ॱसाल्केत् 21 - ल्होमीतेङ् यी़ ॱसम्ब धङ् ॱस जम्बुलीङ् ॱसम्ब १-८ 1 हीनी तेङ् यी़ ॱसम्ब धङ् ॱस जम्बुलीङ् ॱसम्ब ङे थोङ्ज्युङ्। ॱएङ्गी तेङ् यी़ दी धङ् ॱएङ्गी ॱस जम्बुलीङ् दी येनत्तुक्। छ्यु ज्यम्जो छ्यीम्मु उक् मीन्दुक्। 2 हीनी तेङ् यी़ को़न्ज्योक् च्यानी मल्ल को़न्ज्योक्की ढीक्ल पी़प्पे सार् यरुशलेम् ॱसम्ब च्यीक् भप्न युङ ङे थोङ्ज्युङ्। हुगो मक्पे ढीक्ल ॱनमल भाज्ये लेसी पम्सी ज्यप्न बीम्ब डस्सी दुक्। 3 हीनी स्युडी ढुङ् दीनी मल्ल केत् छ्यीम्मु च्यीक्ल ह को़न्ज्योक् स्युस मी घयेक्की घुङ्दु झ्युङ्सोङ्। खोङ् मी घयेत्तङ् दल स्युदु झ्यो़ङ्गेन् बेत्। ॱनी हुगी मी हुब को़न्ज्योक्की मीस्सीर् हीम्ब युङ्गेन् बेत्। ॱनी खोङ् हुबदङ् दल स्युनी, खोङ् हुबे को़न्ज्योक् हीम्ब युङ्गेन् बेत्। 4 ॱनी हुबे ॱमीक्च्यु घयेत् दी खोङ्गी फीन बीन्न, हीनी झ्यीब दी हुबल ॱस्यीव छ्येप्प मीप्प, नङेन् मीप्प, ङुव मीप्प, दुक्प मीप्प, ॱएम्मागी लेमु घयेत् दी कुरीक् येसोङ् सीस्सोङ्। 5 हीनी स्युडील स्युगेन् दीगी ह म दीरङ् घङ् यो़प्प घयेत् जेङ् ङ ॱसम्बल सोगेन् ॱसुङ्सोङ्। हुनी खोङ्गी ङल ङे ॱस्येप्पे केच्च्य हीगो रङ्गी यीगील ढीन स्योक्। हीगो दीम्ब धङ् ज्युरुव मीप्प यो़क्केन् बेत् ॱसुङ्ज्युङ्। 6 हीनी खोङ्गी यङ् ङल ह ॱमरोक् कोरोक् ढुप्सोङ्। ङ ॱनी अल्फा धङ् ओमेगा, गोम ॱङो़न् धङ् थम दी हीन्। ॱनी ॱसु ख कोम्न युङ्गुक्क हुल नुक्रङ्ल छीये छ्यु थो़न्सनी छ्यु तीक्केन्। 7 ॱनी ॱसु ज्यला थो़न्न युङ्गुक्क हुगोल हीन्दुक् झ्यीबे ज्ये थोप्केन् बेत्। ङ हुगी को़न्ज्योक् धङ् हुगो ङे भीजल युङ्गेन् बेत्। 8 ॱनी ॱङीङ् च्युङेत्मु खुर्केन्, छ्य मीत् स्योक्केन्, स्यीलोक्सीगी ले झ्यीक्केन्, मीस्सेन्, छ्ये ज्युक्केन्, जुम्डी़ तो़ङ्गेन्, ॱल्ह धङ् कुल छ्यक् छ्यो़प्प पुगेन् धङ् ॱएजङ हुन्दुक् झ्यीब कुरीक् हुब घयेक्की दो़स्स दी मुसी धङ् मी बर्से छोल युङ्गेन् बेत्। हील ॱस्यीव तीङ्मा सीक्केन् बेत् ॱसुङ्ज्युङ्। यरुशलेम् ॱसम्ब ९-२७ 9 हुनी स्युक् थदु च्यो़न् छ्यीम्मु ॱनम्ब दी़न् तोङ्ज्येम फोप्प दी़न् खुरे तेङ् यी़गी भङ्ज्येम्ब दी़म्बु दीगी छीक्नी च्यीक् ङ च्याल युङ्न हुगी ङल डो। रङ्ल ङे लुक्टुक्की ॱनम ॱसम्ब तो़न् योङ् सीच्च्युङ्। 10 हुनी ङ धम्बे थुगी ॱवङ्ल फीन्ज्युङ्। ॱनी ङ हुगी भङ्ज्येम्ब दीगी लदोक् छ्यीम्मु थोन्दीम च्यीक्ल ठीक्न ङल इगी तेङ् यी़ को़न्ज्योक् च्यानी मल्ल को़न्ज्योक्ल पी़प्पे सार् यरुशलेम् भप्न युङ तो़न्ज्युङ्। 11 हुल को़न्ज्योक्की तो़त्वङ्गी ओ़क्की म दीरङ् हुगो टक्सी रीम्बुर् छ्यीये दो ॱस्यीदो डस्सी च्यस्सीङीय दुक्। 12 हुगी सार् दीगी छ्यी खोर्ल च्यारी गर्चम थोन्दीम दुक्। हुगी छ्यो स्यील गोच्च च्युन्नी दुक्। ॱनी गोच्च रीदङ् रीन तेङ् यी़गी भङ्ज्येम्ब री री दो़क्कुक्। ॱनी गोच्च च्युन्नीबु दील रीदङ् रील इस्राएल्की पुबु च्युन्नीबी़ मीङ् दी ढीन दुक्। 