ॱसाल्केत् 5 - ल्होमीथीजी च्योक्केन् लुक्टुक् १-१४ 1 ॱवङ् च्येम्मे स्युडील स्युगेङ्गी छ्यक् ॱयेब दीन छ्यील आक् नङ्ल अक् ढीबे यीगी बुरीम च्यीक् थोङ्ज्युङ्। हुल थीजी दी़न् ज्यप्तुक्। 2 हुनी तेङ् यी़गी भङ्ज्येम्ब ज्यीक्पोक्म च्यीक् ङे थोङ्ज्युङ्। ॱनी हुगी केत् छ्यीम्मु ज्यप्न यीगी हीगी थीजी हीगो च्यक्न तयल ओ़ब ॱसु यो़क्केन् बेक्क? सीन्न सीगुक्। 3 ॱनी हुगो तयल ओ़ब यो़क्केन्, ॱवङ् च्येम्म तेङ् यी़न अक् मीप्प, ॱस जम्बुलीङ्न अक् मीप्प, ॱसे होक्न अक् मीप्प हीम्ब ङे ॱह घोज्युङ्। 4 ॱनी हुगी यीगी हुगो ॱलोक्न तयल ओ़ब ॱसु उक् मीप्पल ङ गज्येन् ङी़बेन्। 5 ॱनी उन यो़क्केन् गोयो़प्प च्यीक्की ङल मत् ङु। तेदे यहुदागी दुङ्ज्यी़त्नी थो़म्बे ॱसेङ्गी, ज्याबु दाऊद्गी ज्यी़त्ल छ्येप्पे बुरुव च्यीक् ज्यला थो़न्न यो़क्केन् बेत्। ॱनी हुगी यीगीगी थीजी दी़म्बु दी च्यक्न हुल त छुगेन् दी खोङ् यो़क्केन् बेत् सीच्च्युङ्। 6 हुनी उज्येन् स्यीबु दी धङ् गोयो़प्प घयेत् दीबे घुङ्गी स्युडी ढुङ् दीन ॱरोक्ल ॱसेत् तङ हीम्ब डस्सीगी लुक्टुक् च्यीक् लोङ्न दो़प्प ङे थोङ्ज्युङ्। हुल रच्च्योक् दी़न् धङ् ॱमीक् दी़न् दुक्। ॱनी ॱमीक् दी़म्बु दी को़न्ज्योक्की जम्लीङ् की़ल्ल तङे खोङ्गी थु दी़र्रीम दी बेत्। 7 हुनी स्युडील स्युगेङ्गी छ्यक् ॱयेब दीनी हुगी यीगी दी लुक्टुक् दीगी ॱलङ्सोङ्। 8 हुगो ॱलङ्नी, हुगी उज्येन् स्यीबु दी धङ् गोयो़प्प ङीस्स्यु चप्स्यीबु दी लुक्टुक्की ढुङ् दीदु छ्यक् छेसोङ्। ॱनी गोयो़प्प दीबे रीदङ् रीगी डम्लेङ् रीदङ् ॱसीर्की पो़बर् रील पो़ टेक् खुर्न दुक्। हुगी पो़ हुगो को़न्ज्योक्की मी चङ्म घयेक्की ॱसुव तब घयेत् दी बेत्। 9 हुनी हुबे ॱलु ॱसम्ब च्यीक् लुक्टुक्ल हीन्दुक् झ्यीन लीन्न पुसोङ्। हुगी यीगी हुगो ॱलङ्न, हुगी थीजी च्योक्पल ओ़ब दी नीज्यरङ् दुक्। घन्ड हीन् सीन्न नीज्यरङ् ॱरोक्ल ढोङ्न, ज्यी़त् ज्यी़त् घयेत् धङ् केच्च्योक् ॱनम्ब कुरीक् हुनी ज्यागक् कुरीक्नी मी घयेत् को़न्ज्योक्की ढीक्ल नीज्यरङ्गी ठक्की रीन् टेत्न ॱली़ब बेत्। 10 हुनी हुब घयेत् ङीक्की को़न्ज्योक्की ज्यागक्की मीस्सीर्ल धङ् खोङ्गी छ्यो़प्पो़ल्ल सो़ब बेत्। हुनी हुबे तीङ्ला जम्बुलीङ्ल आक् ॱवङ् च्योङ्गेन् बेत्। 11 हुनी ङे तेबेन्। तेनी स्युडी दी, उज्येन् स्यीबु दीब धङ् गोयो़प्प घयेत् दीबे छ्यी खोर्ल तेङ् यी़गी भङ्ज्येम्ब ठी बुम् ढङ्ज्युक् दीरङ् मीप्प छेत्मीत् थोङ्ज्युङ्। 12 ॱनी हुब कुरीक्की केत् छ्यीम्मु तो़न्न हीन्दुक् सीन्न तो़प्प पुगुक्। ॱरोक्ल ढोङ हीम्बे लुक्टुक् नीज्यरङ्ल ॱवङ्, नोर्, झ्यी़, ॱस्यीक्, यस्सो, तो़त्वङ्गी ओ़च्च्य धङ् थु छ्यी थोप् ओ़ब यो़क्केन् बेत्। 13 हुनी यङ् तेङ् यी़न घङ् यो़प्प घयेत्, जम्बुलीङ्न घङ् यो़प्प घयेत्, ॱसे होक्ल घङ् यो़प्प घयेत् धङ् ज्यम्जो छ्यीम्मुल घङ् यो़प्प उज्येन्गी रीस्स ज्यी़प्प कुरीक्की स्युडील स्युगेन् दील धङ् लुक्टुक्ल थु छ्यी, यस्सो, तो़त्वङ्गी ओ़च्च्य धङ् ॱवङ् छ्यीम्मु धी़ नम ज्यी़न्दु युङ् युङ युङ्ज्ये यो़प्प स्योक्च्यीत् सीर ङे ॱह घोज्युङ्। 14 हीनी उज्येन् स्यीबु दीबे आमेन् सीस्सोङ्। हुनी गोयो़प्प घयेत् दीबे छ्यक् छेसोङ्। |
© 1995 Wycliffe Bible Translators, Inc. and Nepal Bible Society
Wycliffe Bible Translators, Inc.