रोमी 14 - ल्होमीच्यीक्तङ् च्यीक्ल ङीब ॱमीत् कोबे ढीक्ल १-१२ राङगी पी़ज्याल ङीब कोप्च्ये मीत् योङगेन् 1 खीत्रङ्गी छीक्न छ्य योक्या च्येम्मे मी हुगी ॱसम्ल रङ्स तोङ्गो़त्न, हुगोदङ् थुक्री ॱमत् चीय, डीक्न दो़च्च्यीत्। 2 मी च्यीक्की समे ढङ् कुरीक् सेन अक्, डीक्केन् बेत् ॱनो़नी, देङ् खीन सगेन् बेत्। ॱनी यङ् छ्य योक्या च्येम्म दीगी ॱस्य सज्ये मीत् युङ्गेन् बेत् ॱनो़ब ॱसम्गेन् बेत्। 3 ॱनी समे ढङ् कुरीक् सगेन् दीगी यङ् कुरीक् मीत् सगेन् दी आक्तोक्ल ॱमत् तोङ्ज्यीत्। ॱनी सम कुरीक् मीत् सगेन् दीगी कुरीक् सगेन् दील ङीब ॱमत् कोप्च्यीत्। घन्ड हीन् सीन्न हुगी मी हुगो को़न्ज्योक्की स्यागी स्यीबे मी बेत्। 4 ॱयोङ्मागी ॱयोक्पुल ङीब कोप्केन् खो़त् ॱसु हीन् सीक्केन्? हुगो ज्येब धङ् फम्ब रोरङ्गी दक्पी़ लक्ल यो़क्केन् बेत्। हुगो ज्येगेन् बेत्। चोव ज्यीन्दक्की हुगो ज्येदु ची़त् छुगेन् बेत्। 5 मी यरीगी ङीन् च्यीक् ङीन् ॱयोङ्माले चा छ्यीया ॱसम्गेन् बेत्। ॱनी मी यरीगी यङ् ङीन् कुरीक् डस्सी डस्सी हीम्ब ॱसम्गेन् बेत्। ॱनी म दी घन्ड ॱसम्न आक्, हुगो ॱसोस्सोरङ्गी ॱसीम्ल देङ् खीब युङ् गोगेन् बेत्। 6 ङीन् च्यीक् ङीम ॱयोङ्माले चा छ्यीया ॱसम्गेन् दीगी चोव ज्यीन्दक्की ढीक्ल ॱसम्गेन् बेत्। सम कुरीक् सगेन् दीगी को़न्ज्योक्ल थु छ्यी पुन चोव ज्यीन्दक्ल तो़प्पे ढीक्ल सगेन् बेत्। ॱस्य मीत् सगेन् दीगी को़न्ज्योक्ल थु छ्यी पुन चोव ज्यीन्दक्ल तो़प्पे ढीक्ल मीत् सगेन् बेत्। 7 हज्यरङ् ॱसोम्बु यो़प्प हीगो ॱसु उक् रोरङ्गी ढीक्ल मेम्बेत्। ॱनी यङ् ॱस्यीन आक्, हज्यरङ्गी ढीक्ल मेम्बेत्। 8 हज्यरङ् ॱसोम्बु यो़प्प हीगो चोव ज्यीन्दक्की मी हीम्बल डोगेन् बेत्। ॱनी हज्यरङ् ॱस्यीन ॱनी, चोव ज्यीन्दक्की मी ॱस्यीयल डोगेन् बेत्। हुगो झ्यीनी हज्यरङ् ॱसोम्बुरङ् यो़त्, यङ् ॱस्यीनरङ् खुर्न आक्, हज्यरङ् चोव ज्यीन्दक्की मी बेत्। 9 घन्ड हीन् सीन्न ॱस्यीनर धङ् ॱसोम्बु यो़प्प घयेक्की थोक्ल ख्रीष्ट् चोव ज्यीन्दक् खो़च्च्येल खोङ् ढोङ्नी यङ् ॱसोम्बुल लोङ्न यो़क्केन् बेत्। 10 खोक्की घन्डल रङ्गी पी़न्ज्याल ङीब कोप्केन्? घन्डल आक्तोक्ल तोङ्गेन्? हज्यरङ् कुरीक्ल को़न्ज्योक्की ठीम् च्यो़क्केन् बेत्। 11 हीगी ढीक्ल ॱसुङ्रप्ल चोव ज्यीन्दक्की ॱसुङ ढीन यो़क्केन् बेत्। ङे दोङ्दु मी छङ्म थम्ज्येत् पीमुङ् चुन छ्यक् छो़ गो़ ॱस्यर्केन् बेत्। मी छङ्म थम्ज्येक्की खनी ङल को़न्ज्योक् बेत् सीन्न सीर् गो़ ॱस्यर्केन् बेत्। ङ ॱसोम्बु यो़प्प हीम्बे लम्नी हीगो खुङ्देन् हीम्बल ङ धक्पर् झ्यीक्केन्। (यशैया ४५:२३) 12 हज्यरङ् रीदङ् रीगी को़न्ज्योक्ल ॱसोस्सोरङ्गी घङ् झ्यीबे लेगी चीस्यी पु गो़ ॱस्यर्केन् बेत्। छ्य योक्पोक्मल च्यो़न् मीत् युङे लेमु १३-२३ 13 हीगो झ्यीनी ह हीनी झ्यीब दी हज्यरङ्गी च्यीक्तङ् च्यीक्ल ङीब ॱमत् कप्तोङ्ज्यीत्। पी़न्ज्या नङ्दु च्यीक्तङ् च्यीक्ल भर्च्येत् तङ्न दीक्प ङो़ल छ्यी़दु ॱमीत् ची़त् ॱनो़बे लेमु झ्यीज्यीत्। 