ॱसाल्केत् 18 - ल्होमीबेबीलोन् सार्ल छ्येप्प केबे तम् १-२४ 1 हीनी तीङ्ला ॱवङ् छ्यीम्मु च्येम्मे भङ्ज्येम्ब ॱयोङ्म च्यीक् तेङ् यी़नी मल्ल भप्न युङ ङे थोङ्ज्युङ्। हुगी ओ़क्की ॱस जम्बुलीङ् दीरङ् च्यवली झ्युङ्सोङ्। 2 ॱनी हुगी केत् छ्यीम्मुल बेबीलोन् छ्यीम्मु ह रम् डोगेन् बेत्। रम् डोगेन् बेत्। हुगो ॱनो़प्प अयेक्प घयेक्की दो़स्स धङ् ॱनो़प्प स्यीलोक्पोक्म घयेक्की छङ् धङ् झ्यज्युङ्म ढीप्लङ् च्येम्म स्यीलोक्सी घयेक्की दो़स्सल युङ्गेन् बेत्। 3 घन्ड हीन् सीन्न छ्येमु बेबीलोन् हुगी छ्ये ज्युबे गोङ्ज्यङ् घर्पोक्म जम्बुलीङ्गी ज्यागक् कुरीक्ल थुङ्दु ची़त्तुक्। ॱनी जम्बुलीङ्गी ज्याबु घयेत् धङ् हुगो छ्ये गज्येन् ज्युदुक्। हुगो नोर्की भङ्जेत् च्येम्म झ्यीनी, हुगोदङ् छोङ् ज्यक्केन् जम्बुलीङ्गी छोङ्बा घयेत् एत् छ्युक्पुल बर्नत्तुक् सीस्सोङ्। 4 हीनी यङ् तेङ् यी़नी मल्ल हीन्दुक् सीरे केत् ॱयोङ्म च्यीक् ॱह घोज्युङ्। ङे मीस्सीर् घयेत् बेबीलोन् हुगी दीक्पदङ् छ्य मत् झ्यीप्प, हुनी भीन थो़न्। स्येन् हुल तोङ्गेङ्गी च्यो़न् छ्यीम्मु खीत्रङ्ल आक् फोक्केन् बेत्। 5 हुगी झ्यीबे दीक्पे भङ्जेत् घयेत् दी तेङ् यी़ल ते घेङ्न युङ बेत्। ॱनी हुगी ङीबे ले घयेत् दील को़न्ज्योक्की अल्लेत् ॱमीत् तोङ्गेन् बेत्। 6 हुल हुगी घङ् झ्यीबे ङेल्लेन् च्यो़ज्यीत्। हुगी झ्यीबे लेगी लेन् दील ङीबक् टो़च्च्यीत्। हुगी फोप्प घङ्ल हुल फोप्प धो टो़च्च्यीत्। 7 हुगी रोरङ्ल घजो़त् च्यीक् तो़प्प धङ् नोर्की भङ्जेत् ॱसादुक्क उजो़त् च्यीक्की चीरङ् हुल दुक्प अयेक्प धङ् ॱसीम्दुक् तोङ्ज्यीत्। हुगी रोरङ्गी रोरङ्ल ङ मोरेङ्मु मेन्। ज्यामु हीन्। ङ नम्ल अक् नङेन् गुर् मीत् गो़ब यो़त् ॱनो़बे पेगेत् ॱस्यो़क्कुक्। 8 हुगो झ्यीनी हुल थोप्तक् मीत्ल च्यो़न् छ्यीम्मु घयेत् ङीन् च्यीक्ल कुरीक् फोक्केन् बेत्। ॱस्यीव, नङेन् धङ् तोरी तङ्न मील च्योप् ॱहे तोङ्गेन् बेत्। घन्ड हीन् सीन्न हुगोल ठीम् च्येत्न छ्येप्प को़गेन्, चोव ज्यीन्दक् को़न्ज्योक् ज्यीक्सी यो़क्केन् बेत्। 9 ॱनी हुगोदङ् छ्ये ज्युक्केन्, नोर्की भङ्जेत् ॱसक्केन् हुगी छ्यीट्टो जम्बुलीङ्गी ज्याबु घयेक्की हुगो मील छीक्न धुवक् थो़म्ब दी थोङ्नी, हुब घयेत् ङुच्च्यङ् ॱस्योर्न ङुगेन् बेत्। 10 हुल हुन्दुक्मे दुक्प छ्यीय नोङ थोङ्नी, हुब ज्यीक्टक्की थक्रीङ्मुदु देत्न हुबे हुगी सार् दील ॱवे सार् छ्यीम्मु, बेबीलोन् सार् ज्यीक्सी, खो़त् घन्डे दुक्प, घन्डे दुक्प। हुन्दो ॱरीप् घङ्ल छ्येप्प फोक्सोङ् न व सीक्केन् बेत्। 11 हुनी जम्बुलीङ्गी छोङ्बा घयेत् हुगोदङ् छोङ् ज्यक्च्ये मीप्पल ङुच्च्यङ् तङ्न ॱसीम्दुक् झ्यीक्केन् बेत्। 12 हुबे छोङ्गी यप्च्य दी ॱसीर्, ॱङु, रीम्बुर् छ्यीये दो, मुदीक्, रे सङ्डुक्, घुलक् ॱमुक्लोक्प, धस्सक्की घो़, घुलक् ॱमप्पु, ॱस्यीङ् ढीम स्यीम्बोक्म ॱहीक्केन्, ॱलङ्बी़ छ्यीय, ॱस्यीङ् सङ्डुक्ल सो़बे यप्च्य, च्युक्मल सो़बे यप्च्य, च्याल सो़बे यप्च्य, दो कमरुल सो़बे यप्च्य, 13 जम ॱस्यीङ्ज, ॱमेन्न, पो़, सी़ल ॱही़न्ज्येम ढीम स्यीम्बोक्म ॱहीक्केन्, पो़गर्, गोङ्ज्यङ्, ॱनुम्, ढ, ढे चम्ब गङ्ज्येन्, धी़न्डो, लुक्, त, ते गरीमन् धङ् रीन्ज्येन् मी थम्ज्येत् चोङ्गो़प्प बेत्। 