ॱसाल्केत् 13 - ल्होमीज्यम्जो छ्यीम्मुनी थो़म्बे ॱसीम्ज्येन् १-१० 1 हुनी ङे छ्यु ज्यम्जो छ्यीम्मी़ नङ्नी ॱसीम्ज्येन् च्यीक् थो़म्ब थोङ्ज्युङ्। हुल रच्च्योक् च्यु धङ् गो दी़न् दुक्। ॱनी रच्च्योक् रीदङ् रील थोप् छ्यीम्मी़ ज्याबी़ स्यमुङ् री घो़न्दुक्। ॱनी गो घयेत् दील को़न्ज्योक्ल ॱमो़म्बी़त् तोङ्गेङ्गी मीङ् री ढीदुक्। 2 हुगी ॱसीम्ज्येन् दी सीक् डस्सी दुक्। हुगी कङ्लक् दी धोम्गी डस्सी दुक्। हुगी ख दी ॱसेङ्गीगी ख डस्सी दुक्। ॱनी डुक् दीगी हुगो रोरङ्गी ॱवङ् च्येम्मे स्युडी दील केन रोरङ्गी ॱस्यीक् धङ् ॱवङ् छ्यीम्मु हुल बीन्सोङ्। 3 हुगी ॱसीम्ज्येन् दीगी गो च्यीक्ल नस्सी ॱस्यीसोङ् ॱसम्ब बेन् तङे ॱम ढक्नर च्यीक् ङे थोङ्ज्युङ्। हुगी ॱम ढक्नर दील जम्लीङ् की़न् यीक् छ्यीन हुगी ॱसीम्ज्येन् दीगी घङ् झ्यीबल नेङ्गुक्। 4 हुगी डुक् दीगी रोरङ्गी ॱवङ् दी हुगी ॱसीम्ज्येन् दील बीन्नी, हुगी डुक् दील जम्लीङ् की़ङ्गी छ्यक् छो़गुक्। हुनी ॱसीम्ज्येन् दील अक् छ्यक् छेन हुबे हीन्दुक् सीगुक्। हीगी ॱसीम्ज्येन् हीगो डस्सी ॱयोङ् घन् दी यो़प्प बेक्क? हील ॱसु दीगी ॱमक् चो़त् छुगो़प्प बेक्क? सीस्सोङ्। 5 हुगी ॱसीम्ज्येन् दील दव स्यीप्च्यु स्यन्नी थुक्की ढीक्ल ॱवङ् च्यीक् बीन्दुक्। हुगी धी़ थुक्ल हुगी ॱसीम्ज्येन् दीगी तम्दो़त् छ्यीम्मु ॱस्येत्न को़न्ज्योक्ल आक् ॱमो़म्बी़त् तोङ्गुक्। 6 ॱनी हुगी खनी को़न्ज्योक्ल धङ् खोङ् स्युस तेङ् यी़ल धङ् उन घङ् यो़प्प कुरीक्की ढीक्ल ॱमो़म्बी़क्की तम् लप्कुक्। 7 ॱनी हरुङ् को़न्ज्योक्की मी चङ्म घयेत्ल ॱमक् चो़च्च्येमे ॱवङ् हुल बीन्दुक्। हुनी हुगो ज्ये डोगुक्। ॱनी जम्बुलीङ्गी केच्च्योक् कुरीक्, ज्यागक् कुरीक्, ज्यी़त् कुरीक् हुगी ॱवङ्गी होक्ल ॱस्योर् डोगुक्। 8 ॱनी ॱरोक्ल झ्युङे लुक्टुक्की लक्ल यो़क्केन् छीये थोल गोम ॱस धङ् ॱनम् छ्यादु ची़प्पनी मीङ् ढीन स्यक्प घयेत् दी पी़प्पे हीन्डो़ जम्बुलीङ्गी मी ॱयोङ्मा कुरीक्की हुगी ॱसीम्ज्येन् हुल छ्यक् छो़गुक्। 9 आम्ज्योक् यो़प्प च्येम्म घयेत् हीगो नेन्ज्यीत्। 