ॱसाल्केत् 3 - ल्होमीसार्डीस्की छ्यो़ छोल ढीब १-६ 1 हीगो सार्डीस्की छ्यो़ छोगी ढीक्ल को़बे तेङ् यी़गी भङ्ज्येम्बल ढीज्यीत्। हीगो को़न्ज्योक्की थु दी़न् धङ् कर्म दी़न् यो़प्प च्येम्मे सीगुगो झ्यीज्यीत्। खीत्रङ्गी घङ् झ्यीप्पे ले घयेत् कुरीक् ङल ॱस्यो़च्च्ये यो़त्। खीत्रङ् ॱसोम्बु हीन् त कुरीक्की सीक्केन् बेत्। हुगो मेम्ब, खीत्रङ् ॱस्यीनर हीम्ब ङल ॱस्यो़च्च्ये यो़त्। 2 ह लोङ्। लोङ्ल च्यङ्जो़त् झ्यीन खीत्रङ्ल उ ॱयम् ॱयम् यो़प्प दी सुङ्। घन्ड हीन् सीन्न खीत्रङ्गी झ्यीबे लेल ङे को़न्ज्योक् मीत् गुव थोङ्ज्युङ्। 3 हीगो झ्यीनी खीत्रङ्गी एल्ला ॱह घोन चीन युङे ॱलोप्स दी ढेन्सो़ झ्यीन हुल ॱएङ्गी दी डस्सीरङ् चीन झ्यीक्केल्ल ॱसीम् ज्युर्च्यीत्। हुन्दुक् झ्यीन तोक्स्यीप् झ्यीन मत् देत्न ॱनी, ङ युङ दी खीत्रङ्ल थोप्तक् मीत्ल की़न्ज्येन् युङ डस्सी थो़क्केन् बेत्। 4 ॱनी हीन्न अक्, म दी खीत्रङ् उन सार्डीस्न यरीबे ढीनक् ॱमत् छ्याबे घो़ घो़ङ्गुक्। ॱनी हुब घो़ कप्पु चङ्बोक्म घो़न्न ङदङ् दल छ्यम्न डोवल ओ़ब हुब युङ्गेन् बेत्। 5 ॱसु ज्यला थो़न्न युङ्गुक्क हुगोल हुन्दुक् झ्यीबे घो़ कप्पु को़ङ्गेन्। हुनी छीये थोल ढीन यो़प्पे हुगी मीङ् दी ॱमीत् ॱसो़प्प स्योक्केन्। हुनी ङे यप् धङ् खोङ्गी तेङ् यी़गी भङ्ज्येम्ब घयेक्की ढुङ्दु हुगो ङे हीन् सीन्न सीक्केन्। 6 ॱसुल आम्ज्योक् यो़प्प हुगी हीगो नेन्ज्यीत्, धम्बे थुगी छ्यो़ छो घयेत्ल घन्ड सीगुक्क। फीलाडेल्फीयागी छ्यो़ छोल ढीब ७-१३ 7 हीगो फीलाडेल्फीयागी छ्यो़ छोगी ढीक्ल को़बे तेङ् यी़गी भङ्ज्येम्बल ढीज्यीत्। हीगो धक्पर् धङ् दीम्बर् यो़क्केन्, ज्याबु दाऊद्गी च्यी थोप्न यो़प्प च्येम्मे सीगुगो झ्यीज्यीत्। हीगी गोच्च पीक्सोङ्न ॱनी, ॱसी़ इक् च्यो़त् ॱमीत् छुगेन् बेत्। ॱनी यङ् हीगी गोच्च च्येस्सोङ्न ॱनी, हुगो ॱसी़ इक् पीक् ॱमीत् छुगेन् बेत्। 8 खीत्रङ्गी घङ् झ्यीप्पे ले घयेत् कुरीक् ङल ॱस्यो़च्च्ये यो़त्। तेदे खीत्रङ्गी ढीक्ल ङे गोच्च पीक्न स्यक्पेन्। हीगो ॱसी़ इक् च्यो़त् ॱमीत् छुगेन् बेत्। खीत्रङ्ल ॱस्यीक् मीत्न अक्, ङे केच्च्यल नेन्न ङे मीङ् ॱलो़ ॱमत् तङ देस्सोङ्। 9 तेदे उन यहुदी हीन् सीक्केन् हुब घयेत् म दी दीम्बरङ्गी यहुदी मेम्ब, जी़म बेत्। हुब शैतान्गी छ्यो़ छोगी मी बेत्। ङे खीत्रङ्ल गन्दीय झ्यम्ब झ्यीक्कुक् ॱनो़ब हुबे ॱह घोज्ये यो़प्पल हुब खीत्रङ्गी दोङ्दु छ्यक् छो़दु ची़क्केन्। 10 ङे केच्च्यल नेन्न खीत्रङ्गी धु छ्यीम्मु च्यङ्न थीरी देत्तुक्। हुगो झ्यीनी जम्लीङ् की़ङ्गी मी घयेत्ल युङ्गेङ्गी छो़त्लीङ्गी दुक्प हुगी लक्नी खीत्रङ् ङे छ्योप्न स्योक्केन्। 