ॱसाल्केत् 14 - ल्होमीगुल्लु ॱसम्ब लीन्न पुब १-५ 1 हीनी यङ् सीयोन्गी लदोक्न लुक्टुक् लोङ्न दो़प्प धङ् ॱनी खोङ्गी दल मी तोङ्डक् ज्यदङ् स्यीप्च्यु स्यप्स्यी यो़प्प ङे थोङ्ज्युङ्। ॱनी हुगी मी घयेत् दी कुरीक्की थोक्कोक्ल लुक्टुक्की छेन् धङ् खोङ्गी यप्की छेन् छ्यीप् ढीदुक्। 2 हुनी तेङ् यी़नी मल्ल हुट्ट छ्यीम्मु च्यीक् थो़म्ब ङे ॱह घोज्युङ्। हुगो छ्युरोक् छ्यीम्मी़ हुट्ट अक् डस्सी, डुक्केत् छ्यीम्मी़ केत् ॱएत् डस्सी, डम्लेङ् गज्येन् ज्युरे हुट्ट अक् डस्सी दुक्। 3 हुगी केत् दी हुगी मी घयेत् दीबे ॱलु ॱसम्ब च्यीक् लीन्न को़न्ज्योक्की स्युडी ढुङ् धङ् उज्येन् स्यीबु दी धङ् गोयो़प्प दीबे ढुङ्दु पुगुक्। ॱनी हुगी ॱलु हुगो ॱस जम्बुलीङ्नी ॱली़बे हुगी मी तोङ्डक् ज्यदङ् स्यीप्च्यु स्यप्स्यीबु दीबे मेन्द, ॱयोङ्मागी ॱलप्न आक्, हुगो लीन् ॱमीत् ॱस्यीबेत्। 4 हुब घयेत् ज्यीक्तेन् मत् झ्यीब, भुमुदङ् डीस मत् युङ चङ्म, लुक्टुक्की लम्ल तेम्बोक्म डोगेङ्गी मी घयेत् बेत्। ॱनी हुब को़न्ज्योक् धङ् लुक्टुक्ल फी़त्ल युङ्ज्येल मी घयेक्की छीक्नी दम्न ॱली़दुक्। 5 हुबे खल ॱएलमे ज्यी़त् घन्ड अक् मीप्प, नक्चक् ॱस्युली मीप्पे मी बेत्। भङ्ज्येम्ब ॱसुम् थो़न्न ॱस्येप्पे तम् ६-१२ 6 हीनी यङ् तेङ् यी़गी भङ्ज्येम्ब ॱयोङ्म च्यीक् ॱनम्ल ङे ॱसोरील फीर थोङ्ज्युङ्। हुगो ज्यी़त् कुरीक्, केच्च्योक् कुरीक्, ज्यागक् कुरीक्, जम्बुलीङ्गी मी कुरीक्ल फु तक्पे केच्च्य ॱनेम्बु ॱस्यो़त्तु तङ्दुक्। 7 ॱनी हुगी केत् छ्यीम्मु तो़न्न हीन्दुक् सीस्सोङ्। कोलीमी घयेत् को़न्ज्योक्ल ज्यीब झ्यीन खोङ्ल तो़प्प पु। घन्ड हीन् सीन्न ह को़न्ज्योक्की ठीम् च्यो़प्पे धी़ दी ॱलीस्सोङ्। तेङ् यी़, ॱस जम्बुलीङ्, छ्यु ज्यम्जो छ्यीम्मु धङ् छ्यु थो़न्स घयेत् जेङ् सोगेन् खोङ्ल छ्यक् छो़ज्यीत्। 8 हुनी यङ् तेङ् यी़गी भङ्ज्येम्ब ॱयोङ्म च्यीक्की हीन्दुक् सीस्सोङ्। बेबीलोन् सार् छ्यीम्मु ह रुम्सोङ्, रुम्सोङ्। हुगी जम्बुलीङ्गी ज्यागक् घयेत्ल रोरङ्गी गोङ्ज्यङ् घर्पोक्म बीन्न थुङ्दु ची़प्प डस्सी छ्ये ज्युक्तु ची़त्न यो़क्केन् बेत्। 9 हुनी यङ् भङ्ज्येम्ब ॱयोङ्म ॱसुम्ब च्यीक् थो़न्न हुगी केत् छ्यीम्मु तो़न्न हीन्दुक् सीस्सोङ्। ॱसीम्ज्येन् हुगोल धङ् हुगी डवुल छ्यक् छो़गेन्, हुगी दक् थोक्कोक्ल हीन्, लक्पल हीन्न अक्, लीङ्गेन् ॱसु यो़दङ् 10 हुगी को़न्ज्योक्की खोङ्डोक् पो़त्न युङ दी गोङ्ज्यङ् घर्पोक्म थुङ डस्सी थुङ् गो़ ॱस्यर्केन् बेत्। हुगो ङेल्लेन् च्यो़ज्येमे को़न्ज्योक्की छ्यो़स्स्याल ॱलुक्न दुक्। हुगी मी हुगोल तेङ् यी़गी भङ्ज्येम्ब चङ्म घयेत् धङ् लुक्टुक्की ढुङ्दु मी धङ् मुसी बरे नङ्ल ॱलुक्न दुक्स्यीगी ॱनर्मी नोङ्गेन् बेत्। 