ॱसाल्केत् 6 - ल्होमीथीजी ढुक् च्यक्पे धो़न् १-१७ 1 हीनी हुगी यीगीगी थीजी दी़म्बु दीनी च्यीक् लुक्टुक्की च्यक्सोङ्। हुनी उज्येन् स्यीबु दीनी च्यीक्की डुक्केक्की केत् डस्सी सीन्न ह ॱस्योक् सीस्सोङ्। 2 हुनी त कप्पु च्यीक् थो़न्सोङ्। ॱनी हुल स्यो़ङ्गेन् दील स्यु च्यीक् धङ् ज्येल थोप्केङ्गी थोप् छ्यीम्मी़ स्यमुङ् च्यीक् बीन्दुक्। ॱनी हुगो ज्येन युङ्ज्येल ॱनुप्तु टप्सोङ्। 3 हीनी यङ् हुगी थीजी ॱङीब दी लुक्टुक्की च्यक्नी, उज्येन् ॱङीब दीगी ह ॱस्योक् सीस्सोङ्। 4 हुनी त ॱमप्पु च्यीक् थो़न्सोङ्। हुल स्यो़ङ्गेन् दील ढी पदङ् छ्यीम्मु च्यीक् बीन्न मी घयेत् ॱसो़त्रील तङ्न जम्बुलीङ्ल स्यीव मीप्पल तोङ्ज्येमे ॱवङ् बीन्दुक्। 5 हीनी यङ् हुगी थीजी ॱसुम्ब दी लुक्टुक्की च्यक्नी, उज्येन् ॱसुम्ब दीगी ह ॱस्योक् सीस्सोङ्। हुनी त नक्पु च्यीक् थो़न्सोङ्। हुल स्यो़ङ्गेन् दीगी लक् दील तेक्च्येम नग च्यीक् दुक्। 6 हीनी हुगी उज्येन् स्यीबु दीगी घुङ्नी युङ डस्सी हीन्दुक् सीरे केत् च्यीक् ङे ॱह घोज्युङ्। ॱनुम् धङ् गोङ्ज्यङ्ल च्यो़न् घन्ड अक् ॱमत् तोङ्। ॱनी ढे पदक् दी दीनार् च्यीक्ल खेगुर् घङ् धङ् नेगी पदक् दी यङ् खेगुर् ॱसुम्ल पर्न स्योक् सीस्सोङ्। 7 हीनी यङ् हुगी थीजी स्यीब दी लुक्टुक्की च्यक्नी, हुगी उज्येन् स्यीब दीगी ह ॱस्योक् सीस्सोङ्। 8 हुनी त ॱसीयलीय च्यीक् थो़न्सोङ्। हुल स्यो़ङ्गेन् दीगी मीङ् दील ॱस्यीव सीन्न तादुक्। ॱनी हुगी तीङ्ला ॱयोङ्म च्यीक् युङ्गुक्। ॱनी हुगी मीङ् दील ॱस्यीवे यी़ सीन्न तादुक्। ॱनी जम्बुलीङ् गो स्यील तङे गो च्यीक्की मी घयेत् ॱसो़त्रील तङ्न ॱस्यीदु ची़क्केन्, तोरील तङ्न ॱस्यीदु ची़क्केन्, नज अयेक्प तङ्न ॱस्यीदु ची़क्केन्, रीगे ॱसीम्ज्येन् घयेक्की खल ॱस्योर्न ॱस्यीदु ची़क्केङ्गी ॱवङ् हुब ॱङीबुल बीन्दुक्। 9 हीनी यङ् हुगी थीजी ॱङब दी लुक्टुक्की च्यक्सोङ्। हुनी छ्यो़प्प पुसे होक् दीन को़न्ज्योक्की ॱसुङ्रप्की ॱलोप्सल नेम्बे ढीक्ल धङ् दीम्बे केच्च्य ॱस्येप्पे ढीक्ल ॱसेत् तङ घयेक्की ॱसीम् घयेत् दी यो़प्प ङे थोङ्ज्युङ्। 10 ॱनी हुब घयेक्की केत् छ्यीम्मु तो़न्न ॱवङ् छ्यीम्मु च्येम्म, धक्पर् धङ् दीम्बर् च्येम्म यो़क्केन् नीज्यरङ्गी जम्बुलीङ्गी मील नम् दी ङीक्की ठक्की लेन् दी च्येन छ्येप्प को़गेन्? सीस्सोङ्। 11 हुनी खोङ्गी हुब कुरीक्ल घो़ कप्पु री री ॱनङ्न हुब घयेत्ल खीत्रङ्दङ् कीदुक् च्यीक्प खीत्रङ्गी पी़न्ज्या ङे ॱयोक्पु घयेक्की ढङ्ज्युक् दी नम् छी छी थुक्ल खीत्रङ् धोबा च्यीक् थुक् धु च्यङ्न दो़च्च्यीत् ॱसुङ्सोङ्। 12 हीनी यङ् थीजी ढुक्प दी लुक्टुक्की च्यक्सोङ्। हुनी ॱसेर छ्यीम्मु ज्यप्सोङ्। ङीमल ओ़त् मीप्प घो़ नक्पु डस्सील ज्युर्सोङ्। दच्च्य दी ठक् डस्सी ॱमप्पुल ज्युर्सोङ्। 13 कर्म घयेत् यङ् भुयुक् ज्यप्न अप्ले दोङ्बी़ डलु घोक्न छर डस्सी ॱनम्नी मल्ल छर्सोङ्। 14 ॱनी ॱनम् दी यङ् यीगी बुरीम चेन्द डीब डस्सी झ्यीन येसोङ्। ॱनी लदोक् घयेत् धङ् ज्यम्जो छ्यीम्मी़ घुङ्गी ॱसने घयेत् दी यङ् एल्ला यो़स्से ॱसने दीनी ॱयोङ्ल पो़सोङ्। 15 हुनी ज्याबु, मी ढक्पा, ॱमक्पो़न्, छ्युक्पु, ज्यीक्पा, रङ्मो़ मीप्पे ॱयोक्पु, रङ्मो़ च्येम्म धङ् जम्बुलीङ्गी मी घयेत् हुगी यङ्ल ढक् उक्ल धङ् लदोक् घयेक्की होक्ल स्युन गोङ्सोङ्। 16 हुनी हुब घयेक्की हुगी ढक् दी धङ् लदोक् घयेत् दील ङीस्सो घयेत् इगीन ॱवङ् च्येम्मे स्युडील स्युगेङ्गी दोङ्नी धङ् लुक्टुक्की खोङ्डोक् युङ्गेन् हुनी बेन स्योक्रो झ्यी। 17 घन्ड हीन् सीन्न खोङ्जोसो़ खोङ्डोक् पो़प्पे ङीन् छ्यीम्मु ॱलीस्सोङ्। हीगो मी ॱसु दीगी गुर् थेक्को़प्प बेक्क? सीस्सोङ्। |
© 1995 Wycliffe Bible Translators, Inc. and Nepal Bible Society
Wycliffe Bible Translators, Inc.