ॱसाल्केत् 9 - ल्होमीकङ्लीङ् ॱङब भी़बे धो़न् १-१२ 1 हीनी यङ् भङ्ज्येम्ब ॱङब दीगी पालोल कङ्लीङ् दी भी़सोङ्। हुनी ॱनम्गी कर्म च्यीक् ॱसल छर्न यो़प्प ङे थोङ्ज्युङ्। ॱनी खीस मीप्पे ॱसेङ्दोङ च्यीक् दुक्। हुगी घप्तोक्की च्यी दी कर्म दील बीन्दुक्। 2 ॱनी ॱसेङ्दोङे घप्तोक् दी कर्म दीगी पीक्सोङ्। ॱसेङ्दोङे नङ् दीन मी छ्यीम्मु बको़र्प्प डस्सी हुनी धुवक् छेत्मीत् थो़न्सोङ्। ॱनी हुगी धुवक् दीगी ॱनम् दीरङ् टेक् घेङ्न, ङीमे ओ़त् दी कक् तङ्सोङ्। 3 ॱनी हुगी धुवक् दीगी छीक्नी पीज्येक्प छेत्मीत् जम्बुलीङ्ल थो़न्सोङ्। ॱनी दीक्परजल यो़प्पे ॱस्यीक् डस्सी पीज्येक्प घयेत् दीबल अक् ॱस्यीक् टेस्सोङ्। 4 हुनी हुब घयेत्ल दोङ्बु धङ् च ॱङोम्बी़ ढे घयेत्ल च्यो़न् ॱमत् तोङ, थोक्कोक्ल को़न्ज्योक्की ङोत्ता मत् ज्यबे मी घयेत्लरङ् च्यो़न् तोङ्ज्यीत्। 5 ॱनी हुब ॱसो़च्च्ये दी ॱमत् ॱसो़त्। ॱनी म दी दव ॱङ थुक्ल दुक्प छ्यीम्मु तोङ् सीन्न ॱवङ् टेस्सोङ्। ॱनी हुगी दुक्प दी दीक्परजे ॱसो तबे सुक् डस्सी युङ्गुक्। 6 ॱनी हुगी यङ्ल मी घयेत् गुर् ॱमीत् थेक्प, ॱस्यीगेन् सीन्न ॱस्यीज्ये ॱनो़ब झ्यीगुक्। ॱनी हुब ॱस्युली ॱस्यी ॱमीत् छुबेत्। 7 हुगी पीज्येक्प घयेत् दी ॱमक्ल डोये यङ्ल तल ॱमक्च्ये ज्यब डस्सी दुक्। हुबे गो दील ज्येल थोप्केङ्गी ॱसीर्की स्यमुङ् दी डस्सी छ्यीप् घो़न्दुक्। हुबे झ्येत्ङे दी मी झ्येत्ङे डस्सी दुक्। 8 हुबे ट दी भुमी़ ट डस्सी दुक्। हुबे ॱसो दी ॱसेङ्गीगी ॱसो डस्सी दुक्। 9 हुबे ढङ्गोक् छ्योप्केन् च्यागी घो़ डस्सी घो़न्दुक्। हुबे ॱस्योक्पक्की केत् दी ॱमक्ल डोये यङ्ल ते गरीमन् छेत्मीत् ज्युन फीम्बे हुट्ट डस्सी दुक्। 10 हुबे ॱङम दी तोक्केन् दीक्परजे ॱङम डस्सी दुक्। ॱनी मी घयेत्ल दव ॱङ थुक् च्यो़न् तोङ्ज्येमे ॱस्यीक् दी हुगी ॱङम दील दुक्। 11 हुब घयेक्की ज्याबु दी हुगी खीस मीप्पे ॱसेङ्दोङ दीनी थो़म्बे भङ्ज्येम्ब च्यीक् दुक्। हुगी मीङ् दी हीब्रुगी केच्च्यल एबाडोन् सीगुक्। ग्रीक्की केच्च्यल अपोल्लीयोन् सीगुक्। 