रोमी 1 - ल्होमी1 को़न्ज्योक्की केच्च्य ॱनेम्बु ॱस्यो़क्केल्ल दम्न ठीक्नलल भो़न यो़क्केन् ख्रीष्ट् येशुगी ॱयोक्पु ङ पावल्की हीगो ढीन तोङ्गो़त्। 2 हीगी केच्च्य ॱनेम्बु हीगो धङ्बुदु को़न्ज्योक्की ॱनङे छ्यो़त्तुम् जेत्नी, कलुङ् ॱस्यो़क्केन् घयेत्ल ॱस्यो़त्तु ची़त्न धम्बे ॱसुङ्रप्ल ढीन स्यक्न यो़क्केन् बेत्। 3 हीगी धो़न् ॱङो़म दी को़न्ज्योक्की ॱरेबु बेत्। ॱनी खोङ् दाऊद्गी दुङ्ज्यी़त्ल कोलीमील कीनी, मी इक् बेत्। 4 ॱनी खोङ् ढोङ्नरनी ॱसोम्बुल लोङ हीम्बे लम्नी हुनी धक्पर् झ्यीक्केन् धम्बे थुगी जेत्नी, को़न्ज्योक्की ॱरेबुल खोङ् ॱवङ् च्येम्मल खो़त्न यो़क्केन् बेत्। ॱनी खोङ् येशु ख्रीष्ट् हज्यरङ्गी चोव ज्यीन्दक् बेत्। 5 खोङ्गी थुज्यी छ्यीम्मु थोप्न ङीत् खोङ्गी ठीक्नलल खो़च्च्ये दी ज्यी़त् कुरीक्नी युङे मी घयेक्की खोङ्ल छ्य स्यक्न खोङ्गी कल चीगेल्ल सो़न हुनी खोङ्गी छेल्ल तो़प्प युङ्ज्येगी ढीक्ल बेत्। 6 ॱनी को़न्ज्योक्की येशु ख्रीष्ट्की छ्योल भो़बल युङे मी घयेक्की दल खीत्रङ् ॱअङ् युङ्न यो़क्केन् बेत्। 7 रोम् सार्न यो़क्केन् को़न्ज्योक्की भो़बल युङे खोङ्गी झ्यम्बे मी चङ्म खीत्रङ् घयेत्ल ङे यीगी हीगो ढीन तोङ्गो़त्। खीत्रङ् घयेत्ल हज्यरङ्गी यप् को़न्ज्योक् धङ् चोव ज्यीन्दक् येशु ख्रीष्ट् च्यानी थुज्यी धङ् ॱसीम् दीव युङ्ज्ये यो़प्प तोङ्। पावल् रोम् सार्ल डोगीन् थेप्प ८-१५ 8 ॱङो़न् धङ्बुल ॱअल खीत्रङ् घयेक्की ढीक्ल येशु ख्रीष्ट्की लम्नी को़न्ज्योक्ल थु छ्यी पुगेन्। घन्ड हीन् सीन्न खीत्रङ्गी छ्य स्यक्न युङे लेमी़ केच्च्य दी जम्बुलीङ्ल घल अक् धर्न खुर दी ङे घोज्युङ्। 9 ङ ॱनी को़न्ज्योक्की ॱरेबी़ ढीक्की केच्च्य ॱनेम्बु ॱस्येत्न ॱसीम्बे यीक्नीरङ् ङ को़न्ज्योक्ल स्यप्च्यी़ ज्युक्केन् हीनो। ॱनी ङे नम् ॱसुव तोप्को़दङ् हुगी यङ्ल खीत्रङ् ढेन्सो़ झ्यीन, खीत्रङ्गी ढीक्ल छीगङ् ॱसुव तोप्को़त्। हील को़न्ज्योक् पङ्बु यो़दो। 10 को़न्ज्योक्की थुल यो़त्न, ङ खीत्रङ् च्याल युङ्ज्ये ॱनो़बे रीगो दी ह स्युक्ला डुप्च्ये यो़प्प स्योक्च्यीत् सीन्न ॱसुव तप् तब झ्यीक्को़त्। 11 खीत्रङ् डम्बोक्म युङ्ज्ये यो़प्पल धम्बे थुगी कबप् टो़त्तु सीन्न ङ खीत्रङ् च्याल युङ्गीन् थेस्सी झ्युङ्। 12 ॱनी युङ् छुन, स्येन् ङल अक्, खीत्रङ्ल आक् च्यीक्तङ् च्यीक्की छ्य स्यक्प दीनी ॱलोप्स्यीक् ॱङीक्केन् बेत्। 