ॱसाल्केत् 20 - ल्होमीलोङ तोङ्डक् च्यीक्की धी़ १-६ 1 हीनी यङ् तेङ् यी़नी मल्ल भङ्ज्येम्ब च्यीक् भप्न युङ ङे थोङ्ज्युङ्। ॱनी हुगी लक्ल खीस मीप्पे ॱसेङ्दोङे दीमीक्की च्यी दी धङ् च्यागोङ् गर्चम च्यीक् दुक्। 2 ॱनी हुगी भङ्ज्येम्ब दीगी ॱङो़ङ्गी डी़, डुक्, दी़क्की चो, शैतान् दी सुङ्न लोङ तोङ्डक् च्यीक् थुक्की ढीक्ल कीङ्सोङ्। 3 हुनी हुगो खीस मीप्पे ॱसेङ्दोङ दीनी मल्ल पुर् तङ्सोङ्। ॱनी लोङ तोङ्डक् च्यीक् थुक्ल हुगी डुक् हुगो थो़न्स मीप्प घप्तोक् चेम्बोक्म च्येत्न धम्डुक् ज्यप्न स्यक्सोङ्। हुगी कप्ल ज्यी़त् ज्यी़त् घयेत्ल ॱयोङ्गोर् ज्यप्न च्युगेन् मीप्प झ्युङ्सोङ्। ॱनी लोङ तोङ्डक् च्यीक् दी छीनी, हुगो धोबा च्यीक्की ढीक्ल यङ् तोङ्गेन् बेत्। 4 हीनी यङ् ङे थोङल इगीन ॱवङ् च्येम्मे स्युडी गज्येन् दुक्। ॱनी स्युडी रीदङ् रील दो़क्केन् री री दुक्। हुब घयेत्ल ठीम् च्यो़च्च्येमे ॱवङ् बीन्दुक्। हुब घयेत् येशुगी ढीक्ल दीम्बे केच्च्य ॱस्येप्पल धङ् को़न्ज्योक्की ॱसुङ्रप्की केच्च्य ॱस्यो़प्पे ढीक्ल गो दुम् तङ घयेक्की ॱसीम् दी बेत्। हुब घयेक्की हुगी ॱसीम्ज्येन् हुल छ्यक् ॱमत् छेब, हुगी डवु दील अक् छ्यक् ॱमत् छेब, थोक्कोक्ल आक् हुगी दक् मत् लीम्ब, ॱनी लक्पल अक् मत् लीम्बे मी घयेत् दी हुब बेत्। ॱनी हुब कुरीक् ॱसोम्बुल लोङ्न लोङ तोङ्डक् च्यीक् थुक् ख्रीष्ट्तङ् दल ॱवङ् च्योङ थोङ्ज्युङ्। 5 ॱस्यीनी, यङ् ॱएन्स्युक्ल ॱसोम्बुल लोङे मी दीब हुब दुक्। हीन्डो़ ॱयोङ्मा ॱस्यीनर घयेत् दी तीङ्ला लोङ तोङ्डक् च्यीक् ॱसोङ्नी मेन्द, ॱसोम्बुल मत् लोङ्सोङ्। 6 गोम ॱएन्स्युक्ल ॱसोम्बुल लोङ्ज्ये ॱनोङे मी घयेत् हुब ॱसोदी छ्यीम्मु च्येम्म को़न्ज्योक्की मी चङ्म हीम्ब युङ्गेन् बेत्। घन्ड हीन् सीन्न हुब घयेत् ॱस्यीव तीङ्मागी ॱवङ्गी होक्ल ॱमीत् ॱस्योर, हुब को़न्ज्योक् धङ् ख्रीष्ट्की छ्यो़प्पो़ल्ल खो़त्न, ख्रीष्ट्तङ् दल लोङ तोङ्डक् च्यीक् थुक् ॱवङ् च्योङ्ज्ये ॱनोङ्गेन् बेत्। शैतान् ॱनलल पुर् तोङ्गेन् ७-१० 7 हुनी लोङ तोङ्डक् च्यीक् दी छीनी, शैतान् हुगो रोरङ् ॱलुक्से चो़न् दीनी तोङ्गेन् बेत्। 