ॱसाल्केत् 2 - ल्होमीएफीसस्की छ्यो़ छोल ढीब १-७ 1 हीगो एफीसस्की छ्यो़ छोगी ढीक्ल को़बे तेङ् यी़गी भङ्ज्येम्बल ढीज्यीत्। हीगो लक्प ॱये छ्योन कर्म दी़न् च्येम्म ॱसीर्की छ्यो़त्मी दी़म्बी़ घुङ्ल छ्यम्गेन् दीगी सीगुगो झ्यीज्यीत्। 2 छ्यो़ छो नङ्दु खीत्रङ्गी कले च्येप्प, धु च्योङ धङ् हुनी ॱयोङ्मा घङ् झ्यीप्प घयेत् कुरीक् ङल ॱस्यो़च्च्ये यो़त्। मी ङेम्ब घयेक्की खल खीत्रङ् मत् नेम्ब हीम्ब ङल ॱस्यो़च्च्ये यो़त्। हुबे ङीत् ठीक्नल हीन् सीन्न सीक्केन् बेत्। ॱनी सीन्न अक्, खीत्रङ्गी हुबल छो़त् तेन जी़म हीम्ब ॱयुव पीक् छुसोङ्। 3 ङे मीङ्गी धो़न्दु खीत्रङ्गी धु च्यङ्न गुर् थेक्प धङ् थङ् छ्येप्प मीप्प झ्यीक्कुक्। 4 ॱनी हीन्न अक्, खीत्रङ्गी घुङ्न मीत् गुवे केच्च्य च्यीक् दुक्। हुगो खीत्रङ् नङ्दु गोम डस्सीगी झ्यम्ब दी हुन्दो मीन्दुक्। 5 हुगो झ्यीनी खीत्रङ् घनी हुन्दुक् झ्यीबल झ्युङ हुगो ढेन्सो़ झ्यीन ॱङर्की ॱसीम्बल ज्युर्न ॱएङ्गी लेमु डस्सीरङ् झ्यीज्यीत्। हुन्दुक् मत् झ्येन ॱनी, ङ युङ्न हुनी छ्यो़त्मी दीरङ् तोर् तोङ्गेन्। 6 ॱनी हीन्न अक्, म दी खीत्रङ्गी नीकोलैटन् ङो़गी मी घयेक्की लेल ङ डस्सीरङ् खीत्रङ्गी इक् ॱनम्दोक् झ्यीक्कुक्। 7 ॱसुल आम्ज्योक् यो़प्प हुगी हीगो नेन्ज्यीत्, धम्बे थुगी छ्यो़ छो घयेत्ल घन्ड सीगुक्क। ॱसु ज्यला थो़न्न युङ्गुक्क हुगोल ङे को़न्ज्योक्की ॱस्यीङ्नान यो़प्पे छीये दोङ्बी़ डलु दी सज्ये यो़प्पे क तीक्केन्। इस्मर्नागी छ्यो़ छोल ढीब ८-११ 8 हीगो इस्मर्नागी छ्यो़ छोगी ढीक्ल को़बे तेङ् यी़गी भङ्ज्येम्बल ढीज्यीत्। हीगो गोम ॱङो़न् धङ् थम, ॱस्यीनी यङ् ॱसोम्बुल लोङ्न यो़क्केन् दीगी सीगुगो झ्यीज्यीत्। 9 खीत्रङ् घयेत्ल दुक्प नोङ धङ् नोर् घन्ड अक् मीप्प हीम्ब ङल ॱस्यो़च्च्ये यो़त्। ॱनी हीन्न अक्, खीत्रङ् म दी छ्युक्पु यो़क्केन् बेत्। ॱनी उन यहुदी हीन् सीक्केन् हुबे खीत्रङ्ल ङेन्दम् लब अक् ङल ॱस्यो़च्च्ये यो़त्। हुब दीम्बरङ्गी यहुदी मेम्ब, शैतान्गी छ्यो़ छोगी मी बेत्। 10 ह हुन्दो हुगी युङ्गेङ्गी दुक्प हुल खीत्रङ् ज्यीब मत् झ्यीत्। खीत्रङ्ल छो़त्लीन् तज्येल दी़क्की चो हुगी खीत्रङ् यरी यरी चो़ल्ल ॱलुक्केन् बेत्। ॱनी स्यक्पु च्युजो़त् च्यीक् थुक् दुक्प नोङ्गेन् बेत्। ॱनी ॱस्यी गो़रङ् ॱस्यर्न आक्, थीरीय दो़त्। हुनी ज्येल थोबे थोप् छ्यीम्मी़ छीये स्यमुङ् दी ङे टेत् योङ्। 