ॱसाल्केत् 16 - ल्होमीको़न्ज्योक्की ङेल्लेन् च्यो़ज्येमे फोप्प दी़न् १-२१ 1 हीनी ङे घोवल को़न्ज्योक् स्युसे छ्यो़गङ्गी नङ् दीनी केत् छ्यीम्मु च्यीक्की हुगी भङ्ज्येम्ब दी़म्बु दील हीन्दुक् सीस्सोङ्। ह ज्युक्ल को़न्ज्योक्की खोङ्डोक्की घेङ्न यो़प्पे फोप्प दी़म्बु दी जम्बुलीङ्ल घबुक् ज्योप् सीस्सोङ्। 2 हुनी भङ्ज्येम्ब धङ्बु दीगी पालोल रोरङ्गी लक्ल यो़प्पे फोप्प दी जम्बुलीङ्ल घबुक् ज्यप्सोङ्। हुनी हुगी ॱसीम्ज्येङ्गी दक् लीङ्गेन्, हुगी डवुल छ्यक् छो़गेन् घयेत्ल ॱम नस्सी थो़न्सोङ्। 3 हीनी यङ् भङ्ज्येम्ब ॱङीब दीगी पालोल रोरङ्गी लक्ल यो़प्पे फोप्प दी छ्यु ज्यम्जो छ्यीम्मुल घबुक् ज्यप्सोङ्। हुनी छ्यु ज्यम्जो छ्यीम्मु म दीरङ् मी ॱस्यीनरे ठक् डस्सील ॱसोङ्न, हुगी नङ्ल यो़प्पे उज्येन् घयेत् दी जेङ् ॱस्यीसोङ्। 4 हीनी यङ् भङ्ज्येम्ब ॱसुम्ब दीगी पालोल रोरङ्गी लक्ल यो़प्पे फोप्प दी चङ्बु धङ् छ्यु थो़न्स घयेत्ल घबुक् ज्यप्सोङ्। हुनी हुगी छ्यु घयेत् दी ठक् डस्सील झ्युङ्सोङ्। 5 ॱनी छ्यु घयेत्ल तगेङ्गी तेङ् यी़गी भङ्ज्येम्ब दीगी को़न्ज्योक्ल नीज्यरङ् धक्पर् च्येम्म नीज्यरङ् ॱङो़न्दु उक् यो़क्केन्, हुन्दो ओक् यो़क्केन् नीज्यरङ्गी ठीम् ढङ्बु च्येत्न हुन्दुक् झ्यीन छ्येप्प केसोङ्। 6 छ्येप्प फोक्नरे मी घयेत् हुबे नीज्यरङ्गी मी चङ्म घयेत् धङ् नीज्यरङ्गी कलुङ् ॱस्यो़क्केन् घयेत् ॱसेत्न ठक्तो़न् ॱमदो़न् झ्यीनी, हुबल ओ़ब हुन्दुक् झ्यीबे ठक् थुङ्दु ची़स्सोङ् सीस्सोङ्। 7 हुनी यङ् छ्यो़प्प पुस दीनी केत् च्यीक्ल हीन्दुक् सीर ॱह घोज्युङ्। ॱवङ् की़न् च्येम्मे चोव ज्यीन्दक् को़न्ज्योक् नीज्यरङ्गी ठीम् ढङ्बु च्येत्न छ्येप्प केब घयेत् हुगो ओ़ब दीम्ब यो़क्केन् बेत् सीस्सोङ्। 8 हुनी भङ्ज्येम्ब स्यीब दीगी पालोल रोरङ्गी लक्ल यो़प्पे फोप्प दी ङीमल घबुक् ज्यप्सोङ्। हुनी मी घयेत् गन्दीक्म ङीमे छीक्सोङ्। 9 ॱनी ङीमे गन्दीक्म छीक्न आक्, मी घयेक्की ॱसीम् दी ॱएङ्गी लम्नी इक् मत् ज्युर्सोङ्। ॱनी को़न्ज्योक्ल तो़प्प आक् ॱमत् पुसोङ्। हरुङ् हुबे च्यो़न् तोङ्दु ची़क्केङ्गी ॱवङ् यो़प्प च्येम्मे को़न्ज्योक्ल ॱमो़म्बी़त् तङ्सोङ्। 10 हुनी भङ्ज्येम्ब ॱङब दीगी पालोल रोरङ्गी लक्ल यो़प्पे फोप्प दी हुगी ॱसीम्ज्येङ्गी ॱवङ् च्येम्मे स्युडी दील घबुक् ज्यप्सोङ्। हुनी हुगी ज्यागक् दील मेन्नक् ॱनक् थीङीय झ्युङ्न, हुगी मी घयेत् दी म दीरङ् सुक्सीक्की ॱनर्मी नोङ्न, ॱसोस्सोरङ्गी च्यीला ॱलेस्सोङ्। 