रोमी 10 - ल्होमी1 पी़न्ज्यासो, इस्राएली घयेत् छी थर्वल थो़न्ज्ये यो़प्पल, ङल च्युगा छ्यीम्मु दुक्। हुब थरे ढीक्ल ङे को़न्ज्योक्ल ॱसुव तप् तब झ्यीक्को़त्। 2 हुबे म दी को़न्ज्योक्ल धेप्पे स्यीदङ् लङ्न छ्योरी छ्यीम्मु झ्यीक्केन् बेत्। म ज्युप्स्यी दी हुबे गन्दीक्म धो़न् ॱह मीत् घोगेन् बेत्। हीगो ॱङो़न्ने हीम्ब ङल ॱस्यो़च्च्ये यो़त्। 3 को़न्ज्योक्की ॱनम्बर् धक्पल तो़म्बे लेमु हुबे ॱह मीत् घोगेन् बेत्। हुब रोरङ्सो रङ्स्यीगी ॱनम्बर् धक्पल थो़न् छुज्ये ॱनो़ब झ्यीक्केन् बेत्। को़न्ज्योक्की ॱनम्बर् धक्पल तो़म्बे लेमुल हुब घुक्न मत् युङ बेत्। 4 ख्रीष्ट्ल छ्य स्योक्केन् घयेत्रङ् को़न्ज्योक्की ॱनम्बर् धक्पल तो़ङ्गेन् बेत्। ॱनी छ्यो़डीम्गी स्युक् छङ्म डुप्केन् दी खोङ्जो बेत्। थर्वे लेमु ज्यी़त् कुरीक्की ढीक्ल बेत् ५-२१ 5 छ्यो़डीम्गी क कुरीक्ल चीन युङ्न ॱनी, ॱनम्बर् धक्पल थो़ङ्गेन् बेत्। हीगी ढीक्ल मोशागी हीन्दुक् सीन्न ढीन यो़क्केन् बेत्। छ्यो़डीम्गी क कुरीक्ल चीन युङ्गेन् दील छी थोप्केन् बेत् सीर यो़क्केन् बेत्। (लेवी १८:५) 6 ॱनी छ्य स्यक्पे लुनी ॱनम्बर् धक्पल थो़म्बे ढीक्ल यङ् हीन्दुक् सीर थो़ङ्गेन् बेत्। रङ्गी ॱसीम्बे नङ्ल हीन्दुक् मत् सीर्। ॱसु दी तेङ् यी़ल ॱलीत् छुगेन्? सीर यो़क्केन् बेत्। हीगी धो़न् दी ख्रीष्ट् इगीनी मल्ल ठीक्तु युङ्गेल्ल सीक्केन् बेत्। 7 ॱनी यङ् ॱसु दी ॱमीगी होक् यी़ल डो छुगेन्? सीर यो़क्केन् बेत्। हीगी धो़न् दी ख्रीष्ट् ढोङ्नरनी ॱसोम्बुल ॱलोङ्न ठीक्तु युङल सीक्केन् बेत्। 8 हीगो डस्सीगी लेमुल युङ् मीत् गो़ब, को़न्ज्योक्की केच्च्य रङ्गी ॱस्यच्चन, रङ्गी खन रङ्गी ॱसीम्ल स्युन यो़क्केन् बेत् सीर थो़ङ्गेन् बेत्। (ठीम्लु ३०:१२-१४) ॱनी हुगो क हस्सो़त् छ्य स्योक्च्यीत् सीन्न ङीक्की ॱस्यो़क्केङ्गी केच्च्य दी बेत्। 9 हुगो झ्यीनी रङ्गी खनी येशु ङे चोव ज्यीन्दक् हीन् सीन्न धङ् ॱसीम् दीनी यङ् को़न्ज्योक्की खोङ् ढोङ्नरे ॱसनेनी ॱसोम्बुल ॱलोङ बेत् सीरल छ्य स्यक्न युङ्न ॱनी, हस्सो़त् रङ् थर्न तेङ् यी़ल ॱलीक्केन् बेत्। 10 ॱनम्बर् धक्प थो़न्ज्येल छ्य दी ॱसीम्बे यीक्नी स्यक्न युङ् गोगेन् बेत्। ॱनी छी थर्व युङल हुगो खनी छीक्टल सीन्न युङ् गोगेन् बेत्। 11 हीगी ढीक्ल ॱसुङ्रप्ल थो़ङ्गेन् बेत्। ॱसी़ खोङ्ल छ्य स्योक्कुक्क हुगो ॱने फम्ब मीत् युङ्गेन् बेत् सीर थो़ङ्गेन् बेत्। (यशैया २८:१६) 12 हील दम्ङीत् मीत् युङ्गेन् बेत्। यहुदीरङ् हीन्, ज्यी़त् ॱयोङ्गी मीरङ् हीन्न अक्, हुगो च्यीक्प युङ्गेन् बेत्। घन्ड हीन् सीन्न छङ्म थम्ज्येक्की चोव ज्यीन्दक् दी खोङ् च्यीक्पुरङ् बेत्। खोङ् ॱसी़ डेन् ज्यक्कुक्क हुगोल खोङ्गी नोर्की लोङ्ज्यो़त्ल पीब ॱनङ्गेन् बेत्। 