13 ज्यी़त् ॱयोङ् ॱयोङ्गी घुङ्दु ङे घङ् झ्यीबे लेल डेबु छ्याब डस्सी खीत्रङ् च्यादु उक् युङ्ज्ये यो़प्पल ङ लेम्म गज्येन् खीत्रङ् च्याल युङ्ज्ये ॱनो़ब झ्यीबेन्। ॱनी ङल थङ्गक् झ्युङ्नी, हजो़त् थुक्ल युङ् छुमोङ्। पी़न्ज्यासो हीगो ॱह घोव झ्यीज्यीत्। 14 ज्यी़त् छ्यीया ग्रीक्की मील हीन्, ज्यी़त् ॱयोङ्गी मील हीन्, च्यङाल हीन्, घुवाल हीन् ॱसुलरङ् हीन्न अक्, मी कुरीक्ल ढील्लेन् च्यो़ज्येमे गेन् दी ङल यो़त्। 15 हुगो झ्यीनी खीत्रङ् रोमीया घयेत्ल अक् ङ केच्च्य ॱनेम्बु ॱस्यो़क्कीन् थेप्पे ॱस्यीगुक्। 16 केच्च्य ॱनेम्बु ॱस्यो़प्पे ढीक्ल ङ ङु ॱमीत् छय यो़त्। घन्ड हीन् सीन्न हीगो को़न्ज्योक्की ॱस्यीक् च्येम्मे केच्च्य बेत्। हीगी लम्नी क ॱअल गोम यहुदी, हुनी ज्यी़त् ॱयोङ्गी मी ॱसु हीन्न अक्, छ्य स्योक्केन् दी छी थर्वल थो़ङ्गेन् बेत्। 17 ॱनम्बर् धक्पल छ्य स्यक्पे लम्नी को़न्ज्योक्की तो़ङ्गेन् सीक्केन् हुगो केच्च्य ॱनेम्बी़ ॱस्यो़क्केन् बेत्। हीगी ढीक्ल ॱसुङ्रप्ल छ्य स्यक्पे लम्नी ॱनम्बर् धक्पल थो़म्बे मी दी क ॱसोम्बु हीम्ब युङ्गेन् बेत् सीर यो़क्केन् बेत्। (हबकुक् २:४) को़न्ज्योक्की खोङ्डोक् फोक्केङ्गी मी १८-३२ 18 को़न्ज्योक् ॱमीत् ॱसम्गेङ्गी मी घयेक्की झ्यीबे ले ढङ्ज्ये मीप्प घयेत् दीगी दीम्ब क च्येत्न यो़क्केन् बेत्। हुन्दुक् झ्यीब घयेत्ल तेङ् यी़नी मल्ल को़न्ज्योक्की खोङ्डोक्की छ्येप्प फोक्केन् बेत्। 19 ॱनी को़न्ज्योक्की हुब घयेत्ल खोङ् रोरङ् ङु ॱस्यी छुबे ङोस्स्यीन् टेत्न आक्, हुबे ङु ॱस्यीज्ये ॱनो़ब मीत् झ्यीक्केन् बेत्। 20 को़न्ज्योक्की ॱस धङ् ॱनम् छ्यादु ची़प्पनी झ्यीनी, खोङ्गी घङ् जेप्पे ले घयेत्ल तेन क, हस्सो़त् हुनी खोङ् को़न्ज्योक् ॱङो़न्ने यो़प्प धङ् खोङ्ल म दीरङ् धी़ ज्यी़न्दु ॱवङ् छ्यीम्मु यो़प्प दी ॱमीक्की ॱमीत् थोङ्गो़त्न आक्, ॱसीम् दीगी ॱह घो छुगेन् बेत्। हीगो झ्यीनी हुबे को़न्ज्योक्की खोङ्डोक् हुगो फी़ ॱमीत् छुगेन् बेत्। 21 हुबल को़न्ज्योक् यो़प्प ॱस्यो़च्च्ये यो़त्न अक्, को़न्ज्योक्ल पु ओ़बे तो़प्प धङ् यस्सो ॱमत् पुब, हुबे ॱसीम्बे ॱनोक्सम् दीरङ् ङीन घो ॱमीत् छ्यो़त्ल ॱसोङ्न, घुर्तीङ् डस्सी मेन्नक्ल दो़क्केन् बेत्। 22 हुबे रोरङ्सो च्यङ्सी हीन् सीक्केन्, ॱनी म दी घुर्च्यक् यो़क्केन् बेत्। 