्ल ॱलोप् ॱस्यीगेल्ल ॱसोङ्न यो़प्पल ङ देङ् खीन यो़त्। 15 हीगी केच्च्य हीगो यरी खीत्रङ्ल ढेन्सो़ युङ्ज्येल ङे ॱसीरी ॱसीत्त ढीन तोङ्गो़त्। घन्ड हीन् सीन्न को़न्ज्योक्की थुज्यी ॱनङ्न, 16 ङ ज्यी़त् ॱयोङ् ॱयोङ्गी मी घयेक्की ढीक्ल ख्रीष्ट् येशुगी ॱयोक्पुल खो़त्न यो़त्। ॱनी ज्यी़त् ॱयोङ् ॱयोङ्गी मी घयेत् धम्बे थुगी धक्पर् हीम्बल सो़न हुब घयेत् को़न्ज्योक् थु गुवे छ्यो़प्प डस्सील युङ्ज्ये यो़प्पल को़न्ज्योक्की केच्च्य ॱनेम्बु ॱस्यो़क्केन्, ङ छ्यो़प्पो़न् डस्सी हीन्। 17 हीगो झ्यीनी ख्रीष्ट् येशुदङ् मत् ढेबल को़न्ज्योक्की स्यप्च्यी़गी लेगी ढीक्ल ङल ङोम्ज्येत् यो़त्। 18 ॱनी ङे ङोम्ज्येत् हीगो ॱयोङ्गी ढीक्ल मेम्ब, ख्रीष्ट्की ङ च्येन्नी ज्यी़त् ॱयोङ् ॱयोङ्गी मी घयेत् को़न्ज्योक्की खुल ठीक्न युङे ढीक्ल ॱस्यो़त् छुगो़त्। हीगो घन्दुक् झ्यीन हीन् सीन्न ङे ॱस्येप्पे तम्, ङे झ्यीबे ले, 19 ङे यीक् छ्यीम्मी़ लेगी ता, यम् छेम्मे ले घयेक्की धङ् को़न्ज्योक्की थुगी ॱस्यीक्की हुब घयेत् घुक्न युङ बेत्। ॱनी ख्रीष्ट्की ढीक्की केच्च्य ॱनेम्बु हीगो यरुशलेम्नी झ्यीनी इल्लीरीकुम्गी लुङ्बल ते गीर्न ङे ॱस्येत् छरेन्। 20 ङे हीगो मी ॱयोङ्मागी ॱस्येत्न ॱसप्तेन् डेन् स्यक्पल सो़न डोगेन् डस्सी मेम्ब, ख्रीष्ट्की छेन् दीरङ् ॱह मत् घोवे लुङ्बल ॱस्यो़त्तु डोज्ये ॱनो़बे ॱसम्ल खुर्न डोगो़त्। 21 हीगी ढीक्ल ॱसुङ्रप्ल थो़ङ्गेन् बेत्। खोङ्गी ढीक्की केच्च्य ॱस्यो़क्केन् ॱसु उक् ॱमत् ॱलीबे लुङ्बे मी घयेक्की खोङ् थोङ्गेन् बेत्। ॱह दीरङ् मत् घोवे मी घयेक्की ॱह घो छुगेन् बेत्। (यशैया ५२:१५) पावल् रोम्ल युङे ढो़ २२-३३ 22 हीगो झ्यीनी क ङ खीत्रङ् च्याल लेम्म गज्येन् युङ्ज्ये ॱनो़ब झ्यीबेन्। ॱनी हीन्न अक्, युङ् छुमोङ्। 23 ॱनी ह हीगी लुङ्ब हीदु हुन्दो ङल ले मीत्। ॱनी खीत्रङ् च्याल युङ्ज्येमे ॱसीम् खुर्नी इक्, लो गज्येन् ॱसोङ्। 