13 हीगोल पीब ॱसुङ्रप्ल मी ॱसी़ चोव ज्यीन्दक्की छेन् डेन् ज्यक्कुक्क हुगो छी थर्वल थो़ङ्गेन् बेत् सीर थो़ङ्गेन् बेत्। (योएल् २:३२) 14 ॱनी म दी खोङ्ल छ्य दीरङ् स्योक्च्ये ॱमत् ॱनोङ्न ॱनी, घन्दुक् झ्यीन खोङ् डेन् ज्यक् छुगेन्? खोङ्गी ढीक्की केच्च्य दीरङ् ॱह मत् घोवे, घन्दुक् झ्यीन खोङ्ल छ्य स्योक् छुगेन्? ॱनी केच्च्य ॱस्यो़क्केन् दीरङ् मीत्न ॱनी, घन्दुक् झ्यीन ॱह घोगेन्? 15 केच्च्य ॱस्यो़क्केन् दीरङ् ॱमत् तङे, ॱसु दीगी ॱस्यो़क्केन्? हीगी ढीक्ल ॱसुङ्रप्ल केच्च्य ॱनेम्बु ॱस्यो़त्तु कङ्ब चुन युङ्गेङ्गी मी घयेत् घन्डे गा आ सीर थो़ङ्गेन् बेत्। (यशैया ५२:७) 16 ॱनी हीन्न अक्, इस्राएली घयेक्की केच्च्य ॱनेम्बुल आम्न दीरङ् मत् झ्यीब बेत्। हीगी ढीक्ल यशैयागी ॱस्यो़क्केन् बेत्। चोव ज्यीन्दक्, ङीक्की ॱस्येप्पे केच्च्यल ॱसु दीगी छ्य स्यक्न युङ यो़प्प? सीर थो़ङ्गेन् बेत्। (यशैया ५३:१) 17 ख्रीष्ट्की ढीक्की केच्च्य ॱस्येत्नी क, हस्सो़त् ॱह घोगेन् बेत्। ॱनी ॱह घोनी क, हस्सो़त् ॱह घोवे केच्च्य दील छ्य स्योक्केन् बेत्। 18 हीगी ढीक्ल ङ केच्च्य च्यीक् ढीगेन्। हीगो इस्राएली घयेक्की ॱह घोव न मत् घोव बेक्क? ॱङो़न्ने ॱह घोव बेत्। हीगी ढीक्ल ॱसुङ्रप्ल केच्च्य ॱस्यो़क्केन् हुबे केत् दी जम्लीङ् की़ङ्गी ॱह घो छर बेत्। हुबे केच्च्य हुगो जम्बुलीङ्गी थल ते ॱलीत् छर बेत् सीर थो़ङ्गेन् बेत्। (ॱसुङ्रप्की गुल्लु १९:४) 19 ङ यङ् ढीगेन्। इस्राएली घयेक्की हीगी धो़न् दी ॱह मत् घोव बेक्क ॱनी? हीगी ढीक्ल ॱएन्स्युक्ल मोशागी ॱस्यो़क्केन् बेत्। ङे दम्बे मी मेम्ब, ज्यी़त् ॱयोङ् ॱयोङ्गी मी घयेक्की ढीक्ल खीत्रङ् इस्राएली घयेत्ल ङ ठदोक् लङ्दु ची़क्केन्। ज्यी़त् ॱयोङ् घुच्च्यी़क्की मी घयेत्ल खीत्रङ् सीगुक् लङ्दु ची़क्केन् सीन्न को़न्ज्योक्की ॱसुङ थो़ङ्गेन् बेत्। (ठीम्लु ३२:२१) 20 हीगी ढीक्ल यशैयागी इक् ज्यीब मीप्प ॱस्येत्न यो़क्केन् बेत्। को़न्ज्योक्की ॱसुङल ङ चर दीरङ् ॱमीत् च्यो़क्केङ्गी मी घयेत्ल ङ ॱङीस्सोङ्। ङ ॱयेङ्न स्युदेन् दीरङ् मीत् ज्यक्केङ्गी मी घयेत्ल ङे ङरङ् तो़म्बेन् सीर थो़ङ्गेन् बेत्। (यशैया ६५:१) 21 ॱनी इस्राएलीगी ढीक्ल यशैयागी हीन्दुक् सीन्न ॱस्येत्न यो़क्केन् बेत्। को़न्ज्योक्की ॱसुङल ङे खल मीत् नेङ्गेन्, ॱअप्स्यी़त् मीत् झ्यीक्केङ्गी मीस्सीर् हुब घयेत्ल लोक्रो झ्यी सीन्न ङीन् रीम फो़स्स्यी स्युव ज्यबेन् सीर थो़ङ्गेन् बेत्। (यशैया ६५:२) |
© 1995 Wycliffe Bible Translators, Inc. and Nepal Bible Society
Wycliffe Bible Translators, Inc.