12 घन्डे दुक्प बेक्क सीक्केन् दुक्प ॱएन्स्युक्म दी ह ढुप्सोङ्। ॱनी हरुङ् दुक्प ॱयोङ्म ॱङी युङ्गेन् बेत्। कङ्लीङ् ढुक्प भी़बे धो़न् १३-२१ 13 हीनी यङ् तेङ् यी़गी भङ्ज्येम्ब ढुक्प दीगी पालोल कङ्लीङ् दी भी़सोङ्। हुनी को़न्ज्योक्की ढुङ्न यो़क्केन् ॱसीर्की छ्यो़प्प पुस दीगी छ्यो स्यील यो़प्पे रच्च्योक् दीनी केत् च्यीक् थो़म्ब ङे ॱह घोज्युङ्। 14 ॱनी हीगी केत् दीगी छीक्ट दील हुगी कङ्लीङ् भी़क्केन् भङ्ज्येम्ब ढुक्प दील हीन्दुक् सीन्न ॱङासोङ्। युफ्रेटीस्की चङ्बु छ्यीम्मी़ छीगन कीङ्न यो़क्केन्, तेङ् यी़गी भङ्ज्येम्ब स्यीबु दी या टेन तोङ् सीस्सोङ्। 15 हुनी या टेसोङ्। ॱनी हुगी भङ्ज्येम्ब स्यीबु दी म दी जम्बुलीङ्गी मी घयेत् गो ॱसुम्ल तङे गो च्यीक् हीगी लो हीगी दव हीलरङ्, हीगी ङीन् हीलरङ्, छ्युजो़त् हीजो़क्की छो़त्ल ॱसो़च्च्येल ठोक्क झ्यीन को़न स्यक्तुक्। 16 ॱनी उन ॱमक्मी तबा छेत्मीत् यो़प्प थोङ्ज्युङ्। हुबे ढङ्ज्युक् दी बुम् तोङ्डक् ॱङी यो़क्केन् बेत् सीगुक्। 17 ॱनी ङे थोङे थोङ्नङ् दील तबा घयेत् दीगी ढङ्गोक् दील ढङ्गोक् छ्योप्केन्, च्यागी घो़ छ्यीप् घो़न्दुक्। ॱनी हुगो यरी ॱमप्पु, यरीगी ॱमुक्लोक्प, यरीगी ॱसीप्पु घो़न्दुक्। ॱनी ते गो दी ॱसेङ्गीगी गो डस्सी दुक्। ॱनी ते ख दीनी मीज्ये, धुवक् धङ् मुसी थो़ङ्गुक्। 18 ॱनी हुबे खनी थो़म्बे च्यो़न् ॱनम्ब ॱसुम्बु दीगी जम्बुलीङ्गी मी गो ॱसुम्ल तङे गो च्यीक् ॱस्यीसोङ्। 19 च्यो़न् तोङ्ज्येमे ॱस्यीक् दी ते ख दी धङ् ॱङम दील दुक्। ॱङम दी डी़ डस्सील हुल गो दुक्। ॱनी च्यो़न् दी हुगी तोङ्गुक्। 20 च्यो़न् ॱनम्ब ॱसुम्बु हुगोल ॱमत् ॱस्योर, ॱसो़बे मी घयेत् दीगी ॱसीम्ब दी मत् ज्युर्सोङ्। हुबे ॱनो़प्प अयेक्प घयेत् धङ् रोरङ्सो़ सो़बे ॱसीर्की कु, ॱङुगी कु, च्युक्मे कु, दोलोक्पे कु धङ् ॱस्यीङ्गी कु हुन्दुक् झ्यीबे ढङ् ॱमीक्की ॱमीत् थोङ्गेन्, आम्ज्योक्की मीत् घोगेन् धङ् कङ्ब मीत् डोगेन् हुन्दुक् झ्यीबल ॱसम्न छ्यक् छ्यो़प्प पुज्ये दी ॱलो़ ॱमत् तङ्सोङ्। 21 हीगो छ्युवक् मेम्ब, हुब घयेक्की हरुङ् मी ॱसो़क्केन्, जुम्डी़ तो़ङ्गेन्, छ्ये ज्युक्केन् धङ् की़न्नक् कुगेन् हुन्दुक् झ्यीबे लेमु दी इक् ॱलो़ ॱमत् तङ्सोङ्। |
© 1995 Wycliffe Bible Translators, Inc. and Nepal Bible Society
Wycliffe Bible Translators, Inc.