रोमी 11 - ल्होमीइस्राएली ॱलो़ तङ धङ् ॱमत् तङे ढीक्ल १-१० 1 ङ ढीगेन् हीन्। हुगो हीन्न, को़न्ज्योक्की खोङ् रोरङ्गी मीस्सीर् इस्राएली ॱलो़ तङ् तङ बेक्क ॱनी? ॱस्युली ॱमत् तङ बेत्। ङरङ् इस्राएली हीन्। अब्राहाम्गी ज्यी़त् बेन्यामीन्गी दुङ्ज्यी़त्ल छ्येप्प हीन्। 2 ॱङो़न् धङ्बुदु खोङ्गी दम्न यो़क्केन् खोङ् रोरङ्गी मीस्सीर् इस्राएली ॱलो़ ॱमत् तङ बेत्। (ॱसुङ्रप्की गुल्लु ९४:१४) ॱसुङ्रप्ल थो़ङ्गेन् इस्राएली घयेक्की ङीबे ढीक्ल एलीयागी को़न्ज्योक्ल हीन्दुक् सीन्न ॱस्येप्प थो़ङ्गेन् बेत्। हीगो खीत्रङ्ल ॱस्यो़च्च्ये यो़ट्टो। 3 चोव ज्यीन्दक्, नीज्यरङ्गी कलुङ् ॱस्यो़क्केन् घयेत् हुबे ॱसेत् तङ बेत्। नीज्यरङ्ल छ्यक् छ्यो़प्प पुस घयेत् हुबे ॱरुम् तङ बेत्। ॱनी ङ च्यीक्पुरङ् ॱसो़न यो़त्। ॱनी ङ अक् त हुबे ॱसो़च्च्येमे झ्यी़ तगुक्। (१ ज्याबु १९:१०,१४) 4 हीगी लेल्ल को़न्ज्योक्की हीन्दुक् ॱसुङ थो़ङ्गेन् बेत्। बाल्ल छ्यक् ॱमीत् छो़गेन् मीरङ् तोङ्डक् दी़न्जो़त् च्यीक् ङे ङरङ्गी छ्योल स्यक्न यो़त्। (१ ज्याबु १९:१८) 5 ॱनी हीगो डस्सी हुन्दो ओक् थुज्यी जेत्न हुबे छीक्नी ॱल्हक्टो़ च्यीक् दम्न यो़क्केन् बेत्। 6 ॱनी हीगो थुज्यी जेत्न दम्ब हीन्न ॱनी, हुगो कोलीमी रङ्स्यीगी झ्यीन युङल मीत् डोगेन् बेत्। हुगो रङ्स्यीगी झ्यीबे युङ्गो़त्न ॱनी, थुज्यी हुगो थुज्यी दीरङ् मेम्बल डोगेन् बेत्। 7 ॱनी हुगो हीन्न, घन्ड सीक्केन्? इस्राएली घयेक्की ॱयेङ दी त कुरीक्की ॱयेङ बेत्। ॱनी हीन्न अक्, कुरीक्ल ॱमत् ॱङीब बेत्। दम्बे मी घयेत्लरङ् क हुगो ॱङीब बेत्। ॱयोङ्मा घयेक्की ॱसीम् दी गट्टक्पल ॱसोङ बेत्। 8 हीगी ढीक्ल ॱसुङ्रप्ल हुब घयेत्ल को़न्ज्योक्की घुवे ॱसीम् ॱनङ्नी, हजो़त् थुक्ल हुबे ॱसीम्बे ॱमीक्की ॱमीत् थोङ्गेन् बेत्। आम्ज्योक्की इक् मीत् घोगेन् बेत् सीर थो़ङ्गेन् बेत्। (ठीम्लु २९:४) 9 हीगी ढीक्ल दाऊद्गी इक् सीक्केन् बेत्। हुबे ग ग ढो़त् ढो़त् दी ॱङीङ्ल सीम्ब धङ् च्यीम्ल थीब डस्सी झ्युङ्न, हुबल छ्येप्प फोक्ल ज्युक्च्यीत्। 