ॱसाल्केत् 17 - ल्होमीछ्येमु च्यीक् धङ् ॱसीम्ज्येन् च्यीक्की धो़न् १-१८ 1 हीनी फोप्प दी़न् खुरे भङ्ज्येम्ब दी़म्बु दीगी छीक्नी च्यीक्की ङल ॱस्योक् सीन्न हीन्दुक् सीच्च्युङ्। छ्यु गज्येन् यो़स्सल दो़क्केन् हुगी छ्येमु छ्यीम्मु हुगोल घन्दुक् झ्यीबे छ्येप्प फोक्केन् बेक्क हुगो रङ्ल ङे तो़न् योङ्। 2 हुगी जम्बुलीङ्गी ज्याबु घयेत् धङ् छ्ये ज्युन जम्लीङ् की़न् दीरङ् हुगी छ्ये ज्युबे गोङ्ज्यङ्गी सीदु ची़स्सोङ् सीच्च्युङ्। 3 हीनी यङ् ङ धम्बे थुगी ॱवङ्ल फीन्ज्युङ्। ॱनी हुगी भङ्ज्येम्ब दीगी पक्क झ्यङ्दङ्ल ठीक्च्युङ्। ॱनी हुगी भुमु छ्येमु दी उन ॱसीम्ज्येन् ॱमप्पु च्यीक्ल स्यो़न्न दो़क्कुक्। ॱनी हुगी ॱसीम्ज्येन् दील को़न्ज्योक्ल ॱमो़म्बी़त् तोङ्गेङ्गी मीङ् छेत्मीत् ढीन दुक्। हुल गो दी़न् धङ् रच्च्योक् च्यु दुक्। 4 हुगी भुमु दीगी घो़ सङ्डुक् ॱमुक्लोक्प धङ् ॱमप्पु घो़न्न ॱसीर् धङ् रीम्बुर् छ्यीये दो घयेत् धङ् मुदीक्की ज्येन्ज्य घयेत् तान दुक्। हुगी लक् दील ॱसीर्की फोप्प च्यीक् खुर्तुक्। फोप्प दीगी नङ् दीन स्यीलोक्सी, हुगी छ्ये ज्युन चङ्ज्ये मीप्पे ले घयेक्की घेङ्न दुक्। 5 हुगी थोक्कोक् दील तीङ् सप्पोक्मे मीङ् हीन्दुक् झ्यीब च्यीक् दुक्। बेबीलोन् छ्यीम्मु हुगो छ्येमु घयेत् धङ् जम्बुलीङ्गी स्यीलोक्सीगी ढङ् घयेक्की आम बेत् सीन्न ढीन दुक्। 6 ॱनी हुगी भुमु दी को़न्ज्योक्की मी चङ्म घयेत् धङ् येशुगी ढीक्ल दीम्बे केच्च्य ॱस्यो़क्केङ्गी मी घयेत् ॱसेत् तङे ठक्की सीन खुर्तुक्। हुन्दुक् झ्यीबे भुमु थोङ्नी ङ ॱह पट्टक् लेज्युङ्। 7 हुनी भङ्ज्येम्ब दीगी ङल खो़त् घन्डे धो़ल्ल ॱह लेगुक्क? रङ्ल ङे भुमु हुगो धङ् हुगो खुर्केन् गो दी़न् धङ् रच्च्योक् च्यु च्येम्मे ॱसीम्ज्येन् हुगी धो़न् तीङ् सप्पोक्म दी हुन्दो ङे तो़न् योङ्। 8 रङ्गी थोङे ॱसीम्ज्येन् हुगो एल्ला झ्युङ बेत्। ॱनी हुन्दो मीप्प बेत्। ॱनी हुगो यङ् खीस मीप्पे ॱसेङ्दोङ दीगी नङ्नी थो़ङ्गेन् बेत्। थो़न्नी, यङ् हुगो खरप्ल टप् डोगेन् बेत्। ॱस धङ् ॱनम् छ्यादु ची़प्पनी झ्यीनी छीये थोल मीङ् मत् ढीबे मी घयेत् दी हुगी ॱसीम्ज्येन् हुगो थो़म्ब थोङ्नी, ॱह लेगेन् बेत्। घन्ड हीन् सीन्न एल्ला हुगो झ्युङ बेत्। हुनी यङ् मीप्प बेत्। ॱनी यङ् तीङ्ला थो़ङ्गेन् बेत्। 