रोमी 13 - ल्होमीस्युङ्गी पेम्बी़ ॱवङ्गी होक्ल दो़त् गोगेन् १-७ 1 खीत्रङ् ॱसोस्सो स्युङ्गी पेम्बु घयेक्की ॱवङ्गी होक्ल दो़च्च्यीत्। घङ् यो़प्पे ॱवङ् च्येम्म घयेत् कुरीक् को़न्ज्योक् च्यानी खो़त्न युङ्गेन् बेत्। 2 हीगो झ्यीनी मी ॱसु स्युङ्गी पेम्बी़ डल लोङ्गुक्क हुगो को़न्ज्योक्की कट्टीम्ल ङीगेल्ल डोगेन् बेत्। हुन्दुक् झ्यीबल छ्येप्प फोक्केन् बेत्। 3 पेम्बु घयेत् हुब ढङ्बु झ्यीक्केन् घयेत्ल ज्यीब ॱलोङ्ज्येल मेम्ब, ङीब झ्यीक्केन् घयेत्ल ज्यीब ॱलोङ्ज्येल खो़त्न यो़क्केन् बेत्। हीगो झ्यीनी रङ् ज्यीब मीप्प दो़च्च्ये ॱनो़न ढङ्बु झ्यीज्यीत्। हुनी हुगी रङ्ल तो़प्प झ्यीक्केन् बेत्। 4 हुगी पेम्बु हुगो रङ्गी ढीक्ल फेन् थोब झ्यीक्केन् को़न्ज्योक्की ॱयोक्पु बेत्। ॱनी रङ्गी ङीब झ्यीन ॱनी, ज्यीब झ्यीज्यीत्। घन्ड हीन् सीन्न पेम्बी़ धो़म्मीत्ल ढी पदङ् मीत् सीर्केन् बेत्। हुगो को़न्ज्योक्की ॱयोक्पु झ्यीनी, हुगी लम्नी ङीब झ्यीक्केन् घयेत्ल को़न्ज्योक्की छ्येप्प को़गेन् बेत्। 5 हुगो झ्यीनी छ्येप्प फोक् योङ ॱनो़न मेम्ब, ॱसीम्नी सङ् ङेन् नम् च्येत्न स्युङ्गी पेम्बी़ ॱवङ्गी होक्ल दो़त् गोगेन् बेत्। 6 हुब को़न्ज्योक्की ॱयोक्पु गेन् खुर्न ले झ्यीक्केङ्गी पेम्बु झ्यीनी, हीगी ढीक्ल खीत्रङ्गी हुबल ठेम आक् जप्केन् बेत्। 7 ॱसु ॱसुल टो़त् गोगुक्क हुल टो़च्च्यीत्। ॱसुल ठेम जप्च्येम दुक्क हुल जोप्च्यीत्। ॱसुल गोल जप्च्येम दुक्क हुल जोप्च्यीत्। ॱसुल ज्यी गोगेन् बेक्क हुल ज्यीब झ्यीज्यीत्। ॱसुल तो़प्प झ्यीत् गोगेन् बेक्क हुल तो़प्प झ्यीज्यीत्। झ्यम्बे क धङ् मीजीगी छ्यलु ८-१४ 8 खीत्रङ् नङ्जोदु झ्यम्ब झ्यीत् गोगेङ्गी लेमु हुगो मेन्द, खीत्रङ् ॱसुल आक् भुलीन् मीप्प युङ झ्यीज्यीत्। मी ॱयोङ्ल झ्यम्ब झ्यीक्केन् हुगी छ्यो़डीम्गी क छङ्मल चीगेन् हीम्बल डोगेन् बेत्। 9 छ्यो़डीम्ल थो़ङ्गेन् बेत्। ॱयोङ्दङ् मत् ङीज्यीत्। मी ॱमत् ॱसो़च्च्यीत्। की़न्नक् ॱमत् कुज्यीत्। ॱमीक् छक्प मत् झ्यीज्यीत् सीक्केन् हीगोदङ्, ॱनी छ्यो़डीम्गी क ॱयोङ्म घयेक्की चव दी दी़न हीगोल डोगेन् बेत्। रङ्गी लोल यो़क्केङ्गी मील रङ्गी रङ् डस्सीरङ् ॱसम्न झ्यम्ब झ्यीज्यीत् सीर यो़क्केन् बेत्। (थो़म्ब २०:१३-१५,१७) 10 झ्यम्ब झ्यीक्केङ्गी मी रोरङ्गी लोल यो़क्केङ्गी मी ॱसुल आक् ॱनो़त् च्यो़गेङ्गी ले घन्ड अक् मीत् झ्यीक्केन् बेत्। हीगो झ्यीनी झ्यम्ब झ्यीक्केङ्गी ले हुगो छ्यो़डीम्गी क छङ्मल चीगेन् हीम्बल डोगेन् बेत्। 11 हीगी दङ् हरीङ्गी धी़ हीगो घन्ड बेक्क हुगो खीत्रङ्ल ॱस्यो़च्च्ये यो़ट्टो। हुगो झ्यीनी हुन्दुक् झ्यीज्यीत्। छी थर्वल थो़म्बे धी़ दी हज्यरङ्गी गोम छ्य स्योक्पे यङ्गी धी़ले हुन्दो ङीया ॱलीत्न यो़क्केन् बेत्। ह खीत्रङ् ॱङीत् सेत्न लोङ् रेम्बे धी़ ॱलीत् छर बेत्। 12 ह छेन् यो़ज्येम झ्यीन नम् लोङ्ज्येम ॱयेङ् छर बेत्। हीगो झ्यीनी हज्यरङ्गी मेन्नक्की ले घयेत् फङ्नी मेङ्गे छो़न्ज्य घयेत् ज्येन्न देत्तोङ्। 13 च्युक्कोङ, छ्यङ्दुङ् तोमुल जोम्न ॱमम्बी ॱलोङ्गेन्, छ्ये ज्युक्केन्, छ्येल ॱनक्सी झ्यीक्केन्, थक्मु ज्यक्केन् धङ् सीगुक् झ्यीक्केन् हुन्दुक् झ्यीबे लेमु मत् झ्यीब, ङीम्मु मेङ्गल यो़प्प डस्सी हज्यरङ्गी मीजीगी छ्यलु दी गङ्ज्येन् युङ झ्यीदोङ्ज्यीत्। 14 हीन्दुक् झ्यीन चोव ज्यीन्दक् येशु ख्रीष्ट् खीत्रङ्गी घो़ल घो़म्ब डस्सी झ्यीज्यीत्। कोलीमी ॱसीम्नी लङे धेत्मो़ ङेम्बे लेमु हुगो डुप्तु ॱमत् ची़च्च्यीत्। |
© 1995 Wycliffe Bible Translators, Inc. and Nepal Bible Society
Wycliffe Bible Translators, Inc.