10 हुब ॱमीक्की ॱमीत् थोङ्गेल्ल स्यर्ल ज्युक्च्यीत्। च्युगागी खेदे ज्यीत्तुक्की हुबे कीक्कुर दी छीगङ् घुक् घुक्प युङ ज्युक्च्यीत् सीर थो़ङ्गेन् बेत्। (ॱसुङ्रप्की गुल्लु ६९:२२-२३) ज्यी़त् ॱयोङ्गी मी इक् थर्केन् ११-२४ 11 हरुङ्द ङ ढीगेन्। यहुदी हुब ॱनत्त दुन दप्नी, लोङ् दीरङ् ॱमीत् छुगेल्ल ॱसोङ बेक्क ॱनी? ॱस्युली मेम्बेत्। हुबे ङीब झ्यीब दीगी ज्यी़त् ॱयोङ् ॱयोङ्गी मी घयेत् थर्वे लम्ल थो़न् छुगेल्ल झ्युङ बेत्। ॱनी हीगो हुबल ठदोक् लङ्दु ची़च्च्येगी ढीक्ल बेत्। 12 ॱनी हुन्दुक् झ्यीन हुबे ङीब झ्यीब दीगी धङ् हुबल घी़न्नक् झ्युङ दीगी जम्बुलीङ् धङ् ज्यी़त् ॱयोङ् ॱयोङ्गी मी घयेत्ल नोर् डस्सी थोप्को़त्न ॱनी, हुब छङ्म छी थर्न युङ् छुन, ॱसुम्ब हुले त ज्यीक्पा थोप्को़ट्टो। 13 ङ ह खीत्रङ् ज्यी़त् ॱयोङ् ॱयोङ्गी मी घयेत्ल हीगो ॱस्यो़क्केन्। ङ ज्यी़त् ॱयोङ्म घयेक्की ढीक्ल ठीक्नलल खो़त्नी, हीगी ढीक्ल ङल तम्दो़त् यो़त्। 14 ॱनी ङे तम्दो़त् हीगो ङरङ्गी ज्यी़क्की मी घयेत्ल ठदोक् लङ्दु ची़त्न, हुनी हुब यरी ङे छी थर्वल तो़न् छुगो़ट्टो ॱनो़ब खुको़र्त्। 15 हुब घयेत् खोङ्गी ॱलो़ तङ् तङ झ्यीनी, हुगी दोक् दील को़न्ज्योक्तङ् जम्बुलीङ् डीक्च्या झ्युङ बेत्। हुब लोक्न युङ्न ॱनी, खोङ्गी हुब ॱङस्से ॱङन्नेल्ल सोगेन् बेत्। हीगी दोक् दील ॱस्यीनरनी ॱसोम्बुल लोङदङ् छ्येत्मीत् युङ्गेन् बेत्। 16 को़न्ज्योक्ल समे फी़त् ढोप्ची च्यीक् पुज्येल पी़त्न स्यक्न ॱनी, हुगोदङ् मुल लोक्पे ढोप्ची घयेत् दी इक् जेङ् पी़त्न स्यक्पदङ् छ्येत्मीत् चङ्बोक्म युङ्गेन् बेत्। दोङ्बी़ चव दी को़न्ज्योक्ल ॱमीन चङ्बोक्म यो़त्न ॱनी, हुगी यल्लक् घयेत् दी इक् चङ्बोक्म युङ्गेन् बेत्। 17 धेन्द झ्यीन ॱसो़बे ओलीप्की दोङ्बी़ यल्लक् यरी चप् तङ बेत्। हीगी दोङ्बु हीगो यहुदीगी ज्यी़त् बेत्। ॱनी ज्यी़त् ॱयोङ्गी मी रङ् रीगल यो़क्केङ्गी ओलीप्की दोङ्बी़ यल्लक् बेत्। ॱनी हीन्न अक्, रङ् म दी ॱसो़बे दोङ्बी़ चवल थी़त्न, हुगी यल्लक् घयेत्तङ् दल थी़त्न यो़क्केन् बेत्। ॱनी हुगी दोङ्बी़ ॱङीङ्ज्यु दी रङ्ल अक् ज्युक्केन् बेत्। 