9 हीगो ॱह घोवल धो़र्रीक् च्येम्म गो़गेन् बेत्। गो दी़ङ्गी धो़न् दी लदोक् दी़ल्ल डोगेन् बेत्। ॱनी हुगी भुमु हुगो लदोक् दी़म्बु हुल दो़क्केन् बेत्। गो दी़ङ्गी धो़न् च्यीक् यङ् ज्याबु दी़ल्ल डोगेन् बेत्। 10 ॱनी ज्याबु ॱङ ङो यो़नर बेत्। च्यीक् हुन्दो यो़क्केन् बेत्। च्यीक् यङ् हुन्दो थुक्ल ॱमत् थो़म्ब बेत्। हुगो थो़न्न युङ्नी गक् मीत् दो़क्केन् बेत्। 11 हुनी यङ् हुगी ॱसीम्ज्येन् दी थो़ङ्गेन् बेत्। हुगो एल्ला झ्युङ बेत्। हुनी यङ् मीप्प बेत्। हुगो ज्याबु ज्येप्पल ॱनेगेन् बेत्। हुगो ॱएम्मागी ज्याबु दी़म्बु दीबे छीक्नी च्यीक् बेत्। हीगो तीङ्ला यङ् खरप्ल टप् डोगेन् बेत्। 12 हीनी यङ् रङ्गी थोङे रच्च्योक् च्युबु दीगी धो़न् दी ज्याबु च्युल डोगेन् बेत्। हुब हजो़त् थुक्ल ठील मत् जेब बेत्। ॱनी हुगी ॱसीम्ज्येन् दी थो़न्नी, हुगोदङ् छ्य झ्यीन धोबा च्यीक् थुक् हुब कुरीक् ॱसोस्सोरङ्गी ठील जेन दो़क्केन् बेत्। 13 हुबे ॱसीम् दी च्यीक् झ्यीनी हुबे रोरङ्सो़ ॱस्यीक् धङ् ॱवङ् दी कुरीक् हुगी ॱसीम्ज्येन् दील टो़क्केन् बेत्। 14 हुनी हुब कुरीक् छ्य झ्यीन लुक्टुक्की डल लोङ्न ॱमक् थुक्तु डोगेन् बेत्। ॱनी ॱमक् दील लुक्टुक् ज्यला थो़न् डोगेन् बेत्। घन्ड हीन् सीन्न खोङ् चो छ्यीया घयेक्की इक् चोव ज्यीन्दक् धङ् ज्याबु घयेक्की इक् ज्याबु बेत्। ॱनी खोङ्गी दम्न भो़ब तेम्बोक्म दो़क्केन् घयेत् हुगी यङ्ल खोङ्दङ् दल ज्यला थो़न्न युङ्गेन् बेत् सीच्च्युङ्। 15 हीनी यङ् हुगी भङ्ज्येम्ब दीगी ङल रङ्गी थोङे छ्येमु हुगो छ्यु गज्येन् यो़स्सल दो़क्केन् हुगी छ्यु गज्येङ्गी धो़न् दी ज्यागक् कुरीक्, ज्यी़त् कुरीक्, केच्च्योक् कुरीक् धङ् मी छेत्मीत् ढङ्मीत् यो़स्सल डोगेन् बेत्। 16 ॱनी यङ् रङ्गी थोङे रच्च्योक् च्युबु दी धङ् ॱसीम्ज्येन् दी हुगी छ्येमु दीगी डल लोङ्न, हुगो च्यरोक् कोरोक् तङ्न च्यरेङी सो़ तोङ्गेन् बेत्। हुनी हुगी ॱस्य दीरङ् सेन हुनी हुगो मील ॱहे तोङ्गेन् बेत्। 17 को़न्ज्योक्की ॱसुङ्रप्ल यो़प्पे ढो़ दी नम् डुप् डुप् थुक्ल ज्याबु च्युबु दी च्यीक्ल थी़न्न रोरङ्सो़ ॱवङ् घयेत् दी हुगी ॱसीम्ज्येन् दील टो़च्च्ये ॱनो़बे ॱसीम् हुबल को़न्ज्योक्की ॱनङ्गेन् बेत्। 18 रङ्गी थोङे भुमु छ्येमु हुगी धो़न् दी जम्बुलीङ्गी ज्याबु घयेत्ल ॱवङ् च्योङ्से सार् छ्यीम्मु दील डोगेन् बेत् सीच्च्युङ्। |
© 1995 Wycliffe Bible Translators, Inc. and Nepal Bible Society
Wycliffe Bible Translators, Inc.