11 हुनी इक् हुबे रोरङ्सो़ ले अयेक्प घयेत् दी ॱलो़ ॱमत् तङ, सुक्सीक्की ॱनर्मी धङ् ॱम थो़न्दु ची़प्पे ढीक्ल तेङ् यी़गी को़न्ज्योक्ल ॱमो़म्बी़त् तङ्सोङ्। 12 हुनी भङ्ज्येम्ब ढुक्प दीगी पालोल रोरङ्गी लक्ल यो़प्पे फोप्प दी चङ्बु छ्यीम्मु युफ्रेटीस्ल घबुक् ज्यप्सोङ्। ॱनी हुगी चङ्बु दी कम्न, ॱस्यर् ङो़नी छुल्ल ज्याबु घयेत् युङ् छुज्ये यो़प्पल लम् थो़स्सोङ्। 13 हीनी हुगी डुक् दीगी खनी, ॱसीम्ज्येन् दीगी खनी धङ् हुगी कलुङ् जी़म ॱस्यो़क्केन् दीगी खनी ओरोक् डस्सी ॱनो़प्प स्यीलोक्सी ॱसुम् थो़न्न डोव थोङ्ज्युङ्। 14 हुगी ॱनो़प्प अयेक्प ॱसुम्बु हुगी यीक् छ्यीम्मी़ लेगी ता गज्येन् तो़न्न ॱयो कोर्न, जम्लीङ् की़ङ्गी ज्याबु घयेत् ॱमक् थुक्च्येल ॱयोप्कुक्। हीगो ॱवङ् की़न् च्येम्मे को़न्ज्योक्की स्यक्पे ङीन् छ्यीम्मी़ यङ्ल डुप्केन् बेत्। 15 येशुगी हीन्दुक् ॱसुङ्गेन् बेत्। तेदे ङ थोप्तक् मीत्ल की़न्ज्येन् युङ डस्सी युङ्गेन्। ॱनी ॱसी़ रोरङ्गी घो़ दक्पु झ्यीन च्यङ्जो़त् झ्यीन दो़क्को़दङ् हुगो ॱसोदी च्येम्म युङ्गेन् बेत्। स्येन् हुगो च्यरेङीय थो़न्न मी घयेत्ल ङु छय युङ्गेन् बेत्। 16 हुगी ॱनो़प्प अयेक्प ॱसुम्बु दीगी ज्याबु घयेक्की ॱमक्मी घयेत् दी ॱयोप्से ॱसने दील हीब्रु केच्च्यल आर्मगेडोन् सीक्केन् बेत्। 17 हुनी भङ्ज्येम्ब दी़म्ब दीगी पालोल रोरङ्गी लक्ल यो़प्पे फोप्प दी ॱनम्ल घबुक् ज्यप्सोङ्। हुनी छ्यो़गङ्गी नङ्गी ॱवङ् च्येम्मे स्युडी दीनी केत् छ्यीम्मु च्यीक्ल ह स्युक् जोसोङ् सीर थो़न्सोङ्। 18 हुनी डुक्की च्यीला तो़न्न डुक्केक्की हुट्ट धङ् ॱसेर छ्यीम्मु ज्यप्सोङ्। नुक्मे ॱसेर ज्यीक्प धङ्बु गोम मी झ्युङनी झ्यीनी हजो़त् थुक्ल मत् ज्यब बेत्। 19 हुगी ॱसेर दीगी सार् छ्यीम्मु बेबीलोन् ॱरुम्न गो ॱसुम्ल तङ् तङ्सोङ्। ॱनी ज्यागक् घल अक् सार् गज्येन् रुम्सोङ्। ॱनी हुन्दुक् झ्यीन हुगी सार् छ्यीम्मु हुल अल्लेत् ॱमत् तङ, को़न्ज्योक्की खोङ्डोक्की मी बर्न घेङ्नरे फोप्प दीनी गोङ्ज्यङ् थुङ डस्सी थुङ्दु ची़स्सोङ्। 20 हुनी छ्यु ज्यम्जो छ्यीम्मी़ घुङ्गी ॱसने घयेत् धङ् ल घयेत् येसोङ्। 21 हीगी यङ्ल मी घयेत्ल ॱनम्नी मल्ल मो़न् री थेगेङ्गी ॱसीरा गर्चम ज्यप्सोङ्। ॱनी हुगी ॱसीरा दीगी च्यो़न् छ्यीम्मु तङ्नी, मी घयेक्की हुगी ढीक्ल को़न्ज्योक्ल ॱमो़म्बी़त् तङ्सोङ्। |
© 1995 Wycliffe Bible Translators, Inc. and Nepal Bible Society
Wycliffe Bible Translators, Inc.