8 हुनी शैतान् हुगो जम्बुलीङ्गी छ्यो स्यी खदक्ल फीन्न यङ् ॱयोङ्गोर् ज्यप्न गोग् धङ् मागोग् सीक्केन् दी, हुनी ज्यागक् ॱयोङ्म घयेत् छ्यी़दु ची़त्न ॱमक् थुक्च्येल ॱयोप्केन् बेत्। हुगी ॱमक्मी घयेत् दी छेत्मीत् ढङ्मीत् म दीरङ् छ्यु ज्यम्जो छ्यीम्मी़ झ्यीम डस्सी युङ्गेन् बेत्। 9 ॱनी हुब ॱस घल अक् छेत्मीत् ढम्न युङ्न को़न्ज्योक्की मी चङ्म यो़स्स खोङ्गी झ्यम्बे सार्ल हुबे थागोर् ज्यप्सोङ्। हुनी थागोर् ज्यक्केन् घयेत् दील तेङ् यी़नी मल्ल मी बर छर्न युङ्न, हुब कुरीक् छीक्सोङ्। 10 हुनी ज्यागक् घयेत्ल ॱयोङ्गोर् ज्यक्केन् हुगी दी़क्की चो हुगो मुसी धङ् मी बर्से छो दील पुर् तङ्सोङ्। उन हुगी ॱसीम्ज्येन् दी धङ् कलुङ् जी़म ॱस्यो़क्केन् दी इक् पुर्न यो़प्प बेत्। हुबल हुदु ङीन् छेन् मीप्प धी़ नम ज्यी़न्दु दुक्स्यील सेच्च्ये मीप्पे ॱनर्मी नोङ्गेन् बेत्। ॱस्यीनर घयेत्ल ठीम् च्यो़प्पे ङीन् छ्यीम्मु ११-१५ 11 हीनी यङ् ॱवङ् च्येम्मे स्युडी छ्यीम्मु कप्पु च्यीक्ल स्युगेन् च्यीक् थोङ्ज्युङ्। ॱनी खोङ्गी स्यारे ढुङ्नी ॱस धङ् ॱनम् ढो़न ॱसोङ्न हुनी मीप्पल येसोङ्। 12 हीनी स्युडी ढुङ् दीन मी ॱस्यीनर घयेत् छ्यीज्युङ्मीत् कुरीक् क लोङ्न दो़क्कुक्। हुनी पीज्य गज्येन् ॱलोक्न तेसोङ्। हुनी यङ् पीज्य ॱयोङ्म च्यीक् ॱलोक्न तेसोङ्। हुगो छीये थो दी बेत्। हुगी ॱस्यीनर घयेत् दीगी मीजील एल्ला घन्ड घन्ड झ्यी यो़दङ् हुगो कुरीक् हुगी पीज्य घयेत् दीगी नङ्ल ढीन दुक्। ॱनी हुल तेन रीदङ् रील ठीम् च्येस्सोङ्। 13 ॱस्यीवनी, ॱस्यीवे यी़नी धङ् छ्यु ज्यम्जो छ्यीम्मुनी थो़न्न युङे ॱस्यीनर घयेत् कुरीक् रीदङ् रीगी रोरङ्सो़ एल्ला घङ् झ्यीबे लेल तेन हुल पीबे ठीम् च्येस्सोङ्। 14 हुनी ॱस्यीव दी धङ् ॱस्यीवे यी़ दी मी बर्से छो दील पुर् तङ्सोङ्। हुगी मी बर्से छो हुल ॱस्यीव तीङ्मा सीक्केन् बेत्। 15 ॱनी छीये थो दील तेन उन मीङ् ढीन मीप्प घयेत् दी कुरीक् हुगी छो दील पुर् तङ्सोङ्। |
© 1995 Wycliffe Bible Translators, Inc. and Nepal Bible Society
Wycliffe Bible Translators, Inc.