11 ङ ज्योक्पु युङ्गेन् हीनो। रङ्ल ज्ये थोप्केन् थोप् छ्यीम्मी़ स्यमुङ् दी ॱसी़ इक् ठोन डो छुज्ये मीप्पल हुन्दो रङ्गी ॱसीम्ल घङ् यो़प्पे लेमु दी तेम्बोक्म सुङ्ज्यीत्। 12 ॱसु ज्यला थो़न्न युङ्गुक्क हुगो ङे को़न्ज्योक् स्युसे छ्यो़गङ्गी का च्यीक्ल सो़न, हुनी हुगो नम्ल अक् छ्यील थो़न् मीत् गो़ब युङ्गेन् बेत्। हुनी हुल ङे को़न्ज्योक्की छेन् धङ् को़न्ज्योक् च्यानी इगी तेङ् यी़नी मल्ल भप्न युङ्गेन् ङे को़न्ज्योक्की सार् यरुशलेम् ॱसम्बे मीङ् धङ् ङरङ्गी मीङ् ॱसम्ब च्यीक् हुल ढीन स्योक्केन्। 13 ॱसुल आम्ज्योक् यो़प्प हुगी हीगो नेन्ज्यीत्, धम्बे थुगी छ्यो़ छो घयेत्ल घन्ड सीगुक्क। लाओडीसीयागी छ्यो़ छोल ढीब १४-२२ 14 हीगो लाओडीसीयागी छ्यो़ छोगी ढीक्ल को़बे तेङ् यी़गी भङ्ज्येम्बल ढीज्यीत्। हीगो आमेन् धङ् ज्युरुव मीप्प केच्च्य तेम्बोक्म ॱस्यो़क्केन्, को़न्ज्योक्की छ्यादु ची़प्प घयेत् कुरीक् छ्यासे चव दीगी सीगुगो झ्यीज्यीत्। 15 खीत्रङ्गी घङ् झ्यीप्पे ले घयेत् ङल कुरीक् ॱस्यो़च्च्ये यो़त्। खीत्रङ् ढङ्मु उक् मीन्दुक्। ढोम्मु उक् मीन्दुक्। यङ् न ॱनी ढङ्मु हीन् तङे। यङ् न ॱनी ढोम्मु हीन् तङे। 16 खीत्रङ् ढङ्मीन् ढोम्मीन् दुक्। हुगो झ्यीनी खीत्रङ् ङे खनी च्युन पुर्केन्। 17 खीत्रङ्गी ङीत् छ्युक्पु यो़त्। ङीत् बरल थो़न्न यो़त्। ङीत्ल घन्डे गो़ज्येत् एत् मीत् सीगुक्। खीत्रङ् दुक्पोक्म ॱङीङ्ज्यी ॱलोङ्गेन् टङ्बु स्यर्च्योक् च्यरेङीय यो़प्प खीत्रङ्गी ॱह मत् घोसोङ्। 18 हीगी ढीक्ल खीत्रङ्ल ङे ढो़ टेत् योङ्। स्यी़न्न चङ्मल सो़बे ॱसीर् ङे लक्नी नो़। हुनी खीत्रङ् दीम्बरङ्गी छ्युक्पु युङ्गेन् बेत्। खीत्रङ् ङे लक्नी घो़ कप्पु नो़। हुनी खीत्रङ् च्यरेङीय ङु छय मीप्प युङ्गेन् बेत्। ॱमीक्ल ॱही़न्ज्येमे ॱमीक्मेन् नो़। हुनी खीत्रङ्गी ॱमीक्की थोङ्गेन् बेत्। 19 ङे ॱसुल झ्यम्ब झ्यीगुक्क हुल लप्स्य तङ्न छर्की च्यो़क्केन्। ढङ्मीन् ढोम्मील्ल मेम्ब, दीम्बरङ् ॱसीम् ज्युर्न लोक्च्यीत्। 20 तेदे गोच्च पीक्रो झ्यी सीन्न ङ गोक्केक्नी सीक्केन्। ॱनी ॱसी़ ङे केत् ॱह घोन गोच्च पीक्न युङ्गुक्क ङ हुगोदङ् दल नङ्ल स्युन सम सगेन्। 21 ङ ज्यला थो़न्न युङ्नी यप्की ॱवङ् च्येम्मे स्युडील खोङ्दङ् दल दो़च्च्ये ॱनोङ्न यो़त्। ॱनी हीगो डस्सी मी ॱसु ज्यला थो़न्न युङ्गुक्क हुगो ओक् ङे ॱवङ् च्येम्मे स्युडील ङदङ् दल दो़च्च्ये यो़प्प सोगेन्। 22 ॱसुल आम्ज्योक् यो़प्प हुगी हीगो नेन्ज्यीत् धम्बे थुगी छ्यो़ छो घयेत्ल घन्ड सीगुक्क सीन्न ॱस्येच्च्युङ्। |
© 1995 Wycliffe Bible Translators, Inc. and Nepal Bible Society
Wycliffe Bible Translators, Inc.