ॱसाल्केत् 22 - ल्होमीछीये छ्यु चङ्बु थो़म्ब १-५ 1 हीनी यङ् हुगी भङ्ज्येम्ब दीगी ङल छीये छ्यु चङ्बु च्यीक् तो़न्ज्युङ्। हुगो को़न्ज्योक् धङ् लुक्टुक्की ॱवङ् च्येम्मे स्युडी ढुङ् दीनी मल्ल थो़न्न युङ्गुक्। हुगो ॱस्यी डस्सी टक्सी दुक्। 2 हुगी चङ्बु दी सार्की ॱसट्टक् दीनल डोगुक्। ॱनी चङ्बु दीगी ॱये धङ् ॱयेन् दील छीये दोङ्बु री री दुक्। हुगी दोङ्बु दील दव रीदङ् रील डलु छ्यागुक्। ॱनी लो च्यीक्की नङ्ल छ्यल् च्युन्नी छ्यागुक्। हुगी दोङ्बी़ लेक्मक् घयेत् दीगी ज्यी़त् ज्यी़क्की मी घयेत्ल ॱमेल्ल फेङ्गुक्। 3 हुगी सार् उन ॱमो़त्मु सुक्नरे ढङ् घन्ड अक् मीन्दुक्। को़न्ज्योक् धङ् लुक्टुक्की स्युडी दी उन दुक्। ॱनी को़न्ज्योक्की ॱयोक्पु घयेक्की को़न्ज्योक्ल स्यप्च्यी़ पुस दी उन दुक्। 4 ॱनी हुब घयेत्ल को़न्ज्योक्की स्यारे तज्ये ॱनोङ्गुक्। ॱनी हुब घयेक्की थोक्कोक् दील को़न्ज्योक्की छेन् ढीन दुक्। 5 ॱनी हुदु नम् ॱरो़ज्ये मीप्प युङ्गुक्। हुदु ङीमे ओ़त् धङ् बत्तीगी गो़ज्येत् घन्ड अक् मीन्दुक्। घन्ड हीन् सीन्न हुदु चोव ज्यीन्दक् को़न्ज्योक्की मेङ्गे च्यवली थोङ्गुक्। हीनी हुब घयेक्की धी़ नम ज्यी़न्दु ॱवङ् च्योङ्गेन् बेत्। येशु जम्बुलीङ्ल ज्योक्पु झ्यो़ङ्गेन् ६-२१ 6 हीनी यङ् हुगी भङ्ज्येम्ब दीगीरङ् ङल हीगी केच्च्य घयेत् हीगो दीम्ब धङ् ज्युरुव मीप्प यो़क्केन् बेत्। ह ज्योक्पा घन्ड घन्ड युङ्गेन् बेक्क हुगी केच्च्य हुगो खोङ् रोरङ्गी ॱयोक्पु घयेत्ल तो़न्न ॱस्यो़त्तु कलुङ् ॱस्यो़क्केन् घयेत्ल खोङ् रोरङ्गी धम्बे थु ॱनङ्गेन् चोव ज्यीन्दक् को़न्ज्योक्की भङ्ज्येम्ब ङ तङ्न युङ बेत्। 7 येशुगी ॱसुङ्गुगो। तेदे ङ ॱनी ज्योक्पु युङ्गेनो। हीगी यीगी हील यो़प्पे केच्च्य धङ् ॱङो़स्स्यी घयेत्ल ॱसी़ नेङ्गुक्क हुगो ॱसोदी च्येम्म युङ्गेन् बेत् सीन्न ॱस्येच्च्युङ्। 8 हीगो जेङ् थोङ्गेन् धङ् घोगेन् दी ङ युहन्ना हीन्। ॱनी ङे हीगो थोङ्नी ङल हीगो तो़ङ्गेन् हुगी भङ्ज्येम्ब दील ङे ढीम्बु छ्यक् छेबेन्। 9 हुनी खोङ्जो़ ङल छ्यक् ॱमत् छो़लेत्। ङ को़न्ज्योक्की ॱयोक्पु, रङ् धङ् रङ्गी पी़न्ज्या, कलुङ् ॱस्यो़क्केन् घयेत् धङ् हीगी यीगील यो़प्पे केच्च्यल नेङ्गेन् घयेत् डस्सीरङ् हीन्। को़न्ज्योक्लरङ् क छ्यक् छो़। 10 यीगील ढीन यो़प्पे हीगी केच्च्य धङ् ॱङो़स्स्यी घयेत्ल धम्डुक् ज्यप्न मत् स्योक्। ह हीगो ताबे धी़ ॱस्यच्चल ॱलीत् छर बेत्। 