14 समे ढङ् घङ्गो दील अक् ढीप् मीत् युङ्गेन् बेत्। ॱनी हुगी सम दील मी च्यीक्की यङ् चङ्ज्ये मीप्प ढीप् यो़प्प ॱसम्न ॱनी, हुगी मी दील हुन्दुक् दीरङ् युङ्गेन् बेत्। हीगो खुङ् हीम्बल चोव ज्यीन्दक् येशुदङ् मत् ढेबल ङ देङ् खीज्युङ्। 15 रङ्गी सेबे समे झ्यीत् झ्यीक्की पी़न्ज्या ॱयोङ्ल ॱसीम्ब नदु ची़त्न ॱनी, हुगो झ्यम्बे लेल मीत् डोगेन् बेत्। ख्रीष्ट् हुगी पी़न्ज्या हुगी ढीक्ल ढोङ बेत्। ॱनी रङ्गी सेबे समे हुगो खरप्ल ॱमत् तोङ्ज्यीत्। 16 रङ्गी गङ्ज्येन् बेत् ॱनो़न ॱसम्ब दील ॱयोङ्ल ङेन्दम् लप्से लुङ्दक् ॱङीत्तु ॱमत् ची़च्च्यीत्। 17 घन्ड हीन् सीन्न को़न्ज्योक्की ज्यागक्की लेमु हुगो सय धङ् थुङे ढीक्ल मेम्बेत्। हुगो ढङ्बु युङ, ॱसीम् दीव युङ धङ् धम्बे थुनी झ्युङे ॱसीम् गव युङे ढीक्ल बेत्। 18 ॱसु हुन्दुक् झ्यीबे लेमुल देत्न ख्रीष्ट्ल स्यप्च्यी़ ज्युक्कुक्क हुगोल को़न्ज्योक् थु गुव धङ् मी घयेक्की इक् गस्सी हीम्ब छोर्केन् बेत्। 19 हज्यरङ् नङ्दु स्यीव युङे लेमु धङ् च्यीक्तङ् च्यीक्की धेप्पल फेन् थोबे लेमु घयेत् झ्यीत् छुज्ये यो़प्प झ्यीदोङ्ज्यीत्। 20 समे झ्यीत् झ्यीक्की को़न्ज्योक्की ले मीत्तल ॱमत् तोङ्ज्यीत्। हीम्ब त समे ढङ् कुरीक् ढीप् मीप्प, चङ्बोक्म यो़क्केन् बेत्। ॱनी हीन्न अक्, सम सेबे लेगी ॱयोङ्ल ॱनो़त्न दीक्प ङो़ल छ्यी़दु ची़त्न ॱनी, हुगो ङीबल डोगेन् बेत्। 21 रङ्गी ॱस्य सेन धङ् गोङ्ज्यङ् थुङे लेगी रङ्गी पी़न्ज्या ॱनत्त दुगो़त्न ॱनी, रङ्गी हुगो मत् सेब धङ् ॱमत् थुङ गा युङ्गेन् बेत्। 22 हीगी ढीक्ल रङ्गी डीक्केन् बेत् ॱनो़न देङ् खीबे से घङ्गो हीन्न अक्, हुगो रङ् धङ् को़न्ज्योक् पी़प्पे ॱयोङ्ल हुगो ॱमत् टोम्। मी ॱसी़ घङ्गो गा बेत् ॱनो़ब छोर्न झ्यीक्को़दङ् हुगी ढीक्ल रोरङ्गी रोरङ्ल ङीब ॱमीत् कोप्केन् दी ॱसोदी च्येम्म युङ्गेन् बेगो। 23 ॱनी यङ् सज्ये युङ्गो़दङ्, मीत् युङ्गो़दङ् ॱनो़न सगेन् दील को़न्ज्योक्की छ्येप्प को़गेन् बेत्। घन्ड हीन् सीन्न हुगो छ्य तेन्ज्ये मत् स्यक्पल सेबल डोगेन् बेत्। छ्य तेम्बर् मीत् स्योक्केङ्गी ले घङ्गो दी इक् दीक्प बेत्। |
© 1995 Wycliffe Bible Translators, Inc. and Nepal Bible Society
Wycliffe Bible Translators, Inc.