18 यल्लक् चप् तङ हुबे गोल थो़न्न रङ् तम्दो़त् ॱमत् ॱस्यो़च्च्यीत्। ॱस्येत्न ॱनी, हीन्दुक् झ्यीबे ॱसम्ल तोङ्। रङ् यल्लक्रङ् हीन् ॱनो़ब ॱसम्। यल्लक् रोरङ् रङ्गी ॱमीत् खुर, चव दीगी खुर्केन् बेत्। 19 रङ्गी हीन्दुक् सीगो़ट्टो। यल्लक् हुगो चोप्च्ये दी ङदङ् थी़च्च्येल चब बेत्। 20 हीगो खुङ्देन् बेत्। हुबे छ्य मत् स्यक्पल हुब चप् तङ बेत्। ॱनी यङ् रङ् ॱमत् चब स्योक्च्येगी धो़न् दी रङ्गी छ्य स्यक्प दीगी बेत्। हीगी ढीक्ल रङ् तम्दो़त् मत् लङ, बोर ज्यीब खुर्न दो़च्च्यीत्। 21 दोङ्बु ॱङो़मे यल्लक् त को़न्ज्योक्की फङ मीप्प चोप्को़त्न ॱनी, रङ् ॱसुम्ब हुले ॱमत् फङा चोप् छुगेन् बेत्। 22 को़न्ज्योक् घन्दुक्मे गय धङ् घन्दुक्मे चुब दुक्क हुल तो़ज्यीत्। यहुदी हुबे ङीब झ्यीनी, खोङ्गी हुबल चुप्सी झ्यीब बेत्। ॱनी रङ् खोङ्गी ॱङीङ्दु ॱस्योङ झ्यीन ॱनी, रङ्ल खोङ्गी गय जेक्केन् बेत्। स्येन् रङ् अङ् चोप्केन् बेत्। 23 हुब घयेत् छ्य मीत् स्योक्केङ्गी लम् दीनी लोक्न युङ्न ॱनी, को़न्ज्योक्की यङ् हुब घयेत् दोङ्बी़ चव दील थी़क्केन् बेत्। को़न्ज्योक्की फीच्च्य यङ् थी़त् छुगेन् बेत्। 24 रङ् ज्यी़त् ॱयोङ्गी मी रीगे ओलीप्की दोङ्बी़ यल्लक्तङ् छ्येत्मीत् बेत्। ॱनी रीगे ओलीप्की दोङ्बी़ यल्लक् चप्न धेन्द झ्यीन ॱसो़बे ओलीप्की दोङ्बु रङ्सल त थी़क्केल्ल धेन्द झ्यीन ॱसो़बे ओलीप्की दोङ्बुनी चबे यल्लक् ॱसुम्ब रोरङ्गी चवल ले ॱल्हस्सी थी़त् छुगेन् बेत्। इस्राएली घयेत्ल छी थर्व युङ्गेन् २५-३२ 25 पी़न्ज्यासो, ङे खीत्रङ्ल एल्ला ॱमत् तो़म्बे ॱङीङ्बु च्यीक् ॱस्येत् योङ्। हीगो ङे ॱमत् ॱस्येत्न, खीत्रङ्रङ् रङ्स्यीगी घङ् ॱस्यीब दीले ॱल्हक्मा ॱमीत् ॱस्यीगेन् बेत्। हीगो को़न्ज्योक् च्याल ज्यी़त् ॱयोङ् ॱयोङ्गी मी घयेक्की ढङ्ज्युक् दी नम् छीदेन् ॱलीत् ॱलीत् थुक्ल इस्राएली छ्यो च्यीक्की ॱसीम् दी गट्टक्प दीरङ् ॱमीत् ॱसेङ लेगेन् बेत्। 26 हुनी क हस्सो़त् इस्राएली घयेत् कुरीक्ल छी थर्व युङ्गेन् बेत्। हीगी ढीक्ल को़न्ज्योक्की ॱसुङ ॱसुङ्रप्ल थो़ङ्गेन् बेत्। सीयोन्नी च्यप्को़न् थो़न्न युङ्गेन् बेत्। ॱनी याकुब्गी ज्यी़क्की को़न्ज्योक् ॱमत् ॱसम्बे ङीब घयेत् खोङ्गी टी़क्केन् बेत्। 