24 ॱनी ङ इस्पेन्गी लुङ्बल डोये यङ्ल खीत्रङ् च्याल आक् ठेत्तु ॱलीत् योङ्। खीत्रङ् लम्ल ॱनेगेन् झ्यीनी, ङ गेसक्की खीत्रङ् च्यादु धोबा च्यीक् थुक् दो़क्केन्। हुनी खीत्रङ्गी ङल दगु झ्यीन लम् ची़क्को़ट्टो ॱनो़गुक्। 25 ॱनी हुन्दो ङ म दी यरुशलेम्ल को़न्ज्योक्की मी चङ्म घयेत्ल दगु झ्यीत्तु डोगो़त्। 26 ॱनी उन हुबे घुङ्न यो़क्केन् टङ्बु घयेत्ल टो़च्च्येल मासीडोनीया धङ् अखैयागी छ्यो़ छो घयेक्की हुबे ढीक्ल गस्सीम् ॱसम्न चेन्ड दी़न स्यक्न यो़क्केन् बेत्। 27 हीगो रोसो़ ॱलो़लङ्गी दी़न स्यक्तुक्। ॱनी म दी हुबल यहुदी घयेक्की ढीन् छक्न यो़क्केन् बेत्। घन्ड हीन् सीन्न ज्यी़त् ॱयोङ् ॱयोङ्गी मी घयेत्ल ॱसीम्ल फेम्बे ॱमेल्लम् घयेत् दी यहुदी घयेत् च्येन्नी युङ बेत्। हीगो झ्यीनी यहुदी घयेत्ल सी़ल फेम्बे खोज्येत् घयेत् दी ज्यी़त् ॱयोङ् ॱयोङ्गी मी घयेक्की टो़त् गोगेन् बेत्। 28 ॱनी हुबे घङ् दी़न यो़प्पे चेन्ड हुगो यरुशलेम्ल खुर्न टेत्न ङे ले हीगो ढुप्नी, हुनी क हस्सो़त् ङ इस्पेन्ल डोगेन्। ॱनी स्योल्ल खीत्रङ्दङ् हुदु ठेप्पे योङ्। 29 ङ खीत्रङ् च्याल युङे यङ्ल ङे लक्ल ख्रीष्ट्की ॱनङ्न यो़प्पे ॱमेल्लम् छङ्म दी खुर्न युङ्गेन्। हुगो ङल ॱस्यो़च्च्ये यो़त्। 30 पी़न्ज्यासो, हज्यरङ्गी चोव ज्यीन्दक् येशु ख्रीष्ट् धङ् धम्बे थुगी ॱनङे झ्यम्बे लम्नी ङदङ् दल कीदुक् च्यीक् झ्यीन ङे ढीक्ल को़न्ज्योक्ल ॱसुव तोप्रो झ्यीज्यीत्। 31 यहुदीयान यो़प्पे छ्य मीत् स्योक्केन् घयेक्की लक्ल ङ ॱस्योर्च्ये मीप्पल धङ् यरुशलेम्दु को़न्ज्योक्की मी चङ्म घयेत्ल फेम्ब युङ, ङे चेन्ड खुर्न टेप्प दील हुब गस्सी छोर्च्ये यो़प्पे ढीक्ल ॱसुव तोप्रो झ्यीज्यीत्। 32 हुनी क को़न्ज्योक्की थुल यो़त्न, ङ ॱसीम् गव झ्यीन खीत्रङ् च्येल्ल ॱलीत् योङ्। ॱनी हुदु खीत्रङ्दङ् कङ्ज्यीक्ल देत्नी, ङल ॱलोप्स्यीक् छ्यीदु ॱङीक्केन् बेत्। 33 स्यीव दीव ॱनङ्गेङ्गी को़न्ज्योक् खीत्रङ् घयेत्तङ् दल स्युज्ये यो़प्प स्योक्च्यीत्। आमेन्। |
© 1995 Wycliffe Bible Translators, Inc. and Nepal Bible Society
Wycliffe Bible Translators, Inc.