11 ॱसुल आम्ज्योक् यो़प्प हुगी हीगो नेन्ज्यीत्, धम्बे थुगी छ्यो़ छो घयेत्ल घन्ड सीगुक्क। ॱसु ज्यला थो़न्न युङ्गुक्क हुगो ॱस्यीव तीङ्माल ॱमीत् ॱस्यीगेन् बेत्। पर्गामम्गी छ्यो़ छोल ढीब १२-१७ 12 हीगो पर्गामम्गी छ्यो़ छोगी ढीक्ल को़बे तेङ् यी़गी भङ्ज्येम्बल ढीज्यीत्। हीगो ढी पदङ् ॱनोन्दीम, ख ॱङी यो़प्प च्येम्म दीगी सीगुगो झ्यीज्यीत्। 13 खीत्रङ् घन दो़क्को़प्प हुगो ङल ॱस्यो़च्च्ये यो़त्। खीत्रङ् शैतान्गी ॱवङ् च्येम्मे स्युडी यो़स्से लुङ्बन दो़क्केन् बेत्। ॱनी हीन्न अक्, ङे मीङ् डेन्न तेन्देन् झ्यीन दो़क्कुक्। हुदु शैतान्गी ॱवङ् च्येम्मे स्युडी यो़स्सदु ङे ढीक्ल दीम्बे केच्च्य ज्युरुव मीप्प ॱस्यो़क्केन् एन्टीपास् ङे धो़न्दु ॱसेत् तोङे यङ्ल अक् खीत्रङ्गी ङ छ्य स्योक्केन् मेन् सीन्न मत् सीस्सोङ्। 14 ॱनी हीन्न अक्, म दी खीत्रङ्गी उन मीत् गुवे केच्च्य च्यीक् दुक्। खीत्रङ्गी घुङ्न यरी यरीगी बालाम्गी ॱलोप्सल नेङ्गुक्। धङ्बु बालाम्गी बालाक्ल झ्यी़ ॱलप्न टेत्न, हुनी बालाक्की इस्राएली घयेत् दीक्पल च्यी़न कुल पुबे छो सदु धङ् दयम् झ्यीत्तु ची़प्प बेत्। 15 ॱनी हरुङ्द नीकोलैटन् ङो़गी मी घयेक्की ॱलोप्सल आक् खीत्रङ् यरीगी नेङ्गुक्। 16 खीत्रङ् हुन्दुक् झ्यीक्केन् घयेत् हुनी ॱसीम् ज्युर्च्यीत्। ॱसीम् मत् ज्युर्न ॱनी, ङ ज्योक्पु युङ्न खीत्रङ् हुन्दुक् झ्यीक्केन् घयेक्की डल लोङ्न ङे खल यो़प्पे ढी पदङ्गी बेङ्गेन्। 17 ॱसुल आम्ज्योक् यो़प्प हुगी हीगो नेन्ज्यीत्, धम्बे थुगी छ्यो़ छो घयेत्ल घन्ड सीगुक्क। ॱसु ज्यला थो़न्न युङ्गुक्क हुगोल ॱसुल आक् ॱस्यो़च्च्ये मीप्पे मन्न च्यीक् तीक्केन्। हुनी दो कप्पु च्यीक् इक् तीक्केन्। हुगी दो दील हुगी मी हुगी मीङ् ॱसम्ब च्यीक् ढीन युङ्गेन् बेत्। हुगी मीङ् दी दो थोप्केन् दील मेन्द, ॱयोङ् ॱसुल आक् ॱस्यो़च्च्ये मीत् युङ्गेन् बेत्। थीयाटीरागी छ्यो़ छोल ढीब १८-२९ 18 हीगो थीयाटीरागी छ्यो़ छोगी ढीक्ल को़बे तेङ् यी़गी भङ्ज्येम्बल ढीज्यीत्। हीगो मी बर डमी़ ॱमीक् धङ् च्युक्म स्यी़न् तङ टक्पोक्म डमी़ कङ्ब च्येम्म को़न्ज्योक्की ॱरेबी़ सीगुगो झ्यीज्यीत्। 