11 ढङ्ज्ये मीप्पे मी ढङ्ज्ये मीप्प दीरङ् झ्यीज्यीत्। मीङेन् झ्यीक्केङ्गी मी मीङेन् दीरङ् झ्यीज्यीत्। ढङ्बु झ्यीक्केङ्गी मी ढङ्बु दीरङ् झ्यीज्यीत्। धक्पर् च्येम्मे मी हरुङ् धक्पर् युङ झ्यीज्यीत्। 12 येशुगी ॱसुङ्गुगो। तेदे ङ ॱनी ज्योक्पु युङ्गेनो। हुनी मी रीदङ् रीगी घङ् झ्यीबे लेगी लेन् टो़क्केनो। 13 ङ ॱनी अल्फा धङ् ओमेगा, गोम ॱङो़न् धङ् थम दी हीन्। 14 मी ॱसी़ रोरङ्गी घो़ टी़न युङ्गुक्क हुगो ॱसोदी च्येम्म बेगो। हुल छीये दोङ्बी़ डलु दी सज्ये ॱनोङ्गेन् बेत्। ॱनी हुल हुगी सार्की च्यारीगी गोच्चनी नङ्ल स्युक्च्येमे ॱहक् थोप्केन् बेत्। 15 ॱनी सार्की नङ्ल स्युक् ॱमत् छुब, छ्यील लेनर घयेत् दी की डस्सी स्यीलोक्सीगी ले झ्यीक्केन्, जुम्डी़ तो़ङ्गेन्, छ्ये ज्युक्केन्, मीस्सेन्, ॱल्ह धङ् कुल छ्यक् छ्यो़प्प पुगेन्, ॱएजङ धङ् ॱएलमे छङ् घयेत् दी युङ्गेन् बेत् सीच्च्युङ्। 16 हीगी केच्च्य घयेत् हीगो छ्यो़ छो घयेत्ल तो़न्न ॱस्यो़त्तु ङे दीम्बे केच्च्य ॱस्यो़क्केन् ङ येशुगी तेङ् यी़गी भङ्ज्येम्ब खीत्रङ् च्याल तङेन्। ङ ॱनी दाऊद्ल छ्येप्प धङ् खोङ्गी दुङ्ज्यी़क्की बुरुव धङ् टक्सी थोरङ् कच्च्येन् हीन् ॱसुङ्ज्युङ्। 17 धम्बे थुगी मी घयेत्ल ह ॱस्योक् सीन्न भो़क्कुक्। ॱनी ॱनम दीगी इक् ॱस्योक् सीन्न भो़क्कुक्। ॱनी ॱस्योक् सीर हीगो ॱसी़ ॱह घोगो़दङ् हुगी इक् ॱस्योक् सीन्न भो़ज्यीत्। ॱसु ख कोम्गो़दङ् हुगो ॱस्योक्। ॱनी थुङ्गीन् थेत्न, हुल हीन्दुक्रङ्ल छीये छ्यु थुङ्ज्ये थोप्केन् बेत्। 18 हीगी यीगी हील ढीन यो़प्पे केच्च्य धङ् ॱङो़स्स्यी घयेत् हीगो ॱसी़ ॱह घोगो़दङ् हुल गन्दीक्म सीक्केनो। घन्ड हीन् सीन्न ॱसी़ हील ॱनो़म्ब ज्यक्को़दङ् हुगोल को़न्ज्योक्की इक् हील ढीन यो़प्पे च्यो़न् छ्यीम्मु घयेत् दी तोङ्गेन् बेत्। 19 ॱनी यङ् ॱसी़ हीगी यीगील ढीन यो़प्पे केच्च्य धङ् ॱङो़स्स्यी घयेत्नी केच्च्य यरी तो़न्न पुको़र्दङ् हुगो च्यानी हील ढीन यो़प्पे छीये दोङ्बी़ डलु सज्येमे ॱहक् दी धङ् को़न्ज्योक्की ढीक्ल पी़प्पे हुगी सार् दीगी नङ्ल स्युक्च्येमे ॱहक् दी को़न्ज्योक्की ठो डोगेन् बेत्। 20 हीगो कुरीक् खुङ्देन् हीम्बे पङ्बु जेक्केन् दीगी ङ ॱनी ज्योक्पु युङ्गेनो। हीगो गन्दीय बेत् ॱसुङ्गुगो। आमेन् चोव ज्यीन्दक् येशु झ्यो़र्रो झ्यी। 21 चोव ज्यीन्दक् येशुगी थुज्यी खीत्रङ् घयेत्तङ् दल युङ् युङ युङ्ज्ये यो़प्प स्योक्च्यीत्। |
© 1995 Wycliffe Bible Translators, Inc. and Nepal Bible Society
Wycliffe Bible Translators, Inc.