ॱसाल्केत् 7 - ल्होमीको़न्ज्योक्की ता फोक्प घयेत् १-८ 1 हीनी तेङ् यी़गी भङ्ज्येम्ब स्यी जम्बुलीङ्गी छ्यो स्यी खदक्ल देत्न जम्बुलीङ्ल छ्यो स्यीनी ॱलुङ्बु ज्यक्स मीप्प क च्यो़प्प ङे थोङ्ज्युङ्। हुनी जम्बुलीङ्ल, छ्यु ज्यम्जो छ्यीम्मुल धङ् दोङ्बु घयेत्ल ॱलुङ् मीप्प झ्युङ्सोङ्। 2 हीनी यङ् तेङ् यी़गी भङ्ज्येम्ब ॱयोङ्म च्यीक् जम्बुलीङ्गी ॱस्यर् ङो़नी यल्ल थो़म्ब ङे थोङ्ज्युङ्। ॱनी हुगी लक्ल ॱसोम्बु हीम्बे को़न्ज्योक्की थीजी ज्यक्च्येम च्यीक् खुर्न दुक्। ॱनी जम्बुलीङ्ल धङ् छ्यु ज्यम्जो छ्यीम्मुल च्यो़न् तोङ्ज्येमे ॱवङ् खुरे हुगी तेङ् यी़गी भङ्ज्येम्ब स्यीबु दील हुगी च्यीक्पु दीगी केत् छ्यीम्मु तो़न्न 3 जम्लीङ् की़न्, छ्यु ज्यम्जो छ्यीम्मु धङ् दोङ्बु घयेत्ल ॱअल हुन्दो च्यो़न् ॱमत् तोङ्। हज्यरङ्गी को़न्ज्योक्की ॱयोक्पु घयेक्की थोक्कोक्ल ङोत्ता तो़त् गोगेन् बेत् सीस्सोङ्। 4 ॱनी ता फोक्न ङोत्ता यो़प्प घयेत् दीगी ढङ्ज्युक् दी ङे ॱह घोज्युङ्। इस्राएल्की ज्यी़त् घयेक्की छीक्नी तोम्दु बुम् च्यीक्तङ् तोङ्डक् स्यीप्च्यु स्यप्स्यील फोक्तुक्। 5 यहुदागी दुङ्ज्यी़त्नी तोङ्डक् च्युन्नी, रुबेन्गी दुङ्ज्यी़त्नी तोङ्डक् च्युन्नी, गाद्गी दुङ्ज्यी़त्नी तोङ्डक् च्युन्नी, 6 आशेर्की दुङ्ज्यी़त्नी तोङ्डक् च्युन्नी, नप्तालीगी दुङ्ज्यी़त्नी तोङ्डक् च्युन्नी, मनश्शेगी दुङ्ज्यी़त्नी तोङ्डक् च्युन्नी, 7 शीमीयोन्गी दुङ्ज्यी़त्नी तोङ्डक् च्युन्नी, लेवीगी दुङ्ज्यी़त्नी तोङ्डक् च्युन्नी, इसाखार्की दुङ्ज्यी़त्नी तोङ्डक् च्युन्नी, 8 जबुलुन्गी दुङ्ज्यी़त्नी तोङ्डक् च्युन्नी, युसुफ्की दुङ्ज्यी़त्नी तोङ्डक् च्युन्नी धङ् बेन्यामीन्गी दुङ्ज्यी़त्नी तोङ्डक् च्युन्नील ङोत्ता फोक्न दुक्। घो़ कप्पु घो़म्बे मी छेत्मीत् ९-१७ 9 हीनी यङ् ङे तेनी उन मी छेत्मीत् ढङ्ज्युक् थीप्च्यीक् थीप्ङी मीप्पे मी, ज्यी़त् रीदङ् रीनी, केच्च्योक् रीदङ् रीनी, ज्यागक् रीदङ् रीनी युङ्न दुक्। हुब कुरीक्की घो़ कप्पु री घो़न्न लक् दील ॱस्यीङ् तलेलोम री खुर्न स्युडी ढुङ् धङ् लुक्टुक्की ढुङ्न लोङ्न दुक्। 10 हुनी हुब कुरीक्की केत् छ्यीम्मु तो़न्न छी थर्व ॱनङ्गेन् दी ॱवङ् च्येम्मे स्युडील स्युगेन् ङीक्की को़न्ज्योक् धङ् लुक्टुक् बेत् सीस्सोङ्। 11 ॱनी स्युडीगी छ्यी खोर्ल यो़प्पे भङ्ज्येम्ब घयेत् दी, गोयो़प्प घयेत् दी धङ् उज्येन् स्यीबु दीबे स्युडील स्युगेन् को़न्ज्योक्ल छ्यक् छेन हीन्दुक् सीस्सोङ्। 12 आमेन् सीन्न तो़प्प, तो़त्वङ्गी ओ़च्च्य, झ्यी़, थु छ्यी, यस्सो, ॱवङ् धङ् ॱस्यीक् झ्यीब को़न्ज्योक्ल धी़ नम ज्यी़न्दु युङ् युङ युङ्ज्ये यो़प्प स्योक्च्यीत्। आमेन्। 13 हुनी गोयो़प्प च्यीक्की ङल घो़ कप्पु घो़म्ब हीब घयेत् ॱसु बेक्क? घनी युङ बेक्क? सीन्न ढीज्युङ्। 14 ॱनी हीगी लेल्ल ङे नीज्यरङ्ल क ॱस्यो़च्च्ये यो़ट्टो, हुब ॱसु क बेक्क झ्यीबेन्। ॱनी हुगी लेल्ल ङल हीब घयेत् दुक्प छ्यीम्मु गुर्न थो़म्बे मी घयेत् बेत्। हीबे एल्लादु रोरङ्सो़ घो़ दी लुक्टुक्की ठक्ल टी़न, धक् छर घयेत् बेत्। 15 हीगो झ्यीनी हीब हीन को़न्ज्योक् स्युसे छ्यो़गङ्दु खोङ्गी स्युडी ढुङ्दु ङीन् छेन् मीप्प देत्न स्यप्च्यी़ पुगेन् बेत्। ॱनी स्युडील स्युगेन् खोङ् यो़स्से घुर्कङ् दीदु हीब अक् दो़च्च्ये ॱनोङ्गेन् बेत्। 16 हीनी हीबल नम् नम्ल अक् तोब कोम्बे दुक्प मीप्प धङ् ङीमे छीक्न छेप्प छये दुक्प मीप्प युङ्गेन् बेत्। 17 घन्ड हीन् सीन्न हीब घयेक्की लुक्चीब दी स्युडी ढुङ्न स्युगेङ्गी लुक्टुक् झ्यीनी, खोङ्गी हीब घयेत् छ्यु ॱसोम्बु थो़न्सल ठीक्केन् बेत्। हुनी को़न्ज्योक्की हीबे ॱमीक्च्यु घयेत् दी फीन तीक्केन् बेत् सीन्न सीच्च्युङ्। |
© 1995 Wycliffe Bible Translators, Inc. and Nepal Bible Society
Wycliffe Bible Translators, Inc.