13 ॱनी ॱस्यर् छ्योल गोच्च ॱसुम्, झ्यङ् छ्योल गोच्च ॱसुम्, ॱल्हो छ्योल गोच्च ॱसुम्, नुप् छ्योल गोच्च ॱसुम् दुक्। 14 च्यारी दील ॱसप्तेन् च्युन्नी दुक्। ॱनी ॱसप्तेन् रीदङ् रील लुक्टुक्की ठीक्नल च्युन्नीबी़ मीङ् दी ढीन दुक्। 15 ॱनी ङदङ् तम्स्यु लप्केन् भङ्ज्येम्ब दील हुगी सार् दी धङ् हुगी च्यारी दी, हुनी च्यारीगी गोच्च घयेत् दील छेत् ज्यक्च्येमे ॱसीर्की तोक्लङ् च्यीक् दुक्। 16 सार् दी ढुप्स्यी गोप्स्यीय दुक्। ज्यी़त् दी, स्येङ् दी, थोस्स्येङ् दी झ्यीब डस्सी डस्सी दुक्। ॱनी भङ्ज्येम्ब दीगी रोरङ्गी तोक्लङ् दीगी ज्यी़त् दी, स्येङ् दी धङ् थोस्स्येङ् दी छेत् ज्यप्नी, स्योक् रील दोम्ब १४० झ्यीब तोङ्डक् च्युन्नी छीसोङ्। 17 च्यारीगी चीक्स्येङ् दील छेत् ज्यप्नी, ठु ज्यदङ् स्यीप्च्यु स्यप्स्यी छीसोङ्। हुगी छेत् दी कोलीमीगी लेमु डस्सी दुक्। 18 च्यारी दी रीम्बुर् छ्यीये दो यस्पीस् सीक्केल्ल सो़दुक्। सार् दी ॱसीर् चङ्मे सो़न ॱस्यी डस्सी च्यस्सीङीय दुक्। 19 च्यारीगी ॱसप्तेन् घयेत् दील रीम्बुर् छ्यीये दो ॱनम्ब च्युन्नी ॱलुक्न ज्येन्न दुक्। ॱसप्तेन् धङ्बु दी यस्पीस् दुक्। ॱङीब दी इन्डनीली दुक्। ॱसुम्ब दी खल्सेदोनी दुक्। स्यीब दी एमेरल् दुक्। 20 ॱङब दी सार्डोनुक्स् दुक्। ढुक्प दी सार्डीयस् दुक्। दी़म्ब दी क्रीसोलीट् दुक्। ज्येप्प दी बेरुल् दुक्। गुब दी तोपास् दुक्। च्युब दी क्रीसोप्रस् दुक्। च्युज्यीक्प दी हुवसीन्थ् दुक्। च्युन्नीब दी अमेथीस्त् दुक्। 21 च्यारीगी गोच्च च्युन्नीबु दी रीदङ् री मुदीक् री रील सो़दुक्। ॱसट्टक् दी ॱसीर् चङ्मे सो़न ॱस्यी डस्सी च्यस्सीङीय दुक्। 22 ॱनी उन छ्यो़गङ् थोङ्मोङ्। घन्ड हीन् सीन्न छ्यो़गङ्गी छप्पुल ॱवङ् की़न् च्येम्मे चोव ज्यीन्दक् को़न्ज्योक् धङ् लुक्टुक् दुक्। 23 ॱनी हुदु ङीम धङ् दच्च्ये ओ़क्की गो़ज्येत् मीन्दुक्। घन्ड हीन् सीन्न को़न्ज्योक्की तो़त्वङ्गी ओ़त् धङ् लुक्टुक्की ओ़क्की हुदु च्यवलीय युङ्गुक्। 24 ॱनी हीगी ओ़त्ल जम्बुलीङ्गी ज्यी़त् ज्यी़क्की मी घयेत् डोगेन् बेत्। जम्बुलीङ्गी ज्याबु घयेक्की रोरङ्सो़ ॱनङ् छ्यीम्मी़ यप्च्य घयेत् दी हुदु खुर्न च्यो़दु युङ्गेन् बेत्। 25 हुदु छीगङ् नम् ॱरो़ज्ये मीप्प युङ्गेन् बेत्। ॱनी च्यारीगी गोच्च घयेत् दी फुगी ॱमीत् च्यो़प्प स्योक्केन् बेत्। 26 हीनी ज्यागक् ज्यागक्की रोरङ्सो़ ॱनङ् छ्यीम्मी़ यप्च्य घयेत् दी हुदु खुर्न च्यो़दु युङ्गेन् बेत्। 27 ॱनी हुगी सार् हुगी नङ्ल चङ्ज्ये मीप्पे ढङ्, स्यीलोक्सीगी ले झ्यीक्केन् धङ् ॱएजङे ढङ् ज्यी़त् च्यीक् इक् स्युक्तु ॱमीत् ची़क्केन् बेत्। लुक्टुक्की छीये थोल मीङ् ढीन स्यक्प घयेत् दीरङ् क हुगी नङ्ल स्युक्च्ये ॱनोङ्गेन् बेत्। |
© 1995 Wycliffe Bible Translators, Inc. and Nepal Bible Society
Wycliffe Bible Translators, Inc.