11 ॱनी हुगी ॱसने दीनी धी़ नम ज्यी़न्दु मी बरे धुवक् थो़न् थो़म्ब युङ्गेन् बेत्। हुगी ॱसीम्ज्येन् धङ् हुगी डवुल छ्यक् छो़गेन्, हुगी मीङ्गी दक् लीङ्गेन् घयेत्ल ङीन् छेन् मीप्प हुन्दुक् झ्यीबे ॱनर्मी नोङ्गेन् बेत् सीस्सोङ्। 12 हुगी धी़गी यङ्ल को़न्ज्योक्की क धङ् धम्ल चीगेन्, येशुल छ्य स्योक्केन्, खोङ्गी मी चङ्म घयेत्ल गुर् थेक्प गो़गेन् बेत्। 13 हीनी तेङ् यी़नी मल्ल केत् च्यीक्ल हीन्दुक् सीच्च्युङ्। हीगो रङ्गी यीगील ढी। चोव ज्यीन्दक्तङ् या मत् ढेब दो़क्केङ्गी मी हीनी झ्यीब दी ॱसु ॱस्यीन आक्, हुगो ॱसोदी च्येम्म युङ्गेन् बेत्। धम्बे थुगी हीगो दीम्बरङ् बेत् सीगुक्। हुब घयेत् रोरङ्सो़ मीजील कप्ले च्येत्न युङे दुक्स्यी घयेत्नी या ढेन युङ्न, हुनी कीप्पु युङ्गेन् बेत्। घन्ड हीन् सीन्न हुबे झ्यीबे ले घयेक्की ॱल दी इगीदु थोप्केन् बेत् सीच्च्युङ्। तो़न्दोक् दी़प्पे लेगी तम् १४-२० 14 हीनी ङे तेनी ॱमुब कप्पु च्यीक्की थोक्ल कोलीमीगी ॱरेबु डस्सी च्यीक् स्युन यो़प्प थोङ्ज्युङ्। ॱनी खोङ्गी गोल थोप् छ्यीम्मी़ ॱसीर्की स्यमुङ् च्यीक् घो़न्दुक्। लक् दील ॱसोक्ली ॱनोन्दीम च्यीक् खुर्न दुक्। 15 हीनी को़न्ज्योक् स्युसे छ्यो़गङ् दीनी तेङ् यी़गी भङ्ज्येम्ब ॱयोङ्म च्यीक् थो़न्सोङ्। हुगी ॱमुबे थोक्ल स्युगेन् दील केत् छ्यीम्मु तो़न्न हीन्दुक् सीस्सोङ्। जम्बुलीङ्ल ह तो़न्दोक् तोक् रेम्ब छो़ छर्तुक्। नीज्यरङ्गी ॱसोक्ली हुगो तङ्न तोक्तु ची़त् सीस्सोङ्। 16 हुनी ॱमुबे थोक्ल स्युगेन् दीगी रोरङ्गी ॱसोक्ली दी जम्बुलीङ्ल तो़न्दोक् तोक्तु ॱयुन तङ्सोङ्। हुनी तो़न्दोक् दी़सोङ्। 17 हीनी यङ् तेङ् यी़गी छ्यो़गङ् दीनी भङ्ज्येम्ब ॱयोङ्म च्यीक् थो़न्सोङ्। ॱनी हुगी लक्ल अक् ॱसोक्ली ॱनोन्दीम च्यीक् दुक्। 18 हीनी यङ् छ्यो़गङ्गी छ्यो़प्प पुसे लो दीनी भङ्ज्येम्ब ॱयोङ्म च्यीक् थो़न्सोङ्। मी ॱङक्च्येमे गेन् दी हुल दुक्। हुगी केत् छ्यीम्मु तो़न्न ॱसोक्ली ॱनोन्दीम खुर्केन् भङ्ज्येम्ब दील हीन्दुक् सीस्सोङ्। जम्बुलीङ्गी गोङ्गोङ्गी डलु ह छो़ छर्तुक्। डलु घुर्सी छ्याब घयेत् कोक्तु नीज्यरङ्गी ॱसोक्ली ॱनोन्दीम हुगो तोङ्रो झ्यी सीस्सोङ्। 19 हुनी हुगी भङ्ज्येम्ब दीगी रोरङ्गी ॱसोक्ली दी जम्बुलीङ्ल ॱयुन तङ्सोङ्। हुनी डलु घयेत् दी दी़न को़न्ज्योक्की ङेल्लेन् च्यो़स ॱनो़च्च्य छ्यीम्मु च्यीक्ल ॱलुक्न कुरीक् चीर्सोङ्। 20 हुगी ॱनो़च्च्य चीर्स दी सार्की छ्यील दुक्। ॱनी हुगी चीर्स दीनी मल्ल ठक्की चङ्बु थो़न्सोङ्। ॱनी ठक्की चङ्बी़ तीङ्रीङ्लो़त् दी ते सी़जो़त् च्यीक् दुक्। ॱनी हुगो दोम्ब बुम् ॱङी थुक्की ॱसनेल स्येन टप्सोङ्। |
© 1995 Wycliffe Bible Translators, Inc. and Nepal Bible Society
Wycliffe Bible Translators, Inc.