ॱसाल्केत् 19 - ल्होमीलुक्टुक्की भालील्ल लीम्बे ॱलु १-१० 1 हीगी तीङ्ल तेङ् यी़न मी छेत्मीक्की केत् छ्यीम्मु डस्सी च्यीक्ल हीन्दुक् सीर ॱह घोज्युङ्। हल्लेलुया। छी थर्व ॱनङ्गेन् दी हज्यरङ्गी को़न्ज्योक् बेत्। खोङ्ल तो़त्वङ् धङ् ॱस्यीक् छ्यीम्मु यो़क्केन् बेत्। 2 खोङ्गी ठीम् च्येत्न छ्येप्प केब घयेत् ओ़ब दीम्ब युङ्गेन् बेत्। घन्ड हीन् सीन्न हुगी छ्येमु छ्यीम्मु हुगी छ्ये ज्युबे लेगी जम्लीङ् की़न् दीरङ् हुगी लेमु डस्सील सो़न मीत्तल तङ बेत्। हुगो झ्यीनी हुल ओ़बे छ्येप्प केन खोङ् रोरङ्गी ॱयोक्पु घयेक्की ठक्की ङेल्लेन् दी हुल च्येसोङ् सीन्न सीस्सोङ्। 3 हुनी यङ् हुगी केत् दीगी हल्लेलुया। हुगो छीक्न थो़म्बे धुवक् हुगो धी़ नम ज्यी़न्दु थो़न् थो़म्ब युङ्गेन् बेत् सीस्सोङ्। 4 हीनी यङ् गोयो़प्प ङीस्स्यु चप्स्यीबु दी धङ् उज्येन् स्यीबु दीबे ॱवङ् च्येम्मे स्युडील स्युगेन् को़न्ज्योक्ल छ्यक् छेन आमेन्। हल्लेलुया सीन्न सीस्सोङ्। 5 हुनी यङ् स्युडी ढुङ् दीनी केत् च्यीक् थो़न्सोङ्। हुगी केत् दील हज्यरङ्गी को़न्ज्योक्ल ज्यीब खुर्न दो़क्केन्, खोङ्गी ॱयोक्पु छ्यीया च्युङा घयेस्सो को़न्ज्योक्ल यस्सो पु सीस्सोङ्। 6 हुनी ङे ॱह घोवल मी छेत्मीक्की केत् छ्यीम्मु उक् डस्सी, छ्युरोक् छ्यीम्मी़ हुट्ट अक् डस्सी, डुक्केत् छ्यीम्मी़ हुट्ट अक् डस्सी च्यीक्ल हीन्दुक् सीस्सोङ्। हल्लेलुया। हज्यरङ्गी ॱवङ् की़न् च्येम्मे चोव ज्यीन्दक् को़न्ज्योक्की जम्लीङ् की़ल्ल ॱवङ् च्यङ्सोङ्। 7 हज्यरङ् गेस धङ् गव झ्यीन को़न्ज्योक्ल तो़प्प पुदोङ्। घन्ड हीन् सीन्न लुक्टुक्की भालीन् झ्यीप्पे धी़ दी ह ॱलीस्सोङ्। खोङ्गी ॱनम ह भाज्ये ठोक्क ज्यप्न दुक्। 8 हुगी घो़ दील रे सङ्डुक् च्यत् थीङीय कप्पु को़न्न दुक् सीन्न सीगुक्। हुगी घो़ हुगो को़न्ज्योक्की मी चङ्म घयेक्की झ्यीबे ले ढङ्बु घयेत्ल डोगेन् बेत्। 9 हुनी भङ्ज्येम्ब च्यीक्की ङल रङ्गी हीगो यीगील ढील स्योक्। लुक्टुक्की भालीङ्गी स्यालक्ल ॱसु ॱसु भो़ यो़दङ् हुगो ॱसोदी च्येम्म बेत् सीच्च्युङ्। हुनी हुगी यङ् हीगी केच्च्य हीगो को़न्ज्योक्की ॱसुङे केच्च्य ॱङो़सल् बेगो सीच्च्युङ्। 10 हुनी ङे भङ्ज्येम्ब दील छ्यक् छेबेन्। ॱनी हुगी ङल छ्यक् ॱमत् छो़लेत्। ङ को़न्ज्योक्की ॱयोक्पु, रङ् धङ् रङ्गी पी़न्ज्या डस्सी, येशुगी ढीक्ल दीम्बे केच्च्य ॱस्यो़क्केन् घयेत् डस्सीरङ् हीन्। को़न्ज्योक्लरङ् क छ्यक् छो़। येशुगी ढीक्ल दीम्बे केच्च्य ॱस्यो़क्केन् घयेत्ल कलुङ् ॱस्यो़त् छुबल धम्बे थु यो़क्केन् बेत् सीच्च्युङ्। त कप्पुल स्यो़म्बे तबा ११-२१ 11 हीनी तेङ् यी़ म दीरङ् घुङ् स्याल भीन, हुनी त कप्पुल स्यो़म्बे तबा च्यीक् थो़म्ब ङे थोङ्ज्युङ्। हुगी तबा दील ज्युरुव मीप्प धङ् दीम्ब सीन्न सीगुक्। ॱनी खोङ्गी ॱमक् थुक्केङ्गी ले हुगो धङ् ठीम् च्यो़प्पे ले हुगो ढङ्बु युङ्गेन् बेत्। 