19 खीत्रङ् नङ्दु झ्यम्ब झ्यीप्प, छ्य तेम्बर् स्योक्प, स्यप्च्यी़ ज्युक्पे ले धङ् धु छ्यीम्मु च्यङ्न दो़प्प ङल ॱस्यो़च्च्ये यो़त्। हीगो हरुङ्द गोमागी दीले मङा झ्यीक्कुक्। 20 ॱनी हीन्न अक्, म दी खीत्रङ्गी उन मीत् गुवे केच्च्य च्यीक् दुक्। उन भी़मीक् जीजेबेल्की ॱलोप्स दी खीत्रङ्गी क ॱमत् च्येस्सोङ्। हुगी ङ कलुङ् ॱस्यो़क्केन् हीन् सीन्न ङे ॱयोक्पु घयेत्ल ॱयोङ्गोर् ज्यप्न छ्ये ज्युक्तु ची़क्कुक्। ॱनी ॱल्ह धङ् कुल पुबे छो सदु उक् ची़क्कुक्। 21 हुगी भी़मीक् हुगो ॱसीम् ज्युर्न युङ्गो़ट्टो ॱनो़न ङे गज्येन् गुबेन्। हजो़त् थुक्ल हुगी छ्येमी़ ले दी ॱलो़ तोङ्ज्ये ॱनो़ब दीरङ् मीत् झ्यीप्पेत्। 22 ह हुगोल नज तङ्न नदु ची़क्केन्। ॱनी हुगोदङ् छ्ये ज्युक्केन् घयेत् हुगी लम्नी ॱसीम् ज्युर्न मत् युङ्न, हुबल अक् दुक्प छ्यीम्मु तोङ्गेन्। 23 ॱनी हुगी भी़मीक् हुगी खल नेङ्गेन् हुगी भीज डस्सी झ्यीब घयेत् दी ॱसो़क्केन्। हुनी क ङे मी घयेक्की ॱसीम्बे यीक्की ॱनोक्सम् घयेत्ल तेन जेङ् ॱह घोगुक् ॱनो़ब धङ् खीत्रङ् रीदङ् रीगी लेगी लेन् च्यो़गुक् ॱनो़ब छ्यो़ छो घयेत्ल ॱस्यो़च्च्ये युङ्गेन् बेत्। 24-25 ॱनी उन हुगी भी़मीक्की ॱलोप्स ज्यबल मीत् नेङ्गेन्, शैतान्गी धो़न् तीङ् सप्पोक्म सीक्केन् हुगो ॱस्यो़च्च्ये मीप्प च्येम्म खीत्रङ् घयेक्की ॱसीम्ल घङ् यो़प्पे लेमु दी सुङ्न ङ युङ् युङ् थुक्ल थीरी दो़च्च्यीत्। हीजो़त् च्यीक् मेन्द, हीले ॱल्हक्मा गेन् ॱयोङ् ॱमीत् को़। 26 ॱसु ज्यला थो़न्न युङ्गुक्क ॱसी़ स्युक् थम थुक् ङे ॱनो़बे ले झ्यीगुक्क हुल जम्बुलीङ्गी ज्यी़त् कुरीक्की थोक्ल डोगेङ्गी ॱवङ् टो़क्केन्। 27 ॱनी हुगी ठीम् तङ्न च्यागी तोक्लङ् बेन्न जम च्यक्प डस्सी हुब घयेत्ल ॱवङ् च्योङ्गेन् बेत्। (ॱसुङ्रप्की गुल्लु २:९) हुगो ङल ङे यप् च्यानी थोबे ॱवङ् बेत्। 28 ॱनी हुल हरुङ्द थोरङ् कच्च्येन् च्यीक् टो़क्केन्। 29 ॱसुल आम्ज्योक् यो़प्प हुगी हीगो नेन्ज्यीत्, धम्बे थुगी छ्यो़ छो घयेत्ल घन्ड सीगुक्क। |
© 1995 Wycliffe Bible Translators, Inc. and Nepal Bible Society
Wycliffe Bible Translators, Inc.