10 हुगी धी़ल को़न्ज्योक्की मी चङ्म ॱसु चो़ल्ल डो गोगेन् बेक्क हुगो चो़ल्ल डोगेन् बेत्। ॱनी यङ् मी ॱसु ढी पदङ्गी लक्ल ॱस्यी गोगेन् बेक्क हुगो पदङ्गी लक् दीलरङ् ॱस्यीगेन् बेत्। हीगी यङ्ल क थीरी देत्न गुर् थेक्प गो़गेन् बेत्। ॱसनी थो़म्बे ॱसीम्ज्येन् ११-१८ 11 हीनी यङ् ॱसे नङ्नी ॱसीम्ज्येन् ॱयोङ्म च्यीक् थो़म्ब ङे थोङ्ज्युङ्। हुल लुक्टुक्की रच्च्योक् डस्सी ॱङी दुक्। ॱनी हुगी केत् दी यङ् हुगी डुक् ॱमप्पी़ केत् दी डस्सी दुक्। 12 ॱनी हीगी ॱसीम्ज्येन् हील हुगी ॱसीम्ज्येन् ॱएम्मा दीगी ॱवङ् घयेत् दी जेङ् थोप्न दुक्। ॱनी ॱस्यीसोङ् ॱसम्ब बेन्न ॱम ढक्नरे ॱसीम्ज्येन् दील जम्लीङ् की़ङ्गी मी घयेत् हीगी तीङ्मा दीगी छ्यक् छो़दु ची़क्कुक्। 13 ॱनी ॱसीम्ज्येन् तीङ्मा हीगी यीक् छ्यीम्मी़ लेगी ता गज्येन् तो़न्न मी घयेक्की थोङ्सल ॱनम्नी मल्ल मी बर्केन् पप्न तो़ङ्गुक्। 14 ॱसीम्ज्येन् ॱएम्मा दी च्येन्नी ॱवङ् थोप्न यो़प्पे ॱसीम्ज्येन् तीङ्मागी तो़म्बे यीक् छ्यीम्मी़ लेगी ता घयेत् दी थोङ्नी, जम्बुलीङ्गी मी घयेत् हुगी ॱयोङ्गोर्ल छ्यी़ डोगुक्। ॱनी पदङ्गी बेम्बे ॱम ॱसो़नरे ॱसीम्ज्येन् दी तो़च्च्येल जम्बुलीङ्गी मी घयेत्ल हीगी ॱसीम्ज्येन् तीङ्मा हीगी हुगी डवु दी सोदु ची़स्सोङ्। 15 हुगी डवु दील उ ॱलुक्न तम् लप्तु ची़त् छुगेङ्गी ॱवङ् हीगी ॱसीम्ज्येन् हील दुक्। ॱनी हुगी डवु हुल छ्यक् ॱमीत् छो़गेन् घयेत् ॱसो़च्च्येमे ॱहक् हीगी ॱसीम्ज्येन् हील बीन्दुक्। 16 हुनी मी छ्यीया च्युङा धङ् छ्युक्पु टङ्बु धङ् मी रङ्वङ् च्येम्म धङ् रङ्मो़ मीप्पे ॱयोक्पु कुरीक्ल यरील लक्प ॱयेबल, यरील थोक्कोक्ल खेरक्की दक् ज्यक्तु ची़स्सोङ्। 17 ॱनी हुगी दक् ज्यब च्येम्मे मी घयेत् दी पी़प्पे हीन्डो़, मी ॱयोङ्मा घयेत्ल घन्ड अक् चोङे ॱहक् मीप्प, घन्ड अक् नोये ॱहक् मीप्प झ्युङ्सोङ्। हुगी दक् दी ॱसीम्ज्येन् दीगी मीङ् दी हीम्ब न, मीङ्गी ढङ्ज्युक् दी हीम्ब न, च्यीक् दुक्। 18 मी धो़न् च्येम्म घयेक्की हुगी ॱसीम्ज्येन् हुगी ढङ्ज्युक्की धो़न् दी नम् च्येत्न ॱह घोव झ्यी। हीगो मी च्यीक्की ढङ्ज्युक् बेत्। हीगी ढङ्ज्युक् दी ज्यब ढुक्तङ् ढुक्च्यु ररुक् यो़क्केन् बेत्। |
© 1995 Wycliffe Bible Translators, Inc. and Nepal Bible Society
Wycliffe Bible Translators, Inc.