ॱसाल्केत् 8 - ल्होमीथीजी दी़म्ब च्यक्पे धो़न् १-५ 1 हीनी यङ् थीजी दी़म्ब दी लुक्टुक्की च्यक्सोङ्। हुनी तेङ् यी़दु छ्युजो़त् छ्यीक्क च्यीक् थुक् ॱसीङ् थागीय झ्युङ्सोङ्। 2 हुनी को़न्ज्योक्की ढुङ्न भङ्ज्येम्ब दी़न् यो़प्प ङे थोङ्ज्युङ्। हुनी हुबल रच्च्योक्की कङ्लीङ् री री बीन्सोङ्। 3 हीनी यङ् स्युडी ढुङ्न यो़प्पे ॱसीर्की छ्यो़प्प पुसे दोङ् दीदु भङ्ज्येम्ब ॱयोङ्म च्यीक्की ॱसीर्की पो़बर् खुर्न लोङ्न दो़क्कुक्। ॱनी हुल को़न्ज्योक्की मी चङ्म घयेक्की ॱसुव तब घयेत्तङ् दल पुज्येम हुगी भङ्ज्येम्ब दील पो़गर् गज्येन् बीन्सोङ्। 4 ॱनी हीगी ॱसुव तब घयेत् दीदङ् दल हुगी भङ्ज्येम्ब दीगी लक्नी पो़गी धुवक् दी इक् को़न्ज्योक्की की़न्दी़ल्ल लोङ्न टप्सोङ्। 5 ॱनी उन छ्यो़प्प पुसन यो़प्पे मीरोक् घयेत् दी हुगी भङ्ज्येम्ब दीगी पो़बर् दील टेक् ॱलुक्सोङ्। हुनी पो़बर् दीदङ् डक्च्यक् जम्बुलीङ्ल पुर् तङ्सोङ्। हीनी जम्बुलीङ्ल डुक्की च्यीला तो़न्न डुक्केक्की हुट्ट धङ् ॱसेर ज्यप्सोङ्। कङ्लीङ् स्यी भी़बे धो़न् ६-१३ 6 हीनी हुगी भङ्ज्येम्ब दी़म्बु दीगी हुगी कङ्लीङ् दी भी़च्च्येम ठोक्क झ्यीसोङ्। 7 ॱनी भङ्ज्येम्ब धङ्बु दीगी भी़सोङ्। हुनी ॱसीरा, मी बरदङ् ठक् रीन ॱनम्नी मल्ल ॱसल छर्सोङ्। हुनी दोङ्बु, च ॱङोम्बी़ ढे घयेत् धङ् ॱस जम्बुलीङ् गो ॱसुम्ल तङे गो च्यीक् छीक्सोङ्। 8 हीनी यङ् भङ्ज्येम्ब ॱङीब दीगी पालोल कङ्लीङ् दी भी़सोङ्। हुनी ॱनम्नी मल्ल री चो़त्मे मी बर डस्सी च्यीक् छ्यु ज्यम्जो छ्यीम्मुल छर्सोङ्। हुनी छ्यु ज्यम्जो छ्यीम्मु गो ॱसुम्ल तङे गो च्यीक् ठक् डस्सील झ्युङ्सोङ्। 9 ॱनी छ्यु ज्यम्जो छ्यीम्मी़ नङ्ल घङ् यो़प्पे उज्येन् घयेत् गो ॱसुम्ल तङे गो च्यीक् ॱस्यीसोङ्। ॱनी छ्यु ज्यम्जो छ्यीम्मुल डोगेङ्गी ढु घयेत् गो ॱसुम्ल तङे गो च्यीक् येसोङ्। 10 हीनी यङ् भङ्ज्येम्ब ॱसुम्ब दीगी पालोल कङ्लीङ् दी भी़सोङ्। हुनी ॱनम्नी मल्ल बक्स्यीङ् बर डस्सी कर्म गर्चम च्यीक् छर्सोङ्। हुगो चङ्बु धङ् छ्यु थो़न्स घयेत् गो ॱसुम्ल तङे गो च्यीक्ल खीसोङ्। 11 ॱनी कर्म दीगी मीङ् दील खेम्बक् सीगुक्। ॱनी छ्यु गो ॱसुम्ल तङे गो च्यीक् खक्पुल झ्युङ्सोङ्। ॱनी हुगो थुङ्नी, मी गज्येन् ॱस्यीसोङ्। 12 हीनी यङ् भङ्ज्येम्ब स्यीब दीगी पालोल कङ्लीङ् दी भी़सोङ्। हुनी ङीम गो ॱसुम्ल तङे गो च्यीक् धङ् दच्च्य गो ॱसुम्ल तङे गो च्यीक् धङ् कर्म घयेत् गो ॱसुम्ल तङे गो च्यीक्ल च्यो़न् तङ्सोङ्। हुनी हुबे ओ़त् दी गो ॱसुम्ल तङे गो च्यीक् येसोङ्। हुनी ङीन् गो ॱसुम्ल तङे गो च्यीक् धङ् छेन् गो ॱसुम्ल तङे गो च्यीक्की ओ़त् दी च्युङ्दु टप्सोङ्। 13 हीनी ङे तेनी ॱनम्ल हुला च्यीक् फीर थोङ्ज्युङ्। हुगी केत् छ्यीम्मुल हुन्दो भङ्ज्येम्ब ॱसुम्गी पालो झ्यीन ह कङ्लीङ् भी़क्केन् बेत्। हुगो झ्यीनी जम्बुलीङ्गी मी घयेत् घन्डे दुक्प, घन्डे दुक्प, घन्डे दुक्प सीस्सोङ्। |
© 1995 Wycliffe Bible Translators, Inc. and Nepal Bible Society
Wycliffe Bible Translators, Inc.