23 नम्ल अक् मीत् ढोङ्गेङ्गी को़न्ज्योक्ल तो़च्च्ये स्यक्नी, ॱस्यी डोगेङ्गी ढङ्, मी, झ्यज्युङ्म, रीगे ॱसीम्ज्येन् धङ् ॱसल ढी़त्न डोगेङ्गी ॱसीम्ज्येन् घयेक्की डवुल ॱसम्न हुल तो़प्प पुगेन् बेत्। 24 हुगो झ्यीनी हुबे ॱसीम्बे धेत्मो़ आक्पागी ॱवङ्ल तङ्न चङ्ज्ये मीप्पे ढङ् छ्ये धङ् च्यीक्तङ् च्यीक्की सी़बु स्यीलोक्सील सोगेन् दी को़न्ज्योक्की थङ्गक् मत् जेप्प, नुक् दीरङ् स्यक् तङ बेत्। 25 को़न्ज्योक् ङो़गी दीम्ब दी फङ्न स्यक्नी हुबे ॱएलम तीन्न छङ्म थम्ज्येत् सोगेल्ल मेम्ब, सो़ तङ घयेत्ल तो़त्न छ्यक् छ्यो़प्प पुगेन् बेत्। स्येन् को़न्ज्योक्ल क धी़ ज्यी़न्दु तो़त् ओ़ब दी यो़क्केन् बेत्। आमेन्। 26 हुन्दुक् झ्यीब झ्यीनी हुब रोरङ्सो़ धेत्मो़ आक्पा ॱमम्बीगी लेगी ॱवङ् दीलरङ् को़न्ज्योक्की स्यक् तङ बेत्। ॱनी भुमु घयेक्की यङ् छ्योगोदङ् युङे लेमु दी स्यक्नी भुमु रोरङ्सो ॱनम्बु फीलोक्पे लेमु झ्यीक्केन् बेत्। 27 ॱनी हुगो डस्सी छ्योगो घयेक्की इक् भुमुदङ् युङे लेमु दी स्यक्नी, छ्येलङ्गी छ्योगो रोरङ्सो ॱनम्बु फीलोक्पे लेमु झ्यीक्केन् बेत्। ॱनी हीन्दुक् झ्यीबे ङीब अयेक्प ॱमम्बीगी ले झ्यीबल ओ़बे कज्येत् को़न्ज्योक्की हुबल तङ बेत्। 28 हुबे को़न्ज्योक् ॱसम्न खोङ् ङु ॱस्यीब युङे लेमु दी हुबे गज्ये ॱमत् छोर, फङ्न स्यक्न झ्यीच्च्ये मीत् युङ्गेङ्गी लेमु झ्यीन युङ्नी, हुबे ङेम्बे ॱसीम् दी को़न्ज्योक्की हुन्दुक् दीरङ् स्यक् तङ बेत्। 29 हुबे ॱसीम् दी म दीरङ् हीन्दुक् झ्यीब यो़क्केन् बेत्। ढङ्ज्ये मीप्प, ङेम्ब, लोबीय, अयेक्पे लेमु, ठदोक्, मी ॱसो़क्केन्, थक्मु, ॱयोज्यी़ ठम्ज्यी़, तम् ङेम्ब लप्केन्, फालप् लप्केन्, 30 फोक्पे छीक् ॱसो़गेन्, को़न्ज्योक्ल डस्सीम् झ्यीक्केन्, स्येन्दोङ् झ्यीक्केन्, ज्यीम्गेत् ॱस्यो़क्केन्, तम्दो़त् ॱस्यो़क्केन्, ॱसम्ल ङेम्ब तोङ्गेन्, फमे खल मीत् नेङ्गेन्, 31 ॱलीम्ब घुलोक्प, तेन्ज्ये मीप्प, झ्यम्ब मीप्प, ॱङीङ्ज्यी मीप्प च्येम्मे मी हुब बेत्। 32 हुन्दुक् झ्यीबे मी घयेत्ल छ्येप्प केन ॱसेत्न, ओ़ब युङ्गेन् बेत् सीरे को़न्ज्योक्की क हुबल ॱस्यो़च्च्ये यो़क्केन् बेत्। ॱनी यो़त्न अक्, हुबे हुन्दुक् झ्यीबे ले दी रोरङ्सो़ झ्यीब छ्युवक् मेम्ब, ॱयोङ्गी झ्यीबल अक् त झ्यीन अक्, डीक्केन् बेत् सीन्न सीक्केन् बेत्। |
© 1995 Wycliffe Bible Translators, Inc. and Nepal Bible Society
Wycliffe Bible Translators, Inc.