27 हुबदङ् ङ हीन्दुक् झ्यीबे कगो़त् धम्स्यक् च्यीक् स्योक्केन्। हुबे दीक्प घयेत् ङे धक्तु ची़क्केन्। (यशैया ५९:२०-२१) 28 ॱनी केच्च्य ॱनेम्बुल ॱमीत् ॱसम्ब यहुदी हुब हुन्दो को़न्ज्योक्की डल यो़क्केन् बेत्। हीगो खीत्रङ् ज्यी़त् ॱयोङ् ॱयोङ्गी मील फेन्सी झ्युङ बेत्। ॱनी हीन्न अक्, हुब को़न्ज्योक्की दम्बे मी झ्यीनी, हुबे पुबु ॱमुमी़ लम् ज्यी़त्नी हुब को़न्ज्योक्की झ्यम्बे मी हीम्बल डोगेन् बेत्। 29 घन्ड हीन् सीन्न को़न्ज्योक्की घन्डे ॱनङ्ज्येत् ॱनङ्न यो़दङ् हुल ॱलोक्लेत् सीन्न ॱमीत् ॱसुङ्गेन् बेत्। ॱनी खोङ्गी ॱसु भो़न यो़दङ् हुगोल मीत् युङेत् सीन्न ॱमीत् ॱसुङ्गेन् बेत्। 30 खीत्रङ् ज्यी़त् ॱयोङ् ॱयोङ्गी मी घयेक्की एल्लानीरङ् को़न्ज्योक्की कल ॱमत् चीय यो़क्केन् बेत्। ॱनी हुन्दो यहुदी हुबे को़न्ज्योक्की कल ॱमत् चीय हीम्बे लम्नी खीत्रङ्ल को़न्ज्योक्की ॱङीङ्ज्यी थोब बेत्। 31 को़न्ज्योक्की खीत्रङ् ज्यी़त् ॱयोङ् ॱयोङ्गी मील ॱनङे ॱङीङ्ज्यी दीगी हुब हरुङ् खल मीत् नेङ्गेल्ल ॱसोङ बेत्। ॱनी हीगो हुबल अक् खोङ्गी ॱङीङ्ज्यी जेच्च्ये यो़प्पे ढीक्ल बेत्। 32 मी छङ्म थम्ज्येत्ल को़न्ज्योक्की ॱङीङ्ज्यी ॱनङ् छुज्ये यो़प्पल खोङ्गी मी कुरीक् खल मीत् नेङ्गेङ्गी लेमुल तङ्न स्यक्प बेत्। को़न्ज्योक्ल तो़प्पे तम् ३३-३६ 33 को़न्ज्योक्की झ्यी़रीक् धङ् ॱस्यीरप् रीक्प हुगो घन्दुक्मे तीङ् सब दुक्क। खोङ्ल घन्दुक्मे नोर्की भङ्जेत् दुक्क। खोङ्गी ठीम् तये लेमु हुगोल नम् च्येत्न तेन आक्, ॱस्यीदोक्प दीरङ् मीन्दुक्। खोङ्गी लुस घयेत् हुगो ॱह दीरङ् घो छुदोक्प मीन्दुक्। 34 चोव ज्यीन्दक्की थुल त छुगेन् दी ॱसु दी यो़प्प बेक्क? खोङ्ल ढो़ टो़क्केन् दी ॱसु दी यो़प्प बेक्क? 35 खोङ्ल ॱसु दीगी घन्ड बीन्न ढीन् छक्न यो़त् सीक्केन्? सीर थो़ङ्गेन् बेत्। (यशैया ४०:१३) 36 छङ्म थम्ज्येत् घङ् यो़प्प घयेत् कुरीक् खोङ्गी च्यानी झ्युङ बेत्। खोङ्गी सो़ब बेत्। खोङ्गी धो़ल्ल बेत्। खोङ्ल धी़ नम ज्यी़न्दु तो़प्प युङ् युङ युङ्ज्ये यो़प्प स्योक्च्यीत्। आमेन्। |
© 1995 Wycliffe Bible Translators, Inc. and Nepal Bible Society
Wycliffe Bible Translators, Inc.