12 ॱनी खोङ्गी ॱमीक् दी मी बर डस्सी बर्कुक्। ॱनी खोङ्गी गो दील थोप् छ्यीम्मी़ ज्याबी़ स्यमुङ् गज्येन् घो़न्दुक्। ॱनी खोङ्गी छेन् च्यीक् यीगील ढीदुक्। हुगी छेन् दी खोङ् रोरङ्ल मेन्द, ॱयोङ् ॱसुल आक् ॱस्यो़च्च्ये मीन्दुक्। 13 ॱनी खोङ्गी ली़ज्ये छ्यी घो़ दील ठक्ल ॱहोबे घो़ च्यीक् घो़न्दुक्। ॱनी खोङ्ल को़न्ज्योक्की ॱसुङ्रप् सीगुक्। 14 ॱनी खोङ्गी तीङ्ल तेङ् यी़गी ॱमक्मी छेत्मीत् त कप्पुल छ्यीप् स्यो़न्न डोगुक्। हुबे घो़ दील रे सङ्डुक् कप्पु चङ्सी घो़न्दुक्। 15 ॱनी खोङ्गी ख दीनी ज्यी़त् कुरीक्ल बेन्ज्येम ढी पदङ् ॱनोन्दीम थो़ङ्गुक्। ॱनी खोङ्गी च्यागी तोक्लङ्गी ॱवङ् च्योङ्गुक्। ॱनी गोङ्गोङ् चीर्सल चीर डस्सी ॱवङ् की़न् च्येम्मे को़न्ज्योक् खोङ्डोक्की मी बर्न ङेल्लेन् च्यो़ज्येम दी खोङ्गी च्यो़गेन् बेत्। 16 ॱनी खोङ्गी छेन् दी खोङ् रोरङ्गी ॱलेस्स्य दी धङ् ली़ज्ये छ्यी घो़ दील ज्याबु घयेक्की ज्याबु धङ् चो छ्यीया घयेक्की चोव ज्यीन्दक् सीन्न ढीन दुक्। 17 हीनी यङ् ङे तेङ् यी़गी भङ्ज्येम्ब च्यीक् ङीमे थेक्कङ्ल दो़प्प थोङ्ज्युङ्। हुगी केत् छ्यीम्मु तो़न्न ॱनम्ल फीर्केङ्गी झ्य घयेत्ल को़न्ज्योक्की स्यालक् छ्यीम्मुल ॱस्य सदु जोम्लेत्। 18 ज्याबु घयेक्की ॱस्य, ॱमक्पो़न् छ्यीम्मु घयेक्की ॱस्य, मी ज्यीक्पा घयेक्की ॱस्य, त घयेक्की ॱस्य, तबा घयेक्की ॱस्य, रङ्वङ् च्येम्मे मी घयेक्की ॱस्य, रङ्मो़ मीप्पे ॱयोक्पु घयेक्की ॱस्य धङ् मी छ्यीया च्युङा कुरीक्की ॱस्य सदु ॱस्योक् सीस्सोङ्। 19 हीनी हुगी तबा दी धङ् हुगी ॱमक्मी घयेत् दीबल हुगी ॱसीम्ज्येन् दी, जम्बुलीङ्गी ज्याबु घयेत् धङ् हुबे ॱमक्मी घयेत् ॱमक् थुक्तु जोम्न युङ ङे थोङ्ज्युङ्। 20 हुनी तबा दी ज्यला थो़न्न हुगी ॱसीम्ज्येन् दी धङ् हुगी दल यो़प्पे कलुङ् जी़म ॱस्यो़क्केन् दी सुङ् तङ्सोङ्। हुगी ॱसीम्ज्येङ्गी को़बे कलुङ् जी़म ॱस्यो़क्केन् दीगी यीक् छ्यीम्मी़ लेगी ता गज्येन् झ्यीन तो़न्नी, हुगी ॱसीम्ज्येङ्गी दक् लीङ्गेन्, हुगी डवुल छ्यक् छो़गेन् घयेत् दी हुगी ॱयोङ्गोर्ल छ्यी़नर हीङ्गो़प्प बेत्। हुनी ॱसीम्ज्येन् दी धङ् कलुङ् जी़म ॱस्यो़क्केन् दी ॱङीक्कर् ॱसोम्बु मुसी धङ् मी बर्से छोल पुर् तङ्सोङ्। 21 ॱनी हुब ॱङीबी़ छ्यल यो़प्प घयेत् दी हुगी तबा दीगी खनी थो़म्बे ढी पदङ् दीगी बेन्न कुरीक् ॱसेत् तङ्सोङ्। ॱनी हुब घयेक्की ॱस्य दी ॱनम्गी झ्य घयेक्की डङ् डङ् सेसोङ्। |
© 1995 Wycliffe Bible Translators, Inc. and Nepal Bible Society
Wycliffe Bible Translators, Inc.