14 हुनी हुबे हुगी सार् दील रङ् ॱसीम्ब ॱस्योरे यप्च्य घयेत् दी रङ्ल ॱमत् ॱनोङ्सोङ्। ह रङ्ल नम्ल अक् नोर् धङ् थोङ् छ्यीम्मी़ यप्च्य घयेत् ज्योर्सन मीप्प येसोङ् सीक्केन् बेत्। 15 ॱनी हुगी सार् हुगोदङ् छोङ् ज्यप्न छ्युक्पुल बर्नरे छोङ्बा घयेत् दी हुगी सार् हुल हुन्दुक्मे दुक्प छ्यीय नोङ थोङ्नी ज्यीक्टक्की थक्रीङ्मुदु देत्न ङुच्च्यङ् तङ्न ॱसीम्दुक्की हीन्दुक् सीक्केन् बेत्। 16 ॱवे सार् छ्यीम्मु घन्डे दुक्प, घन्डे दुक्प। घो़ सङ्डुक्, घो़ ॱमुक्लोक्प, घो़ ॱमप्पु, ॱसीर्, रीम्बुर् छ्यीये दो घयेत् धङ् मुदीक्की ज्येन्ज्य ज्येङ्गेन् 17-18 नुक्मे नोर्की ज्यीक्प ॱरीप् घङ्ल येसोङ् न व सीक्केन् बेत्। ॱनी हुगी सार् छीक्न थो़म्बे धुवक् दी थोङ्नी छ्यु ज्यम्जो छ्यीम्मुल ढुल स्युन डोगेन्, ढुबा घयेक्की चोबो़न्, ढुबा घयेत् धङ् छ्यु ज्यम्जो छ्यीम्मुल ले झ्यीन मीजी पीक्केन् घयेत् थम्ज्येत् हुब कुरीक् थक्रीङ्मुदु देत्न हुगो डस्सीगी सार्की ज्यीक्प ह ॱयोङ् घन दी यो़प्प? सीन्न केत् ज्यक्केन् बेत्। 19 हुनी हुब अक् ङुच्च्यङ् तङ्न रोरङ्सो़ गोल थल कप्न नङेन् झ्यीन सार् छ्यीम्मु हुगो घन्डे दुक्प, घन्डे दुक्प। छ्यु ज्यम्जो छ्यीम्मुल डोगेङ्गी ढु घयेक्की दक्पु घयेत् छ्युक्पुल बर्च्ये दी हुगो च्यानी झ्युङ बेत्। ह हुगो हुन्दो ॱरीप् घङ्ल येसोङ् न व सीन्न केत् ज्यक्केन् बेत्। 20 ॱवे तेङ् यी़ धङ् को़न्ज्योक्की मी चङ्म घयेत्, ठीक्नल घयेत् धङ् कलुङ् ॱस्यो़क्केन् घयेत् गेस झ्यीज्यीत्। घन्ड हीन् सीन्न खीत्रङ्ल अयेक्प झ्यीब घयेक्की ङेल्लेन् दी को़न्ज्योक्की हुगी सार् हुल च्येसोङ्। 21 हीनी तेङ् यी़गी भङ्ज्येम्ब ज्यीक्पोक्म च्यीक्की लागोर् गर्चम डस्सी दो च्यीक् डुन ज्यम्जो छ्यीम्मुल पुर्न हीन्दुक् सीस्सोङ्। हीगो पुर डस्सी बेबीलोन् सार् छ्यीम्मु हुगो ह मीप्पल येनर बेत्। 22 ह हीनी झ्यीब दी ॱवे सार् ह रङ्गी नङ्दु डम्लेङ् ज्युर्केन्, ॱलु लीङ्गेन्, ॱलीमु ज्युर्केन् धङ् कङ्लीङ् भी़क्केन् नम्ल अक् ॱमीत् थो़ङ्गेन् बेत्। ॱनी रीक्पे ले ॱनजो झ्यीक्केन् च्यीक्तङ् मीत् युङ्गेन् बेत्। लक्त ज्यक्पे केत् ॱएत् नम्ल अक् ॱह मीत् घोगेन् बेत्। 23 ॱनी छेङ्गी धी़ल बत्ती बर्केन् च्यीक्तङ् मीत् युङ्गेन् बेत्। नम्ल अक् ॱनम मक्पे भालीङ्गी हुट्ट ॱह मीत् घोगेन् बेत्। स्येन् रङ्गी छोङ्बा घयेत् जम्बुलीङ्दु ज्यीक्स्योल थो़न्न युङ बेत्। रङ्गी ॱयोङ्गोर् ज्यप्न जम्बुलीङ्गी ज्यागक् घयेत् कुरीक् रङ् ङो़ल छ्यी़दु ची़प्प बेत्। 24 कलुङ् ॱस्यो़क्केन् घयेत्, को़न्ज्योक्की मी चङ्म घयेत् धङ् जम्बुलीङ्दु मी ॱसेत् तङ घयेक्की ठक्की लेन् दी रङ्ल फोक्केन् हुगो बेत् सीस्सोङ्। |
© 1995 Wycliffe Bible Translators, Inc. and Nepal Bible Society
Wycliffe Bible Translators, Inc.